【奇珍異獸：愛情飲食系列】: 001 陪我行咗一次彌敦道嘅Annika（上）

001 陪我行咗一次彌敦道嘅Annika
＠油麻地美都餐室

我今年二十七歲，叫Petar。不過，你可以同大家一樣叫我Peter，唔好咁麻煩。我呢個故事已經六年，但我同好多人一樣將念念不忘當成常態。我嘗試俾個機會自己重溫，算係叫做喺我咁啱又失戀然嘅關頭刮毒療傷。

六年前，我同好多人一樣，鍾意咗一個有男朋友既女仔。我當時心目中嘅呢個女神，叫做Annika。其實我識佢嘅時候就已經知道佢有男朋友，不過，好唔正常嘅係身邊個個都同我講「咪玩野啦，呢個時代仲邊有人分有無男女朋友㗎！」、「佢一日未結婚，佢都仲有得揀。」

其實我唔知我呢啲所謂嘅朋友其實係咪喺度水鳩我，個個異口同聲係咁叫我上。就係嗰句「佢都仲有得揀」，我竟然真係拿拿聲將個勇字放喺心口。表面上，我只係為咗唔好俾我嘅男子氣概白白咁流走，而其實我嘅內心又何況唔係等緊大家（連埋你地）讚同我講返句「上啦，柒頭」。我擁有嘅呢個諗法，只不過係將大家變成我嘅推動力，推動我去做一啲可能並無道德可言的行為（如果呢個世界大部分人係真係真心做緊維護道德嘅行為嘅話……）。

我當時約咗Annika幾次，佢都話唔得閒；不過每次佢都有俾理由，所以我都真心接受。而家諗番，如果再係遇到咁嘅情況，而家嘅我真係唔會繼續落去，但當年又pure又ture嘅我係隻純情小白羊，緊係窮追不捨。嗰陣我係咁約佢，大概第三定唔知第四次，佢終於同我講話放三半。咁大家都估到啦，就算要我走晒成個日嘅堂，我都會鳩衝同女神約會；況且我根本就唔想上五半。係咁既，當年我記得自己係約咗佢睇《西遊 • 降魔篇》，本來我打算揀平時去開嘅電影中心，但Annika一句「我哋去邊度睇架？」鳭到我即刻笠水，我最後答咗朗豪坊，嗰陣嘅我感覺上覺得朗豪坊好似high啲。





完場行出去嗰陣，身邊個個都喺度討論套戲。男嘅不外乎係話喺電影入面搵返好多年無再出現嘅周星星，女嘅就幻想自己身邊會出現一個真實世界搵根本唔會出現喺佢地面前嘅小豬（當年小豬都仲末有醜聞）。Annika一句聲都無出，我唔知講咩好，心諗「仆街啦，係咪揀錯戲」，我弱弱咁問佢係咪覺得套戲唔好睇。Annika 答我：「其實我覺得周星馳好慘。」嗰個moment，我真係有種「女神果然係女神」嘅感覺，我而家諗返佢呢個答案根本係做文青嘅門檻（雖然嗰陣未有呢個term）。佢從呢種已消失嘅周星星散發出由憐生愛嘅表情簡直係世紀級，呢個宇宙無敵的楚楚可憐look有啲紫霞仙子feel，我即時覺得我無揀錯女神。

Annika之後問我去邊度食飯，我本能反應用平時答豬九朋友嗰種語氣答佢「帶你食好野」。Annika答咗句好呀之後就無再講問。之後我哋一邊行一邊講番劇情。我唔知那來嘅自信，忽然覺得Annika似乎都對我有唔多唔小嘅好感。而當時嘅我，甚至覺得佢身上無任何一樣嘢會click中我心入裡最討厭嗰種港女（港女都有好多種，我之後再詳談）。從朗豪坊地面最多人嗰個出口行出黎，即係好多人但係唔係正門嗰度門開始行，我哋兩個喺彌敦道嘅一邊行到彌敦道嘅另一邊。對於被劉以鬯嘅《對倒》啟蒙過嘅我嚟講，六年前嘅我真係覺得呢個行法絕對係浪漫嘅。而且我哋一邊行一邊講住對呢套戲嘅感覺，就更加有文學修養喇。我真心覺得行彌敦道好浪漫，行嘅中途同其他好多條大馬路一樣嘅係你會同好多同你三唔識七嘅人擦身而過，唔通嘅係呢度嘅燈牌喺極光之下照到極暗嘅內心，嗰種對比，無語倫比。而可能喺呢度之中，有個完全唔識嘅人同你演奏出一個好似《對倒》咁嘅故事，而故事嘅最後，你同嗰個人嘅關係remain unchanged。擦身而過，就擦身而過；你我互不相干。