[穿越][愛情][校園]重回青春時尋找當年失去的愛情: 不能成為足球隊的一員？

在陪伴小彤回家的路上，小彤只是默不作聲地向着她家的方向走，我想打開話題但想一想還是給予她一些空間，於是我們在路途上一直沒有談話。

十五分鐘後，我和小彤終於到達了她家附近。

「彤彤咁我走先啦，聽日見啦。」我準備離開這個地方回家。

「小宇，你係度等我一陣，我有啲嘢畀你。」小彤突然開口說話叮囑我留在這裡等她後就急步離開了。

「彤彤究竟想畀乜嘢我呢？」我思考了一會兒也猜不透。



沒多久之後，我看見小彤手上拿着一樽跌打酒。

「小宇你今日比Alan打傷左，你可以攞呢樽跌打酒返屋企自己搽下。」小彤將她手上的跌打酒遞給我。

「唔使啦，我陣間自己去藥房買咪得囉，呢樽留返你自己整親個陣自己用啦。」我不想麻煩小彤，將手上的跌打酒給回小彤。

「我話畀你就畀你啦，咁你要唔要啊？唔要我就揼咗佢。」小彤氣憤地走向附近的垃圾桶。

「得啦，唔好嬲啦，我要。」我從她手上搶走那樽跌打酒。



「比返我。」

小彤想伸手搶回跌打酒，我舉高跌打酒讓她搶不到，令到她整個身體差不多俯臥在我的身體上，姿勢在外人看來親密無間。

小彤搶了一陣子發現她的姿勢與我異常親密，就不再搶了，臉紅地拍一拍衣服站在原地。

「彤彤，不如你幫我係面度搽下。」為了緩解尷尬的氣氛，我向小彤提出了這個要求。

「好呀，你合埋眼先，費事啲藥油整到你隻眼。」小彤眼珠一轉，不知道在想甚麼壞主意。



我將跌打酒交到小彤手上。並合上眼睛。

豈料我的臉上突然傳來一陣很大的痛楚，痛得我立即掙開眼睛。

「哎呀，你做咩咁大力啊？想攞我命咩。」我揉一揉臉上的痛處試圖舒緩痛楚。

「哼鬼叫你哈我。」小彤抱著手臂生氣地說。

「我幾時有哈你？」

「哼我話有就有。」小彤指著我說。

「你都唔講道理嘅！」

「係啊，我就係咁唔講道理，唔同你講啦，我返屋企。」小彤氣憤地走回她的家。



「彤彤啊，我報名咗參加足球隊，後日應該就係第一次練習，你到時過嚟睇我練波好唔好？」我在小彤入屋前記起這件事。

小彤的腳步明顯停頓下來，但卻沒有回應我，很快就關上大門了。

「彤彤真係嬲咗我？佢究竟有冇聽到呢？算啦唔理住，返屋企搽下先。」我拿著手中的跌打酒就離開回家了。

翌日，我回到學校經過教員室時就遇到了學校足球隊的負責老師。

「咦你咪係劉老師？早晨啊！」我恭敬地說着。

「同學仔早晨，你搵我咩事啊？」劉老師詢問我。

「你好，我叫張俊宇，阿sir可以叫我阿俊，我琴日交左份form，希望可以加入學校嘅足球隊，唔知劉sir你收到未呢？」



「冇喎，我收唔到啊，今朝已經截止咗啲申請。」劉老師疑惑地說着。

「吓，唔係掛，我明明交左㗎。」我心裡奇怪著為什麼那張申請表格會消失了。

「阿俊冇事老師走先啦，下次招人你再報名啦。」劉老師說完就走了。

「究竟點解劉老師會收唔到嘅呢？」我正疑惑著。

「係咪奇怪點解份form冇左？」突然一把聲音在我耳邊傳來。

這把聲音嚇了我一跳，我頓時彈向旁邊，發現原來是Alan在我旁邊。

「係咪你做嘅好事？」我壓著心中的怒氣質問Alan

「係我又點，我琴日趁你走左之後撕爛左份野。」Alan得意洋洋說。



「你點解要咁做？」我恨不得將Alan碎屍萬段。

「咁你要問下你自己入足球隊有咩目的。」

「你⋯⋯」我伸出腳想踢向他的胸口

「周圍有老師喺度，你夠膽咪踢囉。」Alan毫不阻擋。

我看一看周圍有老師在走來走去，想起上次我已經被記了一次大過，今次再生事可能要被學校勒令退學。

「唔同你講住，去上堂。」Alan吹着口哨走了。

「究竟有咩辦法可以入足球隊呢？」我心懷怨恨地看著Alan的背影，同時亦想著有甚麼辦法可以成為足球隊的成員。