[穿越][愛情][校園]重回青春時尋找當年失去的愛情: 毒L要參加歌唱比賽？

往後的幾個月我都和小彤為公開試作最後準備，我們也很少逛街約會，即便兩個人獨處也是在圖書館溫習。

今天是11月25日，我和小彤放學準備離開學校時卻在學校的公告欄上看到關於聖誕歌唱比賽的單張。

「全校造sing比賽，歡迎所有學生、老師報名參加獨唱組或者合唱組，比賽將於聖誕假期前的最後一天進行。」

「小宇不如我哋都報名參加合唱組啦，應該幾好玩。」小彤拉著我的手興奮地說。

「吓，但係我唔識唱歌㗎喎，我驚到時會被人笑同埋拖累你呀。」我苦笑著跟小彤說。





「唔使驚啦，我會教你㗎嘛，你應承我啦好唔好？」小彤露出少有撒嬌的神態。

「好啦。」我最終只能在小彤的撒嬌攻勢下屈服。

「但係彤彤你識唱歌嘅咩？」我現在才想起小彤說要教我唱歌一事。

「哼我小學嗰陣係合唱團嚟㗎，你唔好睇唔起我！」小彤裝作生氣地斥責我。

「好啦，咁靠晒你㗎啦，不過我哋幾時練習下？呢排又要做好多mock卷，都唔知有冇時間。」





「嗯，我諗我哋一個禮拜練一次都可以嘅，我自己都諗住報名參加獨唱。」

———

我滿心歡喜地找阿俊打算和他一起在歌唱比賽報名合唱，卻遇見那個我恨之入骨的人早已捷足先登，還一副幸福的樣子和阿俊一起。

「哼！既然阿俊唔知我好，咁我唯有喺歌唱比賽親手擊敗楊小彤，證明我先係佢身邊最好嘅一個女人。」

我心中暗暗下定決心要報名參加女子獨唱和合唱組別，並拿起手機打給Michael 。





「喂Michael ，我諗住搵你同我係聖誕唱歌比賽到一齊合唱，你應該得㗎啦？」

「Er⋯⋯我⋯⋯」

「喂？你唔好又er又盛啦！究竟得定唔得？唔得我就搵第二個人㗎啦！」我不耐煩地準備掛斷電話。

「得！咩唔得呀。」Michael答應了我。

「咁你聽日去報名啦。」

———

第二天，我和小彤就向負責舉辦活動的學生會報名。

「喂，阿俊你又參加咩？」有人拍拍我的肩膀。





「Michael ? 係呀，我同小彤一齊參加呀嘛，你呢？你鍾意唱歌嘅咩？」

「我⋯⋯阿晴搵我同佢一齊唱呀嘛，咁我緊係義不容辭㗎啦。」

「阿晴搵你唱？佢冇同我講佢都有參加嘅。」

「唔知呀，唔講啦我要去上堂。」Michael 說完後就急步地走回自己班的課室。

「硬係覺得有啲怪怪地咁嘅。」我覺得有點古怪，不過阿晴有自己的朋友也是一件好事。

接下來的幾個週末，我都和小彤在她家中一起練習。

我們參賽的合唱歌是《其實你心裡有沒有我》，這是近十多年唱卡啦ok必唱的一首合唱歌。





由於我真的很少唱歌，所以我一開始就跟不上音調

「若愛⋯⋯」我只唱了頭兩個字就走了音。

「唔係呀小宇，你聽一次點唱先，之後再跟住我一齊唱。」小彤忍著笑地教我。

最後我不斷地一邊聽著原唱版一邊跟小彤練習，亦開始慢慢掌握到歌曲的節奏。

「好啦！我好有信心我哋今次一定可以攞到合唱組嘅冠軍。」

今天是歌唱比賽前的一星期，也是我和小彤的最後一次練習。

「我驚我到時好緊張，不如我哋都係退出啦。」我一想到台下有無數人看著我唱歌，心臟就噗通噗通地跳來跳去。

「點可以㗎？我哋都練左咁耐，點可以半途而廢？放心啦，只要盡力就得，唔需要理其他人點睇，況且有我喺你身邊呀嘛！」小彤挽著我的手臂跟我說，並把頭輕輕放在我的肩膀。





「嗯！」我也不好意思再說下去，只好期望那天不要有任何意外。


「哈！哈！哈！點解條友唱得咁難聽都上去唱㗎？佢係咪唔知醜字點寫？哈哈。」

「佢邊個嚟㗎？憑咩同校花一齊唱歌？仲要唱得咁難聽。」

台下的同學大部分在恥笑著我，有些同學卻低頭議論著。

我隨即拉著小彤逃離了舞台，可是耳邊的笑聲絲毫沒有停止。

「啊！」我睜開眼睛發現我在家中的房間，再拿手機一看。

「12月20日，03:00。」





「原來只係發夢姐，嚇死我。」我躺回床上，卻翻來翻去也睡不著。

「如果天使彤喺度就好，話時話都好耐冇見過佢。」我腦海中浮現出她差不多每次在我遇到困難時就會出現的身影。