今日我開始左對公司啲同事進行復仇大計: 第十一節
喺開始講今日發生嘅事之前，我覺得我有必要先解釋下小器簿系統於我人生嘅重要性。細佬行走江湖咁多年，可能因為我為人比較豪邁同不拘小節啦，喺待人接物方面有時唔夠留心，成日得罪左人都唔知。為左保障自己，我由小學開始設立左小器簿系統去記得平時有咩人得罪過我，起碼喺同人對質嘅時候，我都有兩手準備嘛。相信大家都知我份人又善良心地又好，什少會主動去對付人，所以小器薄系統嘅資料一般都只係作紀錄之用。不過小器簿的確係我嘅好朋友，仲記得喺我讀緊中學嘅時候，我學校有條友叫波強，佢簡直係現實中嘅技安黎。佢由中一恰到我去中五，佢平時一係笑我係賴屎仔，一係就對我拳打腳踢。最離譜到係有一次喺上完P.E.堂，大家喺更衣室換緊衫。因為我喺做緊體適能跑緊長跑果陣突然肚痛，喺長跑緊上氣唔接下氣之際，我放左個濕屁。咁作為一個早有準備嘅人，我一向都有帶定多條底褲做後備(絕對同我曾經賴過兩次屎無關)，咁理所當然地我喺上完P.E.堂換衫果陣，咪順便換埋條底褲囉，一切都好合理姐。
但係波強竟然一手搶左我條染左小小屎跡嘅底褲周圍畀人睇，自此之後我成個中學生涯都離唔開屎。當然，波強對我做嘅一切，我都詳載於小器簿之上，所有紀錄一直都keep住喺小器系統之上。過左幾年，到大家出身做嘢嘅時候，由於我中一至中五都過得唔太愉快，我同我啲中學同學都無乜聯絡，連相機基呢啲當年算係有兩句嘅人我都無刻意再拉直到有一日，我突然收到波強嘅電話，佢約我出黎見面。當時大家已經有好多年無見，而且無晒關係，我理應無理由出去同佢會面。不過由於波強知我住邊，我為免佢有咩事會走上門打我一身，我唯有出去搵佢。不過喺講出去搵佢之前，我想澄清一點，我從來都唔係唔夠波強打，相反我係怕佢激到我用真功夫嘅時候，我會錯手殺左佢，我真係唔係買佢怕架，求下你地信我啦。
佢約左我喺一間西餐廳會面，果日係平日嘅下晝兩三點，入到去果陣間西餐廳無乜人，都係得我地一枱客。我刻意揀左雜門口最近果張枱，以方便有咩事我都可以走先。波強一早已經準備到左，而佢同佢當年嘅技安形象好唔同，經過左幾年大學生涯，佢變得成熟左同斯文左，不過我係唔會畀佢嘅外表呃到嘅。到我一坐低嘅時候，波強突然捉住我隻手，好誠懇咁同我道歉。原來呢幾年大學佢竟然走左去讀教育，佢話佢初初都係為左教書呢份職業薪高糧準所以先讀教育，點知讀讀下佢發現左作育英才嘅重要性，佢亦都開始反思自己過去嘅人生中種種嘅不是。佢同我講佢覺得當中最對唔住我，因為佢嘅年少無知傷害左我，佢希望我原諒佢。我聽到之後假意配合，我同佢講我原諒佢，亦都叫佢唔好怪責自己，以後好好地去作育英才以作補償。佢之後同我講自己喺一間中學搵到教席，我當時叫佢畀心機做，同順便扮經濟有困難問佢度左幾千蚊之後就走左。
波強可能可以呃到全世界，但佢點會逃得過我嘅法眼。我當然唔會就咁算數，問佢借果幾千蚊係我應得架，根本果小小錢作為多年黎嘅補償都唔夠啦。我之後即刻喺小器簿度翻查返波強多年黎嘅紀錄，print左出黎，之後逐張逐張fax去佢任教果間學校，喺fax度第一百二十七張嘅時候，佢校長終於肯聯絡我，佢邀請我上門去了解返件事。當到達校長室果陣，波強同駐校社工都喺度，當我心諗波強你今次仲唔死嘅時候，果個校長竟然話代波強嘅年少輕狂向我道歉，仲話波強已經變成左一個好老師，希望我會畀次機會佢喎。個駐校社工仲話可以免費替我作心理輔導，以波強亦都一邊喺度喊一邊同我講對唔住，話無諗過佢嘅惡作劇會對我影響咁大，佢話如果佢辭職可以補償到我，佢願意即刻辭職。我聽到之後好嬲，指住佢地大鬧：「而家你班友夾埋做大戲扯貓尾呀，你地仲想屈我痴線？我同你地講，你而家唔抄左呢條友，我即時將呢疊罪證交畀傳媒呀！」校長同果個社工聽到之後只係一邊用鄰憫嘅眼神望住我，一邊搖頭嘆息。而波強見狀越喊越勁，而且面上充滿住內疚。到最後波強同校長講佢都係辭職算，走果陣佢仲喊住咁死埋黎係同我咁講對唔住。我心諗你有無咁好戲呀，佢唔應該教書，佢應該去讀演藝啦。
就係咁，我用小器簿成功為社會剷除左一個未來教畜，而經此一役之後，我亦更加信任我嘅小器簿系統，而系統記載嘅人同事亦倍加詳細。可惜，喺我連夜翻查我嘅小器系統以後，我發覺我對Miki依然係一無所知，由佢入職以黎，佢好似好巧妙地避過晒同我嘅衝突，佢明明係公司一份子，但偏偏我對佢嘅所知什小。除左用小器系統去調查Miki外，我亦嘗試左用最傳統嘅起底同Facebook大法，可惜我除左知佢佢係華仔天地會員(唔係劉華，而係江華果個)同曾經bid過兩盒我的美麗日記之外，我就一無所鑊，我連佢讀過咩中學呀都唔知。呢個時候，正當我灰心之際，我諗起而家公司個HR部仲未有人管理，所有人事file都應該就咁放喺Sophia以前個位無人理。
為左偷睇啲人事部檔案，我需要經過Judy同Kathy身邊先可以去到以前Sophia個位。為左製造呢個空間畀我埋去果個位，我決定出動道友權。唔洗諗都知道友權喺果晚收到果個電話一定係假，佢之後亦都唔會搵到Judy，而仲以為係Judy大慒畀錯個號碼佢而一直埋怨緊造物弄人。為左進行呢件事，我連早餐都唔得閒預備畀Daisy，因為我唔知Judy同Kathy會幾時返黎。當我whatsapp畀Daisy話佢知我買唔到早餐畀佢之時，佢只係send左個唔開心icon畀我，隔左陣佢就話：「唔緊要啦，我自己買啦，我會順手買埋畀你架啦(面紅icon)。」嘩佢send面紅icon畀我呀，喺我腦海中即時聯想到Daisy雙頰泛紅嘅畫面，正當我差啲畀呢件事分心之際，我腦海竟然同時浮現住Miki得戚奸笑嘅樣，我亦因此即時醒一醒，無錯，我而家最大敵人係Miki，而所有同Miki有關嘅人都可能係我嘅敵人…
我叫左道友權一早喺公司樓下度等，我話我會畀signal佢叫佢上黎。當我返到公司果陣，我見到Daisy同Miki又一早到左，Daisy畀個早餐我食，但我呢個時間仲邊有閒情逸緻理佢呀，我求其食左兩啖就放低左，繼續喺門口等Judy同Kathy返黎，點知Miki突然行埋黎同我講話：「我頭先返工果陣，見到阿權喺樓下行黎行去呀，呀唔知點解佢又會識搵到黎架呢，唔通佢係黎搵佢中學同學阿油？不如你落去睇下咩事啦，你知啦，尋日Judy畀人嚇一嚇，又出左咩事就唔好啦。」喺呢一下我明白，無論Miki真係咁啱撞到阿權，又抑或佢喺飲野果晚埋阿權身果陣係咪做過咩手腳，以致佢得知我今日嘅行動都好，Miki又再一次贏左我…
輸多次唔代表我就要因為咁而一直捱打，既然已經無機會check度個file，又可能係我已經畀Miki搞到無晒計，所以我決定放手大鬧一場，以試探Miki嘅反應。既然改變左目標，我唔等Judy到就直接叫左阿權上黎。阿權上到黎果陣，手上面拎住扎唔知喺邊度摘返黎嘅花，而佢亦拎埋支結他上黎，話打算一陣唱歌示愛。我果一刻根本一啲計劃都無，因為既然唔知Miki有幾高深莫測，我決定不按常理咁出牌以途打亂佢嘅步伐。Judy入到黎果陣見到阿權即刻萬分錯愕，我唔等佢反應就同佢講：「Judy，唔好怪我地多事，尋日件事令我地知道左你好脆弱好需要人去保護。所以我同Miki阿夠油拎左阿權個電話，私自安排左阿權上黎，我地唔想你地呢段大好姻緣就此斷送呀。」
Miki聽到我拉埋佢落水果下同樣錯愕，而且欲言又止。之後我就將阿權手上扎花畀左Miki拉住，繼續唔理其他人反應繼續亂講：「我同Miki今日仲準備會為你地呢段戀情打打氣，我陣間會拎支Trumpet伴奏，而Miki就會拎住扎花伴舞同和音，係咪盞鬼過你做女果陣去大撻地呢。」Judy見狀，剩係鬧左句痴線就衝出門口，阿權亦都有追出去。其他陸續返黎嘅同事見到呢個情況都不明所以，而我亦都分唔清呢一刻Miki係因為太嬲定係因為怕醜而面紅。我見既然一路都畀Miki食住，反正我都無野可以輸，我決定繼續試下亂黎玩一鋪。
我突然上前用拉住Miki，之後大叫：「Miki死啦，Judy走左呀，我地放啲追啦！」之後就一支箭咁拉住Miki一路跑去後樓梯，我明知Miki係著左高跟鞋，都唔理三七廿一繼續拉住佢跑，上左兩層樓梯之後。Miki終於掙脫左我隻手，之後喘住氣咁同我講：「你知唔知我差啲扭到腳呀痴線佬。」我聞言之後忍唔住大笑，答佢：「咁而家反正條後樓梯無人，要唔要我同你捽腳仔呵返你呀…都係唔好，不如直接call白車啦。」之後我唔理佢反抗，又擅自抱起佢跑返入office，之後一邊大叫：「阿油，Miki跑到隻腳好痛呀，你快啲call白車啦，我諗佢頂唔到啦。」阿油聽到即刻好緊張咁撲出黎講話：「Miki你頂住呀，我call緊白車架啦！」我諗只要係關於Miki安危，我就算講乜阿油都會信。
喺我懷中嘅Miki見到阿油咁慌張都忍唔住笑，之後佢同我地講：「我無事呀，各位有心，麻煩James你放返我落地先啦。」其他人目睹呢次鬧劇都目瞪口呆，大明原本又想上黎扮大佬責備我，不過可能佢諗起尋日Miki企喺我果邊所以佢都係行返返埋位。Judy過左一陣返返上黎，佢走埋黎同我同Miki講：「今次我就算數，你地唔好再咁多事呀下。」講完之後就返返埋位，其他人亦都陸續散去。留返仲喘緊氣嘅我同Miki喺度，我以為Miki咁樣畀我玩一玩會好嬲，什至爆大鑊，點知佢不怒反笑，細細聲同我講：「其實頭先都幾好玩呀，你都幾好野呀，希望你繼續會畀到驚喜我。」哈，明明頭先畀我嚇親，但而家Miki又要扮鎮定攞返個尾彩。我呢一刻終於領悟到，要對付頭腦精密嘅人，我反而應該多做多啲唔合理嘅行動，等佢無路捉我。