今日我開始左對公司啲同事進行復仇大計: 第三節

喺星期日晚，我突然收到Daisy嘅whatsapp

 

James：

我今日放工去左搵老細傾，佢話我同你嘅爭執佢唔會過問，佢叫我自己同你解決。我知你呢兩日係有心想整蠱我，我知你應該係嬲我同埋佢地一齊杯葛你。不過我唔明點解咁多人唔整，而剩係針對我一個，可能係因為以前我同你都叫做friend過一排，你覺得係我背叛左你，係咪？

我其實都唔係太嬲你笑我係哈比人，我只係跟住大圍去杯葛你，我希望我地之間可以和解，最多我同你道歉呀！你可唔可以唔好再整我？我呢兩日真係覺得好困擾呀，我集中唔到去做野呀。份工對我好緊要，我啱啱無左男朋友，唔想連工都無埋。我呢排分手已經好大壓力，求下你唔好連喺工作上都畀咁大壓力我啦， 好唔好？希望你畀個機會我地可以和平共處，我最多盡量勸其他人唔好再杯葛你啦...





 

而我回佢

 

Daisy：

其實我都唔想同你搞到咁，你記唔記得你啱啱入黎做果陣，我日日都OT教你野。你有錯我幫你頂畀上司鬧(其實果次明明係我自己錯，不過Daisy慒慒下仲以為係佢累左我 )而我只係笑下你係哈比人咋嘛，仲要唔係想惡意攻擊你，點知你竟然背叛左我，你知唔知我真係好心痛呀Daisy！我知你鍾意食西餅(其實我唔知，不過 係女仔都鍾意食甜品，求其博一鋪)，我專登去買左打西餅返黎。你估我真係想同晒全公司啲人和好呀，我其實剩係想請你食同你和好咋，點知你竟然同其他人一樣，唔食打西餅，搞到我要自己一個人食晒。





不過唔緊要啦，呢噂野都過左去。你都唔洗突然之間喺公司理返我，我唔想連累你。

你平時私下搵下我就可以了，我同你和好啦，大家都係成年人，對唔住呢兩日係我太幼稚。

 

估唔到Daisy咁快就戰敗投降，仲可以畀我成功扮下好人呃下佢。當然佢好可能只係假意想同我和好啦，不過同樣地，佢係我黎緊用黎分化公司其他幾個女同事嘅重要棋子。下一個目標就輪到Judy啦，不過喺對付Judy之前，我知道我應該要拉攏埋文員輝。

 





阿輝呢條咸濕仔份人其實無乜野，係縮骨啲同無主見左啲。喺發生左佢畀人踢爆喺公司上141網之後，我諗佢黎緊都係落得和我同一下場。我預先吩咐左阿油，要佢同阿輝講講係金手指係大明，因為大明覺得阿輝同佢爭女。大明同阿輝平時都成日想喺女同事堆到爭寵，而且今日單野黃左之後大明又不斷對阿輝嗥單打打，所以阿輝應該會信大明先係金手指。

 

我拿拿臨whatsapp左阿輝扮好人，話如果星期一無人同佢食晏，佢可以偷偷地同我食呀。我同阿輝講我唔會要佢難做，我偷偷地幫佢帶埋飯都ok，我唔會揚出去。喺隔左一陣後佢應左我話：「ok...」

 

我見到個省點號即刻扯火，心諗幫你帶埋飯你都應得咁委屈，不過唔緊要，我忍！