[穿越][愛情][校園]重回青春時尋找當年失去的愛情: 第一次一起看電影（上）
我們在開學第二天的那間茶餐廳吃完飯之後，穿着校服的我們就去到附近商場的電影院看看有什麼電影上映。
「阿俊，我想睇嗰套戲，《愛情不一定是甜的》。」小彤指着電影院的電視正在播出的一齣電影預告片。
一看到那齣電影的預告片，我的心靈就猶如被重擊了一下，亦令我想起中二大考完結後也有和小彤去看電影的往事。
------
「阿俊，大考完左之後不如一齊去睇套戲。」當年的小彤是主動約我看電影，而且和我反而沒有現在般熟稔。
「好呀，小彤我哋去睇咩戲？」當年的我問。
「去到戲院再講。」小彤好像一早已經決定好看什麼電影，選擇保持神秘感不說給我聽。
「阿俊，我想睇嗰套戲，《愛情不一定是甜的》。」到了戲院之後，小彤指著電影院掛着的一張男女互相在海邊相擁的海報。
當年的我卻不懂少女心事，不識趣地想看另一齣電影《諾曼第戰役》。
「小彤，我想睇呢套戲，打打殺殺、槍林彈雨，一定好好睇。」我指着另一齣電影《諾曼第戰役》的海報說道。
「吓，但係阿俊我想睇愛情片。」小彤有點失落說。
「但係我覺得愛情片好悶，戰爭片先夠刺激。」我不識時務興奮地說着。
「咁樣呀，好啦既然阿俊你鐘意睇戰爭片，咁就睇《諾曼第戰役》啦。」小彤雖然失望但也選擇遷就我。
「唔該兩張《諾曼第戰役》既戲飛。」我滿懷期待地說。
「唔好意思呀，《諾曼第戰役》嘅戲飛賣淨嗰啲都係唔連位，咁你哋仲要唔要買？」電影院買票職員說。
「要，點解唔要呀，小彤呀，不如我哋分開坐睇算，反正分開睇都係冇咩分別。」我說。
「吓，算啦，冇所謂。」小彤好像有點不開心。
「咁要兩張飛啊，唔該。」當時的我卻毫無察覺。
大約兩個小時後......
「哇，真係爽，成套戲都冇乜悶場，小彤你覺得點？」我滿足地問小彤。
「係咩？好似真係幾好睇。」小彤一邊看電話一邊敷衍地答着我。
「小彤，你唔開心呀？」我看到小彤的反應冷淡，急忙問道。
「唔係，阿俊你可唔可以應承我一樣野？」小彤突然看着我的眼睛認真問道。
「乜野啊？」我問。
「阿俊你下次可唔可以陪我睇愛情片？」小彤滿心期待地問我。
「咁呀，嗯⋯⋯好啦。」我答應小彤。
「係咪架？唔準冇口齒架，勾手指尾啦。」小彤終於露出笑容並伸出尾指，這是我看到她來到電影院之後第一次有笑容。
「好啦。」我也伸出尾指勾着他的尾指。
------
可惜的是當年的我之後也沒有兌現承諾跟小彤一起看愛情片。
「喂阿俊你做咩呆晒咁㗎，就快開場啦。」小彤在我眼前揮舞着雙手。
我下定決心這一次一定不能再讓小彤失望。
「阿俊你諗好睇咩戲未？」小彤問。
「聽你講，我哋去睇《愛情不一定是甜的》。」我向小彤微笑着說。
「真係架？多謝你啊，阿俊。」小彤拉着我的雙手說。
小彤之後可能意識到這個動作有點親密，於是面紅耳赤地放開我雙手。
「唔該兩張《愛情不一定是甜的》戲飛。」我向電影院買票職員說。
「唔好意思呢套戲嘅戲飛已經賣晒啦，而家淨係剩返《諾曼第戰役》同埋《午夜驚恐實錄》兩套戲仲有戲飛淨，咁你哋仲要唔要？」電影院買票職員說。
「XX。」我心裡想着竟然這一次也看不到愛情片，仲要又有諾曼第戰役套戲係度。
「咁呀，彤彤你覺得點啊？你話睇邊套就睇邊套。」這次我一定要尊重小彤的意見。
「我唔係太鍾意睇戰爭片，咁睇另一套算啦。」我察覺到小彤語氣有一點失落但臉上笑容仍然不減。
「咁好啦兩張午夜驚恐實錄嘅戲飛，要連位嘅。」我說。