今日我開始左對公司啲同事進行復仇大計: 第八節
為左催眠自己唔係鍾意左Daisy，我決定今日早餐就黎糟蹋下佢。我知道佢唔係太食得辣，但係我就一早專登去附近買左個沙爹牛麵畀佢，知佢怕辣我呢個公仔麵當然會起勢咁落辣椒油落去孝敬下佢啦，向我撒嬌呀拿，陣間睇你食到個咀變孖潤腸果陣仲嗲唔嗲我。一返到去Daisy已經一早喺門口等我，佢手上仲拎住個柴魚花生粥，佢話我買左咁多日早餐畀佢，佢今日開始會買返畀我…呢一刻，我縱然再鐵石心腸，都唔忍 心要佢食左個辣油麵。我唯有話自己對花生有敏感啦，所以叫佢自己食左個柴魚花生粥，我自己就食左個辣油麵…唔知大家有無試過食一碗紅色嘅沙爹牛麵呢，我就 試過啦，原來兩包辣椒油真係好辣，辣到我食左幾啖已經飲左半支水，我襯Daisy行開左就即刻拎左碗麵入廁所度倒左去。但可惜我個咀已經無可避免地變左孖 潤腸，不過當我諗起碗柴魚花生粥，我面上果孖潤腸竟然不爭氣地甜笑起上黎，我果一刻覺得自己真係好污糟，好嘔心...
今日係我地阿姐Kate出完trip返黎嘅大日子，佢因為出左trip都成個幾月，而且佢對公司下面幾個阿姐一直相處得唔係太好，所以佢對我畀人杯葛呢件 事係完全唔知情。咁喺阿姐返到黎之前，我緊係唔會放過任何機會爭取下同Judy相處，佢隔離個位原本係屬於HR Sophia，不過因為Sophia走左所以一直都仲空置左喺度。咁喺大家都未返齊黎果陣我就坐左喺阿Sophia個位度一邊扮睇報紙，一邊靜候住 Judy返黎…其他人陸逐返到黎果陣雖然都會奇怪我坐左喺Sophia個位，不過基於大家都當我透明所以無人過問我做咩坐左喺度。除左我拎住份報紙喺手之 餘，我仲喺枱面上放左盒牛奶喺度。
相信大家除左飲wine之外，都好少會理自己飲緊嘅人係咩年份。不過我知道Judy作為一個對飲食都相當有要求，平時出去同啲麻甩佬食個tea都要去文華 嘅婌女，我點敢用普通牛奶黎待薄佢。呢盒牛奶年份唔算好好，都係過左期幾個月，我驚佢發酵不足，發揮唔到過期牛奶果種酸臭味，所以我專登私人加左啲益力多 呀酸忌廉釀左幾日。或者大家會奇怪我點樣搵到盒過左幾個月期嘅牛奶出黎，但大家只要關心下身邊嘅老人家，特別係經歷過戰亂，變得有種儲物狂熱嘅老人家。唔 好話過期牛奶，你連過期人奶都可能搵到呀。Anyway，雖然我知我呢盒牛奶比唔上阿Judy姐飲開果啲Lafite，不過我都斗膽將盒牛奶命名做La Sing，因為我知當Judy姐聞到呢盒牛奶果陣，佢一定會講句屌 La Sing…
Judy姐返黎見到我坐左喺隔離，佢已經明顯地對我起左防範，而且明顯喺坐開左啲，畀佢咁公然地拒絕我真係好痛心，不過唔緊要，我原諒佢。喺佢坐定左之 後，我開始用佢聽到嘅聲量讀報紙，我讀左幾條標題，包括：「未婚獨居女子伏屍家中數日後，發臭遭鄰居報警始揭發事件」，「九成中年未婚女子因身體有異味未 能找到合適結婚對象」，「單身中年女子相體遇變態殺手，被殺後埋屍草叢，屍體發臭…喺我都未讀晒呢段之際，Judy忍唔住起身，雖然佢個樣已經嬲到好似想 殺人，不過佢依然強忍怒氣，用平靜嘅語氣同我講：「同事你可唔可以返埋自己個位先讀報紙呀？」我扮聽唔到，繼續一路望住份報紙，一路打開盒La Sing扮想飲，一打開果陣酸味真係臭到我都想嘔呀。Judy聞到浸味，又見到我無視佢，佢應該真係急怒攻心，佢直頭成個人行埋黎，想再叫我行開，但我見 佢行埋黎就已經即刻同時起身，之後再用假到無得再假嘅動作，扮唔小心鬆手，滴左小小La Sing落Judy件毛毛褸度。
Judy見到件毛毛褸沾到少少La Sing，當然即時瓜瓜大叫，而我講左聲sorry之後，就拎左盒La Sing落樓下街邊垃圾桶去毀滅證據。可能大家會奇怪我點解唔成盒La Sing倒晒落Judy度，原因有幾個：1.倒晒成盒會令到成間公司都聞到，我無理由要自己受罪埋一份姐；2.如果倒晒成盒落佢個身就會變左係我擺明整 佢，唔可以用唔小心黎推卸；3.如果大家有留意到我讀報紙，我除左係為左想煩到佢理我之外，我讀嘅標題都係圍繞住兩個主題，未婚同發臭，未婚呢樣嘢 Judy已經會自動對號入坐，而佢身上果小小La Sing，就會經由佢嗅覺系統去代替我提醒佢佢喺今日未死都已經開始發臭。
當我處理完La Sing上返公司之際，Kate啱啱返到黎，喺佢都未黎得切同大家打招呼之際，阿Judy唔理會其他人眼光，喺全公司面前向住阿Kate大發雷霆。平時 Judy同Valarie雖然都恃住自己做嘢掂同阿Kate好恰，都唔算太尊重佢，不過都仲會喺啲細嘅面前當佢係阿姐。不過我估盒La Sing真係臭到佢喪失左理智，佢開始大大聲話阿Kate唔識管理下屬，請埋啲痴線佬返黎。一臉茫然嘅Kate呢個時候唔識點反應，我喺呢個時候見機不可 失，即刻上前護主。我喺銀包度拎左五百蚊出黎，同Judy講：「整污糟你件衫係我論盡，我向你道歉。我知我同你之前係有好多誤會，你不滿我我明白，不過希 望你唔好將對我嘅不滿發洩Kate姐身上，佢係無辜架。呢度有五百蚊，你拎件衫去乾洗啦，唔夠你返黎再問我拎。你要怪我唔緊要，不過希望你唔好再為難 Kate姐…佢係一個好上司黎。」
最後幾個字我專登講得緊定同有力，而同時Judy亦醒一醒，意識到阿Kate無論點廢點無用，都仲係佢上司黎，喺火遮眼後開始暗覺不妥而面有難色。而 Kate心知自己不濟好多野都仲要靠Judy，佢唯有打完場話：「Judy我諗阿James都係無心，你拎左啲錢去乾洗啦，唔夠你再問我攞啦。今日我啱啱 返黎都好想同大家catch-up返近況，不如我今晚放工請大家飲野傾下計啦。」嘩估唔到Kate去完個trip返黎醒左啲，見到公司同事關係唔融洽，想 借飲野黎打好返啲關係。阿姐叫到大家當然無人咁推，阿Kate仲叫我幫佢安排地方。除左安排地方之外，我當然仲要安排下啲餘慶節目畀阿Judy啦…
老細叫到我安排飲野同班同事聯誼，我緊係會安排得妥妥當當。我知道Judy個個星期放左工都會同班未婚姊妹喺中環一帶覓食，佢喺果邊一定有頭有面好多人 識。既然係咁，我就行過方便，揀返阿Judy姐主場畀佢威返次畀阿Kate姐睇。而且中環有咁多洋漢，阿Valarie喺食洋腸方面可以話係專家，聽聞 Valarie條洋腸都係喺中環一帶識返黎，所以呢個地方唔只係Judy主場，仲可以等Valarie教導下大家中西交流嘅心得。
可能本身佢地預左我會玩野，當佢地聽到我竟然正正常常咁安排左喺中環，佢地都略帶驚訝。鑑於大家都知我地公司男丁單薄，得果幾條友我怕有咩事起上黎保護唔 到一眾小花(同殘花)。好彩呢個世界總係有錢洗得鬼推磨，所以喺晏晝我喺某個討論區(註:唔係高登)開左個post話招壯男飲嘢，酒水免費任飲，但條件只 有一個，佢地全晚只可以以Judy同Valarie作目標，事後我會畀多幾舊佢地做車費，如果違反呢個規矩佢地就要自負酒水。
唔洗好耐我就收到幾十個PM詢問詳情，呢班自告奮勇嘅壯男由十幾到四十歲幾都有，當中包括左金毛死MK呀，中年四眼毒男呀，瘦弱嫖客型少年等，粗俗啲講句真係乜撚都有呀。由於時間緊迫，我只可以喺唔同年齡層同唔同類型是但每樣執件。
到最後，我挑選左以下幾位：第一位佳麗係自稱喺天水圍無人不識，一頭金毛有啲似著名歌星Tommy仔阮民安，網名叫堅系好堅嘅阿堅；.第二位佳麗 行年三十幾歲，幅眼鏡睇落仲厚過本字典，身上件格仔恤衫一睇就知已經著左超過十年，報稱只係想真心出黎識朋友，唔係想呃蝦條嘅Jospeh；第三位我個人 認為佢係最極品,從相都睇得出佢身光頸靚，成身名牌但就無黎貴氣；面上戴住幅白框眼鏡，幾丈遠外見到佢已經想打佢一身，自稱喺中環各間club都留低左唔 少腳毛同陰毛，不過因為呢排失業所以肯紓尊降貴黎應酬下班中女嘅Taylor。
不過我都係嫌呢班友唔夠甩皮甩骨，私人再重金禮聘左喺我屋企附近周圍R煙食嘅道友權，由於道友權套衫應該臭到無酒吧肯畀佢入，所以我私人再畀左啲錢去沖過涼同裝下身。有左呢幾件極品中嘅極品，精英中嘅精英，我相信今晚Judy同Valarie一定唔會失望...
放左工之後成班女即刻飛奔返屋企裝身(特別係要換左果件仲有La Sing嘅毛毛褸)。由於Daisy住得太遠，同佢聲稱自己無乜出去蒲嘅習慣，所以佢都無咩特別裝束想換。之後佢決定自己喺公司附近茶餐廳食完個晚餐之後 就會自己坐車去中環。本身見佢一個人食咁慘我都有諗過提出陪佢食，耐何我要事先匯合果幾條重金禮聘請返黎嘅粉腸，我唯有忍痛同Daisy道別，一個人去左 蘭桂坊附近間老麥去同果幾條粉腸做briefing。
一落到老麥，我已經見到著住件格仔恤衫嘅Joseph坐住喺度打3DS。我行埋去問佢係咪到左好耐，佢吞吞吐吐依依哦哦左陣之後堅持話唔洗我幫佢畀埋錢， 佢真係好有誠意出黎交朋友。雖然可以慳返啲錢，不過佢無收我錢咪即係唔受我控制，為免陣間場面失控，我唯有放棄阿Joseph哥。我求其老點左佢去灣仔洛 克道啲酒吧叫佢幫我地等位，佢聽到之後問我：「James哥…乜…乜果度啲酒吧唔係…唔係畀啲外國人同南亞裔女人去玩架咩?」呀Joseph哥都傻唔晒架 喎，緊係佢成日遊巴士河果陣經過見到啦，我唯有亂講啲野打發佢走：「係呀，你咪當順便物色返個女傭，見到啱就請返個返屋企啦。喂快啲行啦，你身負重任呀， 聽聞早啲去攞位送多幾兜nuts架，車錢陣間畀你啦。」Joseph聽到自己身負重任即刻拿拿聲拎袋走出門口跑去搭車，一個純情毒男就咁成為左我計劃嘅犧 牲品。我心入面雖然有小小歉意，不過換個角度睇，佢呆等幾個鐘，都好過佢到時畀Judy同Valarie侮辱呀。
第二個出現嘅係道友權，初頭我仲擔心佢會拎左我畀佢裝身啲錢去上電，不過佢竟然聽聽話話咁執過自己，而且執過之後仲出奇地見得下人。我同道友權交代，佢今 晚剩係幫我纏住Judy就夠。平時佢個樣永遠都好似未上電無黎精神咁，但佢一見到Judy幅相之後突然精神一振兩眼發光。佢話：「我終於搵到我個muse 啦，我嘅音樂事業有救啦！」我聽到之後真係大表驚訝，乜道友權唔係道友黎架咩？之後再細問之下，先知原來佢本身係音樂人黎，不過喺長期無人賞識之下，佢失 業左好幾年。佢日日周圍喺條街遊蕩其實係為左觀察世界黎攞靈感，不過由於失業無乜錢所以行黎行去都係喺屋企附近，問人R煙食其實係為左同人交流。「既然你 覺得Judy會幫到你嘅音樂事業inspire到你，咁你就唔好放棄啦‧佢知道原來你咁有才華之後佢實好感興趣呀，陣間落力啲，我同事Judy下半生福祉 靠你架啦。」表面上係一個官仔骨骨嘅音樂才子，實際上係一個失業多年不務正業嘅廢人，今次Judy你仲唔中伏！
第三個出現嘅係人未到，浸古龍水味先飄到黎嘅Taylor。佢一黎到就同我地解釋話頭先喺街撞到好多舊相好，掛住同人吹水所以先遲左到。不過由於我望住佢 面上果幅白框眼鏡已經無名火起，我一路都需要拼命按捺住打佢一身嘅衝動，我無乜細聽佢啲廢話。我同佢交代佢今晚目標係Valarie之後，佢仲同我講： 「你知啦，我就算肯同你保證我唔溝其他女，其他女都會自動走黎yo我啦…」佢唔講完我已經忍唔住鬧佢：「收嗲啦杏家橙，一句講晒你今晚搞唔掂 Valarie就無糧出，同你啲酒水錢到時就自己搞掂啦！」佢聽到之後即刻笑笑口咁講話收到晒，咁乞衣嘅人真係唔易搵架，Valarie今晚有排嘆啦。
再等多一陣之後，我收到阿堅個message話佢喺天水圍有兄弟出左事，佢要走去幫手。雖然我預左啲Mk仔都係咁上下無乜交帶，不過既然佢有免費酒水都既 然唔出黎，我估佢一係就八達通無晒錢出唔到黎，一係就真係兄弟有事。見佢咁有義氣我都無再多問。望住我眼前嘅嘅道友權同Taylor，雖然係人丁單薄左 啲，不過如果佢地都發揮到作用，我相信今晚Judy同Valarie都有排煩。
為免Valarie同Judy對我為佢地精心準備嘅粉腸起戒心，我事先要求左阿油同我夾埋，認呢兩條友仔喺佢咁啱撞到嘅舊識。阿油原本對呢個提議有啲抗拒，不過佢正苦於唔知點同Miki再進一步，所以當我以幫佢追Miki作交換條件時，佢考慮左陣都決定同我達成恊議
到左大約十點鐘，除左臨時甩底嘅大明，阿輝同Kathy之外，其他人都陸續抵達間pub。我對大明竟然缺席今晚呢個飲野局有啲在意，照計佢應該唔會錯過呢 個大好機會埋班阿姐身，究竟對佢黎講有咩事會重要得過擦鞋呢，我諗我之後真係要查探一下。我事先查探過呢間pub喺Valarie 同條洋漢engage之前成日同Judy落黎搵食，佢地喺呢頭附近應該都識唔少人，雖然我都係單純博下陣間佢地會唔會畀熟人，特別係Valarie未婚夫 啲朋友撞到，不過喺星期五放工時間我相信機會都應該幾大下。
阿Kate係第一個到，佢黎果陣雙頰泛著微紅，而且佢仲著住返工果套衫，睇黎佢喺黎之前應該去左同人飲左轉野先。緊隨而至嘅係Judy同Valarie， 而且個Judy好明顯係悉心扮扮過先黎，講真一句佢呢一刻真係可以用明豔照人黎形容，佢身上件白色low cut one piece裙好高貴好襯佢，而且個low cut真係開得幾low下，但佢功妙地用左條chanel頸鏈黎遮一遮，令佢唔會太暴露；喺昏暗燈光映照下，我竟然覺得佢有啲似黎姿，如果唔識佢嘅話應該 都真係會畀佢吸引到，佢行入黎果陣我見啲waiter同waitress都即刻同佢打招呼，呢度果然係佢主場黎。而相反同Judy一齊行入黎嘅 Valarie就一身黑色，而且仲要戴埋帽同太陽眼鏡，好明顯佢係好驚畀人認得出，一路行入黎果陣佢好警戒地環顧四周，我見狀忍唔住串佢：「嘩 Valarie你喺室內都戴超，如果唔識你真係以為你係大明星呀。」不過佢掛住周圍望下有無熟人認到佢，所以無視左我串佢。
之後入黎嘅係Miki同阿油，Miki一身打扮可以用戰鬥格黎形容，大褸入面係貼身小背心再配埋條小熱褲，雖然有小小MK味，不過作為一個青春少艾黎講就 唔算過火，而且平時返工佢著suit都睇唔出佢有得身材。而喺佢後面成隻受驚小動物咁嘅阿油就顯得神情慌張，睇黎呢啲地方真係令佢好唔自在，再加上佢受我 所托陣間要做戲，我都好怕佢到時會穿煲。Daisy係最後一個黎到嘅，佢話因為好少黎中環，搵唔到間pub所以遲左到，雖然佢無悉心打扮過，不過天生麗質 嘅佢就算只係著住返工套衫都唔失禮。
之後入黎嘅係Miki同阿油，Miki一身打扮可以用戰鬥格黎形容，大褸入面係貼身小背心再配埋條小熱褲，雖然有小小MK味，不過作為一個青春少艾黎講就 唔算過火，而且平時返工佢著suit都睇唔出佢有得身材。而喺佢後面成隻受驚小動物咁嘅阿油就顯得神情慌張，睇黎呢啲地方真係令佢好唔自在，再加上佢受我 所托陣間要做戲，我都好怕佢到時會穿煲。Daisy係最後一個黎到嘅，佢話因為好少黎中環，搵唔到間pub所以遲左到，雖然佢無悉心打扮過，不過天生麗質 嘅佢就算只係著住返工套衫都唔失禮。
可能係經過今朝La Sing事件有陰影，Judy見我拎住杯野行埋去表現得有啲驚慌，不過佢都依然要固作鎮定。間酒吧周圍啲客都係啲斯文西裝友同OL，佢地都畀我頭先拍枱果 下吸引住，全部望晒過黎，我專登用全間pub啲人都聽到嘅聲量講：「Judy姐今朝係細佬唔著，而家我就罰自己自隊。」換轉喺太子道呀山林道呀果啲酒吧可 能成日都有人做呢啲野，不過喺中環我呢個行為就相當受注目，隔離果幾枱啲人都忍唔住竊笑，正當我期待住一臉尷尬嘅Judy會點畀反應之時，離我地最遠果張 枱，有個中年西裝友突然之間行埋黎。佢未埋到黎我已經聞到佢成身酒氣，而且佢塊面仲紅過關工，佢應該都飲左唔少酒。佢略帶不忿咁望住Judy話： 「Debby，你覺唔覺得收左我個Miumiu袋之後就避開我，電話都唔覆呢個行為，有小小不近人情呢。」
呢條西裝友唔係我有心安排，我事先都唔知Judy喺呢度真係咁受歡迎，咁樣都可以撞到人，仲畀我知道左佢平時化名Debby出黎呃飲呃食。不過 Debby…呀唔係，係阿Judy 出黎玩左咁多年，呢啲場面都佢黎講都應該司空見慣。佢微笑住同條西裝友講話：「先生，我諗你認錯人啦，我唔係叫Debby，而且都好少收人禮物。」只係就 起身話要行去廁所，西裝友條朋友聞言亦都即刻拉佢返埋自己張枱。Judy就好似完全無畀頭先件事影響咁繼續同Kate傾計，相反頭先咁樣擾攘一返之，我地 受到全場注目之後，Valarie就顯得更加不安。
我身邊嘅Daisy憂心忡忡咁同我講：「估唔到你嘅道歉又畀人打斷左，佢地又會繼續嬲你…」我聞言之後即時收歛我面上嘅邪惡笑容，輕輕咁拍左Daisy放 喺枱上隻手一下，好溫柔咁同佢講：「唔緊要啦，總有一日我會令佢地原諒我。」坐我對面嘅Miki一直無出聲亦都無乜理過佢身邊嘅阿油，佢只係靜靜喺度食花 生，不過我留意到佢一直都好似期望住Judy會出醜，當佢見到Judy受到我同西裝友呢兩下攻擊都神態自若之後，佢表現出小小失望。喺發現場中有個畀 Judy玩過嘅醉酒西裝友之後，我又要即刻重新估緊下個形勢，不過既然都安排左道友權畀阿Judy，我唯有等佢地自己到時即興發揮啦。
阿權同Taylor一收到我指示就行左入黎酒吧，走埋去同阿油相認，阿油即刻嚇到腳都震埋，吞吞吐吐咁。為免佢講多錯多，我喺其他人都未黎得切反應就叫佢 地坐得一齊玩，出奇地Miki竟然即時配合我，佢拉左阿Kate過黎我地果邊坐，之後阿權同阿Taylor就自己迫左喺Valarie同Judy中間。我 心底暗地驚訝Miki點解會咁配合我，正當我望住佢試圖分析佢點解會有咁嘅反應果陣，佢竟然偷偷地對我打左個眼色。我知道應該係阿油漏左口風畀Miki 知，但我最驚訝嘅係Miki點解唔拆穿我，仲反過黎助我一臂之力呢？喺我嘅復仇計劃入面，我一直都無乜對Miki呢個人作過任何計算，睇黎我一直以黎真係 睇小左佢…
Taylor一坐埋Valarie隔黎就發動攻勢，Valarie仲未黎得切反應之際，Taylor已經捉住佢隻手咁同佢講：「小姐，你唔好以為你幅太陽 眼鏡可以遮到你個靚樣，我叫Taylor，我有預感今晚我地會過得好愉快。」我留意到Taylor捉左Valarie隻手呢個動作絕對唔係想抽水咁簡單， 佢其實係想Valarie留意到佢戴住果隻新款Panerai同佢粒Montblanc Classic袖口鈕，Taylor作為一個呃蝦條大師，用成身名牌黎吸引住港女呢啲初級技倆佢當然運用得相當成熟。其實我一向知道Valarie對啲口 甜舌滑嘅小白臉特別無抵抗力，佢上一段婚姻都係畀個食軟飯牛郎型契弟界入而失敗告終，可憐佢個醫生前夫畀佢拋棄之後就遁入左空門。
另一邊廂阿權坐低左之後，除左望Judy望到流晒口水之外，佢連野都唔曉講句。除佢望住Judy嘅熾熱眼神當中，我睇得出佢應該扯緊旗。如果唔係睇左佢執 過下都算一名見得人嘅高大猛男份上，我諗Judy一早已經坐開左。喺dead air坐一兩分鐘之後，阿權突然單腳跪底，開始對住Judy唱歌，仲要越唱越大聲，不過出奇地佢真係唱得幾好聽幾有感染力。Judy即刻上前拉阿權起身問 佢做乜，點知阿權好誠懇咁同佢講：「頭先首歌係我因為見到你即場作架，Judy，You are my muse…」Judy雖然有啲尷尬，但阿權誠懇嘅態度應該令佢有小小驚喜。本身同緊阿Kate Daisy傾計嘅Miki開始敷衍應對仍地，佢嘅專意力轉 向左去Judy度，睇黎想Judy出醜嘅唔只我一個。
無幾耐阿Kate收到個神秘電話之後就急急腳走左，剩返我地四男四女喺度。本身高度戒備住嘅Valarie同Taylor越講越興起，而Taylor亦令 到Valarie喺自己都唔為意嘅情況下飲左好多酒，面都紅埋嘅Valarie開始同Taylor越坐越埋，而且仲有啲身體接觸。相反Judy同阿權都仲 係無乜進展，阿權都仲係成碌木咁坐喺度望住Judy，而Judy喺頭先果一剎那驚喜之後開始對阿權失去興趣，開始自顧自咁玩電話。正當Judy同阿權陷於 膠著狀態之際，Miki突然坐埋去阿權隔離，好熱情咁捉住阿權去飲酒同玩，阿油見狀向我投以求救目光，我我一邊做口形叫佢睇定啲先，一邊留意住Judy有 咩反應。
果然Judy呢種女人嘅妒忌心好快就畀Miki撻著左，就算佢對阿權無興趣，佢都唔會容許阿權喺佢面前同其他女人依泣，特別係Miki。Miki後生當打 有樣有身材，仲有大把青春，Judy就人到三十幾而且仲未有著落，Miki正正係佢最大嘅敵人。我呢個時間當然亦都要加把勁去撥火，我即時行去Judy隔 離，之後喺佢耳邊咁話：「點解你明明換左衫，我都仲係聞到浸咸魚味嘅，嘩Judy你唔係未死已經開始發臭呀下。」喺Miki嘅挑釁，再加上畀我奚落之 下，Judy好心急要搵返自信心，即刻捉住阿權起身話出去跳舞。Miki見自己功成之後，就行返埋去阿油果邊，佢仲再次偷偷地同我打個眼色，果一刻我知道 呢個Miki會係我今晚最大嘅助力，但同時亦係我未來嘅最大威脅。
喺個小舞池果邊Judy拉住成碌木咁嘅阿權越跳越貼，Miki可能為左補償阿油亦都拉左佢去跳舞。正當我猶豫緊我應該留喺度觀察Valarie定跟埋去監 視住Judy好，Daisy突然問我可唔可以揀杯cocktail畀佢飲，因為佢唔太識有咩cocktail，佢唔想飲黎飲去都係snowball。 Daisy真係pure好true呀，我決定都係留喺度陪阿Daisy一陣同佢揀下野飲傾下計算。可惜好事多磨，我見到西裝友啲朋友已經走晒，得返佢自己 一個行左出去食煙，我靈機一觸，同Daisy托詞話行出去買雪糕界佢食，之後就行出去撩阿西裝友講野。
我以問西裝友借火黎打開話題，可能飲大左佢都表現得相當健談，佢一黎就問我同Debby有咩關係，我答佢我係Debby啲朋友，佢聽到之後開始向我大數 Judy：「呢條女真係gold digger黎架，同我出左幾次街次次都食我嘅買野又係我嘅，每次食完飯都帶我去連卡佛話想要乜想要物，我撩佢之後開房佢就例牌say no，呢排仲要唔回我電話…」我聞言之後除左附和佢，仲不斷撥火：「雖然Debby係我朋友，不過我都幫佢唔落呀，你都唔係第一個男人畀佢當係水魚同慒撚 架啦…」喺講水魚同慒撚呢兩個字嘅時候，我專登加強左語氣黎撥火，可能係喺酒精附助，再加上佢望返去舞池見到Judy同阿權越跳越親熱，我眼前呢位西裝友 好快就畀怒火同妒意佔據，佢無再理我就氣沖沖咁走埋去Judy果邊。呢個時候我為左做足全套，我無理佢就行左去七仔買雪糕。過左六至七分鐘之後，我行返間 pub度，未入去我已經見到Daisy帶住驚惶嘅眼神向我求救，佢見到我果陣即刻拉住我叫我入去勸交，我再望返入間pub，我見到西裝友同阿權已經劍拔弩 張，而Judy就一臉無助咁企左喺阿權後面。
Daisy好似想上前拉阿Judy返埋黎，不過畀我同Miki一齊阻止左；Valarie可能已經飲到有啲神智不清，不過佢殘留嘅意識仲提醒佢唔可以畀熟 人見到，佢都無上期幫手，反而話要走，醒目嘅Taylor借機話同Valarie走先，Valarie應該神志真係好唔清醒，佢又真係唔理我地跟左 Taylor走人。我呢個時候亦叫阿油快啲帶Miki同Daisy走人，呢度留返畀我處理啦，Miki聞言之後有啲不忿，我估佢一定好想留喺度睇戲，不過 佢好快就回復返佢平時嘅形象，扮返小鳥依人咁跟住阿油走，Daisy要求留喺度不過被我拒絕左，怕事嘅阿油聽到我指令之後就出左去截的士帶兩條女走。 Daisy臨走果陣叮囑我小心啲，我果一刻雖然想留住佢，不過接著落黎我唔可以畀佢分神。
正當所有人都走晒之後，我先慢條斯理咁走埋去拉開阿權。同時間pub入面幾個彪形大漢賓佬waiter都拉走左西裝友，隔離嘅Judy仲驚魂未定一臉茫 然，我放低左錢埋單之後就帶走左Judy同阿權。Judy出到去見得返我留喺度，佢都唔理我係佢仇人，走埋黎同我求救：「阿油呢個friend都傻傻地 架，頭先本身都無事，係佢自己激動咋嘛，你可唔可以幫我撇甩埋佢呀。」我聞言之後一臉認真咁同Judy講：「話晒人地頭先都叫挺身維護你呀，你咁樣好似唔 係咁好喎，咁啦，你起碼都畀自己個電話佢等佢之後可以搵你，再畀多幾舊水人坐的士走呀。」Judy之後行埋去畀左個電話號碼阿權(九成係假)，然後拎左啲 錢叫阿權坐車走，佢臨走仲好交戲咁叫阿權聽日記住打畀佢，呢個女人真係虛偽到我想嘔。不過我又巧妙地慳返幾百蚊車馬費，正當Judy以為咁樣就甩左阿權呢 個情緒化音樂家身，我當然唔會畀佢就咁完啦，放心啦阿權，你仲有大把機會見Judy呀！
送左阿權上車之後，Judy即刻打畀Valarie但無人聽電話，之後佢再打畀Miki，原來佢地最後都無走到，去左附近一間老麥等我地。喺我同Judy 行去間老麥會合佢途中，Judy問我：「喺多謝你之前，我想知點解會係你留喺度？」我聽到呢個問題都真係諗左一諗，因為今晚嘅情況完全唔係喺我意料之內， 我都係見步行步。諗左一諗之後，我決定答佢：「我同你雖然係有心病，又成日鬥氣，不過你係女人，我唔會要你自己一個人去面對頭先果個情況嘅，你有咩事我都 唔安樂。至於其他同事佢地唔係對你見死不救，係因為我擔心其他女同事嘅安全，所以要佢地走先，留返我自己喺度處理件事。」佢聽到之後有啲驚訝，不過好快佢 講左句唔該晒就無出聲。呢番說話其實真係假到我自己聽返都想笑，不過驚魂未定嘅Judy聽到就幾受落。喺會合左Miki果陣，Miki即刻七情上面咁撲上 前攬住Judy，之後仲好浮誇咁講句：「頭先嚇死我呀Judy，你有咩事我都唔知點算呀。」喺身邊嘅阿油亦都即時附和Miki：「係呀Judy姐，頭先好 彩有阿James咋。」Daisy亦行埋我身邊拉一拉我手袖，扁住咀咁細聲講：「邊有人買雪糕畀人買地得咁耐架，我啲雪糕呢？」嘩，我真係差啲畀呢一下嗲 到暈低呀
我地五個人就順手坐左喺老麥度食宵夜，正當我諗緊好唔好開口問阿Kate佢攞返今晚條數果陣，Judy突然之間同我地講：「可能你地會唔信，不過我真係唔 識頭先果個西裝友，佢真係飲大左認錯人…」我心諗你唔洗同我地黎呢一套啦，不過Miki未等Judy講完已經捉住左Judy雙手，好誠懇咁講：「Judy 姐我明架，靚女成日都好易被人誤會花心架啦，特別係你呢啲未婚靚女，啲人覺得你而家都未結婚係好揀擇呀嘛，其他人唔明白你姐，我知道Judy姐你一向都係 又獨立又叻，如果我到三十歲果陣仲好似你咁又靚又叻就好啦。」嘩高手，Miki呢段野真係一啖沙糖一啖屎，都唔知係捧緊定串緊阿Judy，連Judy都只 係尷尬咁笑完全唔識畀反應。
Miki講完呢番說話之後就到同我講：「James哥，對唔住之後係我誤會左你，你份人雖然九唔搭八，講野又唔經大腦。但經過頭先件事，我發現你原來都衰 唔晒。如果我係Judy姐，我一定會對你以身相許呀哈哈。呀不過唔知Daisy又批唔批准呢。」Daisy聽到即刻面都紅晒咁話：「以身相許關我咩事 喎。」不過我都無暇去欣賞Daisy嘅羞態，Miki頭先番說話雖然好似係潤我咁又好似讚我咁，但其實真正重點係最後一句，佢係向我示威，話畀我知我同 Daisy啲野暪唔到佢。
突然之間食食下包薯條，Judy醒起佢仲未打到畀阿Valarie，佢問阿油攞Taylor個電話，阿油緊係畀佢問到口啞啞架啦，正當我以為要穿煲嘅時 候。Miki喺隔離搶住話不如等佢打，之後佢就拎起阿油個電話行左出去扮講電話，正當佢出左去之後佢就拎阿油個電話whatsapp我：「快啲send Taylor個電話黎。」呢個時候我想扮野都唔得，唯有死死地氣send左個電話畀佢，之後Miki再用自己個電話whatsapp我話：「點解反而係你 有阿油中學同學電話架呢，你同阿油又係中學同學黎架呵呵？」仆街，今晚又輸多左次畀Miki。隔左一陣佢行返入黎同Judy講話Taylor話同左 Valarie去食宵夜，Judy聽到有啲不悅咁詐型：「有事起上黎又走先，之後仲要玩到咁開心電話都唔聽，有無搞錯呀。」
走果陣Miki唔理我同阿油，就拉左Daisy同Judy坐的士走人。阿油見唔可以送Miki返屋企，就都好失望咁自己走去坐旺角紅van走人，而我就話 想自己行陣就同佢分別左。我行左去海傍果邊想整理一下我嘅思緒，不過半夜三更有個傻喺度佬望海，警察行過應該會以為我想跳海。
其實我真係有啲失落，除左因為無得送Daisy返屋企而失落之外，我亦都覺得有啲挫敗，喺我嘅復仇計劃開始左之後，Miki係第一個完全令我失算 嘅人，今晚件事嘅推向其實佢似幕後黑手多過我，反而我都係處於一個幾被動嘅地位。我一向都以為Miki只係個fresh grad傻妹豬，連畀阿輝抽水都慒然不知，但諗返轉頭，我一直都係以貌取人，我對佢嘅一切假設都係靠估。黎緊幾日，喺未摸清Miki個底之前，我決定都係 暫時按兵不動靜觀其變。