[穿越][愛情][校園]重回青春時尋找當年失去的愛情: 選科的抉擇

「阿仔今晚⋯⋯」一進來的那個人向我說。

「咦，阿媽你今日早咗返嚟嘅？」進來的人正是我的媽媽。

「係啊，做晒啲嘢咪早咗返嚟，阿仔呢個咁靚嘅女仔係邊個嚟？你女朋友仔？」阿媽看著我和小彤奸笑著。

小彤聽到之後紅著臉默默地低頭，不敢說一句話。

「阿媽呀，唔好亂講嘢啦，呢個係我嘅同班同學楊小彤。」我指着小彤向阿媽解釋。





「Auntie，你好，你叫我小彤得㗎啦。」小彤重新抬起頭輕聲細語說。

「小彤啊，不如今晚留低食埋飯先走？」阿媽邀請小彤留下來吃一頓飯。

「唔好意思呀Auntie，好夜啦，我屋企人會擔心，下次有機會我哋先一齊食飯。」小彤婉轉地拒絕。

「阿媽我送小彤落樓。」我替小彤背著書包說。

「好啊，你哋兩個小心啲。」





在送別小彤的過程中小彤臉上露出一副欲言又止的樣子。

「小彤你係咪有嘢想問我？」

「唔係啊，只係我發現原來你同你阿媽嘅感情都幾好。」小彤有點感慨。

「你同你屋企人感情唔好咩？做咩咁問？」上次我到小彤的家明明看到她們一家人相處都頗為融洽。

「唉⋯⋯一言難盡。」小彤好像想起一些不開心的事。





我不敢問發生了什麼事，我怕再問只會令到小彤不開心。

「你送到嚟呢度得啦，快啲上返去啦。」我陪小彤一直走到附近的公園，她卻推着我走。

「咁你小心啲啦。」我把書包還給小彤。

「得啦，當人細路女。」小彤輕輕敲我的頭。

我一返到家中之後，阿媽卻拉著我坐在梳化上說話。

「阿仔你係咪鍾意小彤啊？」阿媽彷彿看穿了我的心事。

「係啊⋯⋯唔係，阿媽你點知㗎？」

「你係我生嘅，我點會唔知你諗咩，我睇得出小彤好似對你都有啲意思，你要好好珍惜佢啦。」阿媽拍拍我的肩膀。





「阿媽你唔反對我而家拍拖咩？」

「點會呢？而家時代都唔同左，最緊要唔好影響你讀書就得啦，想當年我同你老豆⋯⋯」阿媽看著遠方好像想起了當年的往事。

事實上，我當年上學時只顧讀書和留意小彤，甚少和父母說話，只有吃飯的時候先會談上一兩句，長大之後更加很少回家探望父母，每逢大時大節才會回家一次，多數都只顧工作，想不到阿媽在我讀書時已經有關心同理解我，但我長大後卻忽略了父母，想到此處，我也不禁流下了男兒淚。

「阿仔你做咩喊啊？」阿媽看到我突然流淚匆忙遞紙巾給我擦下。

「冇事。」我用手擦下眼淚。

我暗中一定決心這次穿越回來不單止要追回小彤，也要好好陪伴父母。

翌日早上，回到學校我就看見紅光滿面的小彤正在跟阿欣聊得很投入。





「Alan你返嚟啦？」當我剛坐下我的位置時，我卻聽到坐在我附近的黎楓芷說這句話。

我向門口一看，原來Alan回來了，不過他看上來臉色有點蒼白，看來當日所受的傷還未完全復原，他看向我的眼神雖有憤怒之色卻沒有他之前威脅時那樣炯炯有神。

快樂的日子總是短暫的，在中三這段的日子雖然我和小彤還未是男女朋友的關係，每天也會一起放學，相比起未穿越之前我和她的距離已經拉近了不少。

到了中三最後一次大考前的一個月，老師在放學時跟我們班的同學訓話。

「咁多位同學，初中嘅日子好快就完結，即將就要踏入高中嘅階段，大家都要決定好自己將來高中讀咩選修科，希望各位同學可以係嚟緊呢一次大考盡力而為啦。」

李老師說完之後就宣布可以放學了，而我和小彤、阿明和阿欣卻在商量選甚麼科。

「呢個試都幾重要，聽老師講話決定到可唔可以入到自己想讀嗰科嘅班，你哋諗住讀咩科啊？我同阿欣都諗住讀文科。」看來我的穿越也改變了一部分的歷史，歷史中的阿明和阿欣當年是想讀商科的。

「阿俊你想讀咩？」小彤不答阿明的問題卻來問我。





「我就鍾意理科或者IT，不過商科都ok，仲未諗好。」我想起當年的我雖然比較鍾意理科，但是最終為了跟小彤高中同班也去讀商科。

「咁樣啊，不如我哋一齊讀商科啦，咁我哋高中咪可以同一班囉。」小彤向我提議。

「哈，乜小彤你想同阿俊同班未？」阿欣笑著說。

「阿欣你講咩呀？我只不過係諗住高中可以同阿俊繼續做同學，係學習上大家互相幫助姐⋯⋯」小彤長篇大論地解釋。

「你真係咁諗？」阿欣好像知道小彤的秘密一樣。

「阿欣你⋯⋯」小彤跺一跺腳舉起手就追著阿欣。

「救命啊！」阿欣很快就逃離了課室，而小彤也窮追不捨，而我和阿明對視無奈一笑，接着收拾好東西趕快追上去。





然而，在我們離開之後，課室卻有一個人走出來看着我們的背影，嘴角邪邪一笑。