今日我開始左對公司啲同事進行復仇大計: 第三十一節

Evans同我好唔同，就算佢幾渴望見Laura都好，不過佢都係想尊重Laura嘅意願，唔想貿然自己走去搵佢。但為左令佢肯跟我直接殺到去搵Miki，我唯有不斷提醒佢如果今次見唔到，可能就無下一次。人類始終都係怕會有遺憾，大部份男人就算點畀個ex決絕地飛左都好，但果種留戀之情通常都係久久不散。喺左思右想之後，尋晚Evans都決定左要親身去見多次Laura，佢都係想試多次先會死心。喺揸車去搵Miki嘅途中，Evans同我講：「其實我呢一刻都無抱住啲咩期望架啦，今晚如果結果都係同之前一樣的話，我就會死心架啦。」我雖然好想答佢聽住先啦柒頭，不過呢一刻我都係唔出聲迎合咁深情嘅Evans。去到之後我同Evans喺Miki樓下等左好耐，期間Evans有試過打畀Miki，但係Miki都係唔肯聽電話。過左一陣我見唔係幾對路，我託詞話想落車去廁所，之後偷偷地打左畀Miki。電話一有人聽之後，我未等Miki出聲就開始講：「嘩棒打鴛鴦呢啲咁陰質嘅事你都做得出嘅，你有無良心架Miki。Evans喺我隔離喊緊啦，你死啦今次，佢實會覺得係你有心阻撓佢同Laura呀，你今次大鑊啦。」Miki聞言之後靜左一陣，佢之後問我：「你地而家喺邊？」「咪就係喺你樓下咋嘛，你屋企樓下我都黎到熟晒啦，我個個星期六日都去你屋企附近度等你，之後幻想自己可以黎一親香澤架……呀sorry記錯左，果個唔係我，係阿油黎。唔好講咁多啦，你拿拿臨帶左Laura落黎先講啦，如果唔係一陣Evans做傻事我都阻佢唔到架。」Miki聽完之後又靜左一陣，佢深呼吸一下先答我：「我問下Laura佢想唔想先啦，你喺度唔好走住等我電話啦。」講完之後佢就收左我線，連byebye都唔講，而家啲後生女真係好無禮貌。

 

喺車上面六神無主嘅Evans，呆呆咁望住部電話等待Miki打返畀佢，由於佢個氣場實在係太負面，所以我都無上返車費事畀佢搞到我都抑鬱埋一份。等左唔係好耐，我就見到Miki帶住一個女仔落黎，果個女仔雖然由上至下都包到實晒，不過離遠都見到佢輪廓好靚而且身形都算好唔錯。佢地未行到埋黎，Evans已經衝左落車行埋去，之後我喺未有機會望清楚Laura個樣之際，Evans已經拉埋左Laura去一邊傾，好快佢地就消失左喺我視線範圍之內。而一臉嚴肅嘅Miki行到埋黎之後，佢唔出聲咁啤住我，連我都畀佢嘅氣勢嚇到有啲腳軟。喺同佢對峙左一陣之後，佢出聲話我：「點解你係都要咁多事，你有無諗過後果架。」「你大我呀？我就唔信你可以對我做到啲咩，你估派個Taylor黎就嚇到我呀，你越阻止我我就越要做。」「咩Taylor？我都唔知你講咩。我講嘅後果唔係講緊你，我係講Evans。佢都算係你朋友呀，你有無諗過佢見完Laura之後，其實都係傷多次心架咋。」佢無回應到關於Taylor果筆，我唔知係佢聽唔到定係故弄玄虛，不過從佢嘅語氣我覺得佢係真心關心Evans，呢樣唔似係做出黎。佢講完之後就無再出聲，只係略顯焦躁地等Evans同Laura返黎。唔知點解每次見到Miki露出啲咁認真嘅表情，我就有啲扯火。我故意問Miki：「其實你係咪鍾意Evans姐，我唔介意一妻多夫架喎，你個心唔係得我一個都唔緊要架。你咁落力阻止Evans見Laura係咪好怕佢地復合呢？呢啲嘢阻唔到架喎，其實我都明嘅，終於等到Evans係單身諗住終於有機，點知又殺出個Laura出黎係慘啲架啦，我係你都扯火啦。不過唔緊要，我等得諗啲我黎慰藉返你啦，你即管將心入面埋藏已久果團火發洩喺我肉體上面啦。」Miki聽到之後只係冷冷地答左句：「你根本咩都唔明，唔好扮到好了解我咁啦。」過左唔係好耐，Miki收到一個電話之後就唔理我走左去，而好快雙眼通紅嘅Evans就返到黎，佢咩都無同我講就上左車車我返屋企。一直成程車Evans都無同我講任何嘢，佢只係不停咁Loop住播Elvis Costello版嘅I’m a fool to want you，我雖然好想叫佢轉歌，不過見佢咁嘅樣我都唔好意思提出呢個要求。一直到車到我返屋企Evans都無出過半句聲，我落車果陣佢剩係同我講左句多謝就絕塵而去，睇黎頭先佢同Laura嘅會面都唔慌好得去邊。

 

到今日返到公司之後，Evans好似無嘢咁喺我面前出現，佢同我講：「我會放低Laura架啦，我會努力去搵下一個更好嘅，你唔洗擔心我啦。」見佢情緒轉得咁快，我都唯有拍一拍佢膊頭以示鼓勵。本身我尋晚見到Evans咁其實都有啲內疚，不過見佢而家好似無事咁我都放心返啲。但好快我嘅好心情就被另一個消息破壞左，Sam姐喺下晏打左一個電話畀我。大意係本身講左唔想爭Kate姐個位嘅Valarie，尋日突然主動去搵佢話都係覺得自己係最勝任，要求公司將佢列返入考慮之列。Valarie嘅突然再戰宣言，同Taylor尋日嘅突然出現，睇黎唔係巧合咁簡單……