[穿越][愛情][校園]重回青春時尋找當年失去的愛情: 班會活動（中）

「啊，我諗到啦一於就係東灣嗰沙灘度玩啲集體遊戲，跟住再畀時間大家自由活動，我諗班上面啲同學應該會覺得幾好嘅。」我在床上閉着眼睛驟然想到。

第二天早上，我回到學校，就看見小彤已經坐在座位上，她一看見我就轉頭假裝不在意我。

「喂，彤彤，做咩唔理我？」我搖着她的手臂

「仲嬲緊呀你？唔好嬲啦，我諗到我哋班會活動玩咩啦。」我看見她的反應不禁失笑，但也哄住她。

「講黎聽下我再決定原唔原諒你啦。」小彤終於肯理會我。
​




「係咁嘅⋯⋯」我就講下我昨天想到的主意。

「幾好嘅，雖然冇咩新意，不過好過完全冇諗過，你諗住係沙灘個度玩咩？」小彤聽完後看來尚算覺得滿意。

「我諗住玩下閃避球、數字球個啲，黎黎去去都係嗰啲。」

「嗯，希望陣間放學開班會個陣啲同學會覺得ok啦。」

「我仲有一樣殺手鐧。」我保持神秘感。





「係咩?」小彤好奇地問。

「陣間放學你咪知囉。」我奸笑着。

「車好巴閉咩，都唔知係咪諗埋啲衰野。」小彤有點不屑。

放學之後，我們一班同學都留在課室裡開班會。

「好啦，阿俊、小彤，你哋兩個講下班會活動諗住點搞啦。」李老師說。





「我哋決定班會活動帶同學去長洲玩，因為嗰度好多好嘢食，風景又靚，大家考完試又可以放鬆一下。」小彤說。

「我反對。」黎楓芷一聽到小彤說去長洲就舉手反對。

「係囉，長洲有咩好玩?不如去其他地方仲好啦。」上次跟黎楓芷一起競選班長的阿軒也隨着附和。

於是我使出我的殺手鐧。

「不過我聽聞長洲都開左幾間賣電子零件同動漫野既鋪頭。」

「係咩，咁去長洲啦，又有得玩又有野食。」班上大多的男同學隨即支持我和小彤。

「咁投票囉，總之我就唔去長洲。」黎楓芷不服。

「好呀。」小彤也不服輸。





可惜因為黎楓芷向來較高傲和自大，所以有部分女同學並不特別喜歡她，加上小彤在這一年與班上的部分女同學基本已經混熟了，所以這次投票小彤和我也有信心。

最終22對8，我和小彤得到較多人的支持。

黎楓芷雖然心有不甘，也逼於無奈接受投票結果。

「咁我哋係長洲有咩做？」班上有同學問。

「我就諗左啲遊戲準備係東灣沙灘嗰邊玩，跟住大家就自由活動，6點鐘喺返碼頭集合搭船返中環。」我補充。

「嘻嘻，咁我就可以趁住自由活動既時間可以同彤彤二人世界啦。」我心中不禁慶幸班上同學給予我這個機會。

「幾好呀，阿俊做到野。」「果然阿嫂係度，阿俊成個人變曬唔再毒啦。」班上的同學又趁機嘲笑我。





小彤聽到這句又臉紅耳赤，手中也擰着我腰間的軟肉。

「好啦，既然咁多同學都咁諗，咁老師就無意見啦，不過你哋記住返去俾家長簽返通告，如果冇簽到嘅話，嗰日就冇得去架啦，好啦大家可以放學啦。」李老師看到這樣的情景急忙轉移話題並派發通告給我們。

「喂、小彤、阿俊。」在我和小彤收拾完東西準備回家時，阿明和阿欣叫着我們。

「小彤，你哋自由活動既時候有無諗住做咩。」

「我哋仲未諗到做咩好？」小彤若有所思說。

「咁呀，不如我哋一齊去睇張保仔洞，聽人講嗰度有寶藏，不如去睇下有冇寶藏呀？」阿欣有點興奮提議。

「張保仔洞？好似幾得意咁，阿俊不如我哋又去睇下？」小彤聽到後，好奇心蠢蠢欲動，看着我希望我可以答應。

「吓⋯⋯」我不知如何是好。





「但係咁咪冇得同彤彤二人世界囉，不過彤彤又好似好想去咁。」我心想。

「阿俊你係咪想同小彤二人世界呀？你咪講出嚟囉我哋唔會笑你㗎。」阿明看到我猶豫不決嘲笑我。

小彤即時有點不好意思，低着頭不敢再看着我。

「好啦，咁我哋跟你哋一齊去啦。」我決定跟隨小彤的喜好去行事。

「嗯。」小彤聽到我的決定雖沒有太大的反對，但語氣中卻好像有一點失落。

「彤彤唔係想去張保仔洞嘅咩？」我心中正奇怪着。

小彤和我之後一起離開了學校。





「咁嗰日朝頭早我哋一齊食早餐，跟住再搭車去碼頭啦。」小彤提議。

「好。」

「咁我返屋企先啦，拜拜。」小彤向我揮手。

「拜拜。」