今日我開始左對公司啲同事進行復仇大計: 第四十九節
有時真係估都估唔到，早兩日我畀阿虎果幾百蚊係物有所值。阿虎竟然發現到大明真係喺公司附近出現過，而且佢仲曾經喺Valarie喺公司後巷食煙之際，走上前同Valarie講過幾句嘢。不過由於阿虎唔係咁識聽廣東話，再加上佢又唔敢走得太近，佢聽唔到佢地兩個講咩。畀著平時我喺得到呢啲情報之後，正常都會謀定而後動，不過由於大明多次威脅話要搞Daisy，我而家證實左呢件事係同Valarie有關，我真係按捺不住。我喺聽完阿虎匯報之後，已經諗定左一返到公司唔理三七廿一都會走出黎同Valarie對質，我知道我無咩實質證據之下可能講完之後畀保安拉走果個會係我，不過我真係唔理得咁多，我有諗過到時就算咬佢唔入都仲可以走去打佢一身洩下憤。但有啲嘢可能真係茶樓點心－整定嘅，喺我正想不顧一切，一上到公司就衝動行事之際，我喺踏入公司門口之前，一個久違嘅面孔阻止左我，而我同Valarie嘅戰爭亦因為呢個人嘅出現令到局勢完全改變，呢個人就係當日喺我面前逃之夭夭後就音訊全無嘅Taylor。
對上一次見到Taylor果陣，佢畀Valarie個阿婆虐待到不似人形，但呢一刻再現喺我眼前嘅佢，睇黎已經從傷痛中恢復，而且仲比我第一次見到佢果陣更加意氣風發。我真係好好奇究竟中間發生過啲咩令到Taylor會有咁大改變。Taylor揸住架BMW Z3喺我公司門口出現，雖然架車舊就舊左啲，而且應該都唔洗太貴，但本身一貧如洗，靠周圍乞度日嘅Taylor竟然揸得起車，所以我一見到佢果陣都望左佢幾眼，確定我有無睇錯人。佢一見到我黎就向我招手示意叫我上車，我一上到車佢就粒聲唔出揸左架車去離公司十幾分鐘路程嘅碼頭度停低左。Taylor可以話係畀Valarie玩得最甘嘅受害者，我可以肯定無人比佢更加憎Valarie，因此無論係因為咩原因佢突然出現，我都無擔心過會係Valarie同大明嘅圈套。Taylor喺停低架車之後，望住我用好誠懇嘅語氣話：「James哥，你係改變左我人生嘅大恩人，多謝你。」
Taylor喺多謝完我之後落左車，留低左一頭無緒嘅我喺車上面唔識反應。佢落左車之後，望左個海喺度笑，我即時後悔自己跟左佢上車，呢條友會唔會其實係畀人玩到癲左？呢架車會唔會係搶返黎架？佢車我黎會唔會係要我同佢一齊跳海？心中有無數疑問嘅我正想偷偷地落車，學返Taylor上次咁逃之夭夭。Taylor見狀即時轉身走埋黎同我講：「James哥，如果唔係當日你叫我去飲嘢，到之後發生左咁多事之後你又黎救我出生天，我人生應該就唔會有咁大改變。」由於深信眼前嘅Taylor精神情況唔多穩定，佢仲應該係喺某醫院逃走出黎，我驚到口疾疾咁同佢講：「Taylor你乖啦，醫生開啲藥你要准時食架，啲醫生平時綁住你唔係想害你，佢地係想幫你咋，我陪你返返去醫院啦。最多我叫啲醫生呀護士呀對你溫柔啲啦，你還返架車畀人先，我同你返去啦。」Taylor無理到我，佢喺口袋度拎左支雪茄出黎吸左一口，之後微笑咁同我講：「你睇下呢支雪茄？喺香港買唔到架，要喺Cuba叫人買返黎架，你話如果我喺青山出黎會唔會有支雪茄先。仲有呀，呢架車係人送畀我架，好快你就會知我點解要多謝你，你慢慢聽我講先啦。」「你揸住個火機喺手，我想唔聽你講都唔得啦…….」「James哥無見你一排，你講嘢都仲係咁九唔搭八呀，不過唔緊要啦，你聽完我講就會明架啦。」
「當日我喺間時鐘酒店走佬之際，我當時真係好驚同好亂，我怕Valarie會搵人再搞多我一次，我當時真係好驚，好怕再落入果個痴線阿婆手中。」「好彩你走得快咋阿仔， Valarie又進化左啦，佢而家仲搵左個癲佬拍檔呀，到時你可能連後門都變紅隧，以後都會隔時賴屎呀…… 」Taylor無視我嘅反應繼續講落去：「絕望中嘅我喺無處可逃之下，去左投靠果陣同我一齊征戰中環嘅Marvin哥。我初初見返Marvin嘅時候，反應同你頭先見到我一樣，本身佢同我一樣都係不務正業架嘛，但喺我再見返佢果陣，佢竟然搬左去港島區一間 service apartment住，而且佢仲竟然揸GTR呀。」「喂Taylor你唔係落搭學人做老千呀下，喂我無錢架喎，你要搵水魚都搵第二個呀。」Taylor聞言大笑：「阿James哥你啲思維真係好跳躍下，你放心我唔係走左去做老千，亦唔係做啲咩犯法嘢，我只係將我全副心思去做一啲我一直最擅長嘅嘢…..」喺佢未講晒句嘢之前，我無撳鐘就搶答左：「我知啦，係食軟飯！」Taylor聽到我呢個答案，好滿意咁點頭，作為一個男人，食軟飯都仲可以食得咁引以為傲，我眼前嘅Taylor喺經歷左咁多苦難之後睇黎已經無晒羞恥之心。佢食左口雪茄之後，繼續講：「Marvin同我講，佢之所以咁風光咁富貴都皆因佢爛做唔揀客，唔理男定女，黎自香港定大陸，總之畀得起錢就係佢愛人。咁我回想起自己連幾十歲阿婆都試過，其實呢個世界都已經無咩女人可以難到我。咁我都就黎三十歲，都想為將來打算下……不過同Marvin唔同，我都係接受唔到男人，不過剩係做富婆生意都已經夠啦。」果然人不要面真係天下無敵，我眼前嘅Taylor可以將食軟飯講到咁光明正大，而且字裡行間都充滿住霸氣，我其實都有啲佩服佢。
「不過，我始終放唔低仇恨，就算我而家搵到錢啦，有車揸同自己交得起租啦，我都仲係有啲睇唔起自己。」「咁其實都唔係過左好耐姐，放唔低都係好正常，而且你睇唔起自己都好正常呀，我相信大把人都睇你唔起架。」「點都好啦，我今次黎除左想多謝你之外，我仲打算搵埋你一齊去報仇。」「報仇？點報呀？你唔好得把口諗住黎到旨意晒我喎。」Taylor聽到之後笑左一笑，佢之後喺車度搵左個拎左幾幅相出黎。「你知唔知我點解仲係揸緊二手車，我賺返黎嘅第一桶金，尋日拎左黎做第二啲嘢，你睇下就明。」我一望啲相，見到相中人係大明搵黎同我影裸照嘅黑人，而且喺相入面佢地狀什痛苦，再睇落去，我見到連Valarie個鬼佬未婚夫都喺埋入邊，同班黑人一樣佢都好似好痛苦咁。我再望一望Taylor，正想問佢地究竟做咩，點知Taylor做左一個叫我收聲嘅手勢，佢話：「有啲嘢你都係唔好知啦，總之我可以話你知呢啲錢洗得物有所值啦。當日佢地畀我嘅屈辱，我已經十倍奉還，下個就輪到Valarie同佢阿婆架啦。James哥啲相我畀你做留念啦，我聽晚再搵你，我而家車你返工先啦。」估唔到喺呢個時候，我再增添多個強援，我呢個復仇者聯盟，一定可以打殘Valarie。