【奇珍異獸：愛情飲食系列】: 003 同梵高一樣咁高端嘅聯感嘅Carrie（上）

【003同梵高一樣咁高端嘅聯感嘅Carrie】
＠九龍香格里拉

「我真係好撚失敗。」呢句說話可以話係我今日嘅總結。

當年嘅我，覺得喺呢個年紀，已經覺得開始要認同並且開始要去習慣，那些年追過、追唔到、你得手、你想撇、你想撇但撇唔到或者你想避開嗰啲女仔，全部通通都會比你早結婚。其實，本來又無咩問題嘅。理論上實係咁㗎，作為一個男仔，我好明白我都係要先有自己事業先會諗結婚（事業嘅定義係點，我到而家呢個moment都仍然未想得通透，總之就係永遠有你都仍然覺得唔夠咁囉）。同埋，根本我就係（或者我想自己係啦，事旦啦，你唔好理啦）嗰種無腳嘅雀仔。對結婚嘅想像就好似喺你好撚餓嘅時候，你嘅最後一舊麵包比隔離嗰個肥西食咗，嗰種絕望係你無力fight back嘅，即係完全想像唔到呀。而且，毫無疑問，女仔都鍾意搵個大個自己嘅男仔（老阿姨鍾意小鮮嗰種唔計，at least你唔會無啦啦鍾意老阿姨）。正如無論你25、35或者65，你都係永遠想要個細過你嘅卜卜脆啦。所以，佢地要嫁人先，其實都好正常。

不過，我今日真係覺得自己好撚失敗。今日我喺人哋個story度無意中見到Carrie結婚！嗰一刻我晴天霹靂，本來萬里無雲嘅天空都突然間灰晒機。我有以為我會自殺架，不過緊係無啦。阿媽生得我咁鬼冷靜，失去咗嘅囡囡只係飲Q咗嘅水，我點解要因為咁而咁無知咁變成自己嘅刀下亡魂呀，緊係唔會啦。

你唔好諗多，我咁大反應並唔係因為我仍然對佢有感覺。我咁樣，十成有九成都係因為我覺得自己輸咗俾佢。





從嗰堆落晒filter連僑裝都慳返嘅stories入面，我見到一個我開始唔太認識嘅Carrie嘅婚禮喺九龍香格里拉舉行。我諗住舊事嗰陣，一秒就湧出九龍香格里拉嘅回憶，因為嗰度就係我哋grad din嘅地方。嗰晚根本上係所有人人生第一件懶係隆重並事嘅事，我相信你都曾經係咁。但事後，我同大部分人，或者係全部人都一樣，覺得自己對待件事太認真。而且，有部分人（不過喺呢度無需要再提喇）著得好浮誇好白痴。嗰陣年少又無知，除咗對自己嘅打扮感到滿意，亦都真心覺得過九龍香格里拉係個超爆grand嘅地方。而同所有嘢一樣嘅係，時光遠去嘅後來，包括當時嘅想法，喺現世回想設轉頭都一樣係咁不堪一擊。

講返Carrie，Carrie其實係一個係人都鍾意嘅人。我講清楚啲先，佢係一個覺得全世界嘅人都係鍾意佢嘅一個人，明未？如果你身邊都有一個咁嘅人，你應該知道件事可以好恐怖！而令我最無奈嘅係：我都有出現喺名單上面。簡直令我覺得有種死亡筆記feel。想當年年紀細，唔識驚，但後尾諗返，真係好攞命。攞命係literally攞命，即係剩返兩條路：（a）你想自殺（b）又或者俾佢殺死。