今日我開始左對公司啲同事進行復仇大計: 第三十六節
今朝一返到公司樓下，我見到塊面瘀左一撻撻嘅阿油企左喺公司門口等我。佢一見到我就拉左我入後巷(又係後巷)，之後成個身震晒咁同我講：「今次仆街啦，大明咩都知道晒啦，佢黎左找我晦氣呀。佢知係我指使你呀，今次大鑊啦，唔係啦……不如我地先下手為強，搵阿虎殺左佢先好唔好呀。唔係一陣佢調返轉殺左我地先，咁就無仇報啦……咪住先，我上次次明明無出面架，係咪你出賣我？你信唔信我叫阿虎殺左你先再殺大明之後再殺多你一次呀？」面對住語無論次嘅阿油，我忍唔住一巴昇埋去，我之後向佢大喝：「喂你記唔記得我尋日都畀人淋尿呀，更何況你又知大明係因為上次單嘢而打你？佢打你果陣有無講到啲咩先？你唔畀佢因為覺得你樣衰而打你一身架？」阿油聽到我講之後呆左，佢話：「其實……其實我連喺邊個打我都唔知，我果陣畀人笠左麻包袋咩都睇唔到……不過加上尋日Miki話見到襲擊你果個係大明，我就覺得一定係佢打我……」「咁咪係囉，你咩都睇唔到就覺得係大明，你唔畀係我終於頂你唔順，搵個麻包袋笠住你打你一身架？」「咁我又知一定唔會係你，你打人都無力嘅……」我雖然好想即場再向阿油證實我打人唔係無力，不過我都無心情再同佢糾纏，見佢仲未死得我就由佢喺公司樓下發呆，自己上返公司先。 一返到去我見到Valarie向我怒目而視，佢走埋黎話：「你唔好以為尋日撞破左我咩好事，揸住我咩痛腳。我未婚夫唔介意我會舊情人架，不過你唔好再喺返工以外嘅時間連糾纏我，如果唔係我一定唔會對你客氣。」我聽完之後聳一聳肩，做出一個無辜嘅笑容之後就轉身行開。點知Valarie衝上前大力捉住我隻手腎，我擰轉頭果陣佢就用力一巴車埋黎，閃避不及嘅我硬食左佢呢一巴。而由於當時周圍都無人，我想求救都無援，一臉猙獰嘅Valarie惡狠狠咁話：「我而家唔係同你講笑，你想同我鬥痴線我就同你鬥痴線，我同你講阿姐個位我坐硬架，婚我亦都結硬，你再搞搞震我一定唔會畀你好過。」雖然我畀佢嘅氣勢震懾住，嚇到有小小腳軟，不過死剩把口係我份人嘅最大長處，我有啲口震震咁答佢：「喂你打我還打我，不過可唔可以唔好哄到咁埋，一近睇我畀你啲皺紋嚇到好驚呀。仲有呀你大我無用架，我同Taylor果類柒頭皮唔同，唔會驚你架。」Valarie繼續用好似想殺左我嘅語氣同我講：「我知呀，你鍾意阿Daisy呀嘛，你再搞搞震我就連佢我都唔放過呀。」估唔到Valarie癲起上黎果陣會講埋呢啲電視劇反派式嘅威脅說話，不過如果佢真係夠膽搞埋Daisy，我一定唔會放過佢，但我唔可以畀佢覺得我在乎Daisy，我扮晒鎮定咁講：「好呀，你即管搞佢啦，總之我就一定會同你繼續爭阿姐個位，無嘢可以威脅到我架。」講完之後我就行左入廁所用啲涷水敷下畀Valarie打到紅左嘅面…… 我一直喺度諗要對付Valarie，我一個人究竟足唔足夠。我到而家都一直唔知道Miki搞咁多嘢係為左咩，所以我一直都唔敢提出同佢一齊對付Valarie。另一方面Judy雖然畀我揸做痛腳，但如果畀佢知道Valarie比我更加強勢，又難保佢會唔會投靠Valarie去自保。至於其他人就更加無可能幫到我……我一直思索住喺呢一刻究竟有咩人會幫到我呢？而我自己又究竟想邊個坐阿Kate個位呢？我用左成日返工時間去諗呢個問題，可惜都係無答案。另一方面，畀人打左一身嘅阿油喺其他人問起果陣唔敢講真話，佢只係話返工途中喺條長樓梯跌親。但係Evans唔信佢係自己跌親咁簡單，喺lunch果陣，佢叫阿油同我留喺度話要搞清楚件事。到左lunch果陣，公司剩返我地三個喺度。Evans一臉認真咁問我地：「尋日James又被尿淋，今日又到阿油你搞到口腫面腫返黎，究竟你地係咪發生左啲咩事呀？你地係咪有咩難言之忍，如果係唔怕同我講喎，我會諗辦法幫你地。」我聽到之後喺度苦思有咩比較估理嘅籍口可以用黎解釋住先，而喺我沉默諗緊期間，我身邊嘅阿油突然之間發難：「我知啦，一定係你搵人打我嘅，你而家唔洗喺度扮好人啦。你想同我爭Miki呀嘛，你明知佢鍾意我所以你要搵人打死我呀嘛。你估我平時無睇到你啲行為呀，你肯定成日想同Miki上床啦，我同你講Miki係我架，你打死我都無用。」我同Evans都唔識畀反應好似突然失左常嘅阿油。Evans呆左一陣，望住阿油講：「其實你同我之間係咪有咩誤會，我同Miki只係舊朋友黎……」 貌似失常嘅阿油繼續發癲，佢好似痴左線咁指住Evans黎鬧：「如果只係普通朋友，Miki以前點會成日同你阿爸個秘書收風，問你幾時返黎呀？你估我咩都唔知呀，Miki平時send email同喺facebook向你阿爸個秘書收料啲嘢我全部都知道晒。如果唔係有你出現，我同Miki一早結左婚啦。你而家打完我仲要喺度貓哭老鼠……仲有你唔慌唔係驚阿James會同你爭Daisy所以搵人淋佢尿呀，你個人渣想享齊人之福，Daisy Miki都想食晒，我一定會阻止你架。」我忍唔住打斷發緊癲嘅阿油：「收聲啦，你知唔知自己講緊咩呀。你唔好成日將自己幻想啲嘢當係真啦痴線佬。」阿油聽到我咁話佢，即時喊左出黎：「我幫你你仲話我，好呀，一陣你個Daisy畀呢條人渣食左果陣你唔好怨呀。我同你地講，Miki係我架，就算你個人渣殺左我都無用，我死左都唔會畀你掂Miki呀。」雖然阿油一路喊一路歇斯底里咁向我地呼喚，場面係有啲恐怖，不過我都忍唔住問佢：「如果你死左你點樣阻到Evans掂Miki呀？」阿油無理會我嘅問題就沖左出門口，而喺我隔離嘅Evans亦都不知所措咁望向我，我搭一搭佢膊頭同佢講：「唔洗放喺心，阿油呢啲毒男係比較易失控，你習慣左就唔會再care。」講完之後我就行開左，頭先阿油話Miki喺Evans未黎到之前已經成日收風想知佢幾時返，唔通Miki一開始入黎呢間公司嘅目的已經係關Evans事？