求神畀我出一次Pool，點知畀埋個偶像男朋友我: 61

「你講咩？」我擦一擦眼淚問。

「你諗下無緣無故點會有人追住你家姐？」

「唔通……就係你之前講嘅神秘組織所為？？？？但點會係搞我家姐而唔係我啊？」

「Richard頭先應該太緊張講漏啲嘢。佢同我同阿軒講嘅版本係，喺未淋嘢前，佢哋有問你家姐係咪沈絲絲，即係佢哋應該認錯佢係你。」

「即係……家姐做咗我替死鬼？」我眼淚開始溢出來。



「可以咁講。」

「咩料啊？無可能㗎，無可能㗎！！！！我唔聽你講嘢啊！你講大話！！！」我蓋住耳朵蹲下來，無法接受間接害姐姐的是我自己。

阿軒隨即走來我這邊，然後大力推陳浩賢到牆角說。

「陳浩賢，你夠啦啵！之前你已經hurt過絲絲幾次，而家佢家姐咁已經好大刺激。你可唔可以唔好咁無人性，呢個時候同佢亂講嘢啊？」

我頭一次見阿軒如此激動的樣子，這時陳浩賢啞口無言，默默走樓梯離開。



「事實真係我害死家姐，你怪錯佢喇。」我冷靜過後對阿軒說。

要不是之前有陳浩賢的保護，現在抱頭痛哭的是阿軒，手術室裡的是我。

阿軒帶我到椅子安慰我說：「我唔係咁諗啵，件事發展成咁你都唔想㗎。」

「唔係㗎，我如果當初有提家姐呢件事，佢就會小心啲，咁就唔會發生呢啲事。如果我唔係貪嗰間補習社人工高，明知個老闆痴痴地都去做，嗰啲壞人就唔會揀中我。一日都係我唔好，我諗住我唔出街就無事，點知佢哋班人就認錯佢係我！但我家姐又點可以去到嗰刻都擔心我？？？？嗚嗚嗚……」我一想到自己的過失，內疚得泣不成聲。

阿軒拍拍我肩膀，我忍不住在他懷裡痛哭。



我知道，神肯定在玩弄我，不單是情情愛愛，還有連我最愛的姐姐都因著我而受苦。

為什麼有事的不是我？