今日我開始左對公司啲同事進行復仇大計: 第六十七節
雖然今日係星期日，但唔代表我有份放假。莊神喺一早七點就親自上到我屋企門口撳我門鐘嘈醒我，我隔住防盜眼同佢講：「阿伯，呢度無姐姐仔呀，你去第二度撳鐘仔啦，唔好煩住我。」喺門外嘅莊神淡然一笑，之後擰轉身同Robin講：「呢一度爛鬼鐵閘同木門，要你爆開應該無乜難度呀可？」依舊係一身黑色西裝，束馬尾兼戴左太陽眼鏡嘅Robin好認真咁打量一下度門，之後同莊神講：「莊生，放心啦，你之前畀錢資助我去學開鎖，我應該可以學以致用架。」嘩，呢條八婆連開鎖都識，我真係唔夠佢玩呀。我拿拿臨開左度門之後話：「師父，乜咁早呀，拜山都無咁早啦。地方淺窄，真係招呼唔到呀，所以你有咩喺門口講就ok架啦。」莊神推開我同Robin逕自行左入我間房，呢個時候我阿妹因為畀佢地嘈醒左，睡眠惺忪咁行出黎睇下發生咩事，佢見到雖然著住一身休閒服，但依然係咁瀟灑不凡嘅莊神，即刻面紅紅咁話：「對唔住呀哥哥，我唔知你有客人，我仲著住件睡衣行出黎，真係失禮啦。」莊神呢個時候即時走上前，一邊親吻住我個妹嘅手背一邊話：「失禮嘅係我，如果我早啲知道上黎會見到位咁美麗咁清純嘅佳人，我一定會準備定份見面禮。」我喺一旁即時插咀話：「幾十歲人上去人地屋企都兩手fing fing，呢啲人情世故嘢唔洗我做細嘅教返你條老嘢轉頭掛。仲要抽我個妹水，你估佢真係人人都掂得呀，要收錢架，唔好咁多嗲，無禮送黎都折現呀，如果唔係唔好怪我對你唔客氣呀死老嘢。」Robin即時走上前，冷冷地話：「唔好話我唔提醒你，我學泰拳同以色列軍用格鬥術學左好多年，如果你想對莊生動手動腳，你最好有斷手斷腳嘅心理準備。」「挑都二十一世紀架啦，仲成個野蠻人咁講打講殺，學下點樣同下人文明共處啦。我警告你呀，你唔好恃住自己食過下夜粥就可以惡晒呀，你啲野蠻人夠膽喺我屋企屙屎屙尿我都唔會放過你架。」我阿妹即時過黎好大力咁大我一下，之後同Robin講：「靚姐姐呀，我阿哥低低地架，你唔好怪佢呀。」挑，呢個死妹釘真係手指拗出唔拗入呀。
平時星期日我阿妹通常都係三點不露，出奇地佢而家畀人七點嘈醒都無黑面。佢仲竟然主動話煮早餐畀我地食，我真係懷疑佢應該有啲戀父情意結，莊神喺我屋企行左一個圈之後，佢走黎同我講：「如果我無估錯，你中學果陣應該過得唔開心。」我心入面微微地感到驚訝：「點解你會有咁嘅結論呢？」「我頭先望過你間房，你連小學本紀念冊同班際常識問答大賽殿軍獎牌都有keep低，偏偏我就見唔到有任何關於你頏中學嘅嘢。再加上你性格咁突出，喺青春期融入唔到其他人都好正常。」雖然畀佢估中晒，不過我決定不置可否，費事呢條老嘢咁得戚，佢繼續講：「到你入左大學啦，你雖然曾經嘗試好努力咁去洗底同掩飾自己，不過你嘅性格根本同唔到其他人合作，上莊之類一定無你份架啦，而且我估你連啲集體assignment都會同人有爭拗。但如果為師無估錯，你嘅古惑性格一定係喺當時建立出黎，睇怕你喺大學果陣已經開始計算其他人架啦？」「師父，客許我直接少少講句，你收皮啦老嘢。你講果啲嘢就算係中又點，個個人啲成長經歷都大同小異架啦。」莊神再次一臉自信咁話：「但我連你二十歲先破處都估得到喎。」我即時大為驚訝咁問：「點解？點解你會知道架？」莊神微微一笑話：「因為你二十歲果年係大學year 2，你中學果陣唔好話女朋友，但連朋友都無過。你為左努力去改變，你一上到大學一定好努力咁融入其他人，但一個人要突然改變都唔係咁客易。但過左一年之後，你已經開始摸清大學嘅生態，再加上你仲可以以人學長身份去呃啲year 1妹妹仔，我有無講錯呀？」當莊神將佢嘅假設娓娓道來嘅時候，我又真係完全無得反駁佢。不過我另一方面都慶幸我無跟錯師父，我反問佢：「你一早帶埋Robin上黎，我估唔係為左傾閒計食早餐咁簡單啦掛？」莊神反問我道：「咁不如你估下點解為師咁早上黎你度？」
我打量左佢一陣，之後開始話：「你表面上雖然好似好精神咁，但你雙眼隱含住啲疲態，我估你唔係一早起左身，相反你係一晚無訓過。你身上除左有古龍水味之外，仲混雜左啲香水味，如果我無聞錯的話，果浸香水係Chanel No.5，Robin係用緊Bobbi，所以果浸香水味唔係黎自佢。正常如果你尋晚係同師母過的話，我估你地唔會喺香港都噴晒香水掛，我估你尋晚應該係無返過屋企，而且係同另一個用緊Chanel香水嘅女人過。阿癲婆Robin套衫一睇就知係由尋晚著到而家，因為以佢一個整齊到接近有潔癖嘅癲女人黎講，佢點會著住一件袖口位有紅酒漬嘅恤衫出街呀。再加上佢入到黎我屋企都戴住太陽眼鏡，九成係為左遮眼袋啦。佢作為你嘅近身助手，你出左去偷情玩一晚，佢再唔願意都要跟住你架啦。點呀師父，你尋晚去左同邊個女明星定model玩左成晚呀，你肯定係驚師母發現所以唔敢返屋企住。又唔知去邊度等好，所以上左黎我度，之後仲要如果師母問到你可以話黎左搵我。其實見你兩手fing fing上黎我都已經估到一半架啦，你份人雖然痴線姐，但你第一次上我屋企，你都應該預左我會有屋企人喺度，但你都就咁上黎，好明顯係你根本咩都無準備過，係即興行為啦。」莊神微微點頭話：「我剩係得一點想修正你，尋晚唔只model同明星，連外國運動員都有呀，不過呢啲嘢我就唔多講費事你妒忌啦。不過唔錯呀，就算蜜運緊都仲咁清醒，為師好高興。」「連我拍拖你都知？」「咁尋晚為師喺去會一班美人之前仲有啲時間，咪同Robin去觀察下你囉，點知你掛住同個女同事咁甜蜜，連我跟左你咁耐你都唔知。」如果唔係怕畀Robin打死，我真係差啲走上前打呢條死老嘢一身架啦，邊有人跟蹤完人都仲可以講得咁得戚架。