【穿越/愛情】《我同鍾意咗十一年嘅人表白，佢竟然跳海死咗》: 八十一（續）

可是。
 
「即使改變唔到阿晴嘅死，我都可以改變到另一樣嘢。」我釋懷地笑著說：「我至少可以親口同到阿晴講一句『我愛你』，同埋俾佢喺死之前知道，即使係點樣嘅佢，佢都會係可以帶俾我幸福嘅人。」
天使聽了我的話，一時間沒有接話，只是低著頭在沉思。
 
「其實你講得啱，我一直都好鍾意阿晴，由第一眼開始就已經鍾意佢。
但一直以嚟，因為怕、因為擔心，我都唔敢去表白。
直到失去咗，我先發現，有啲嘢其實應該一早講；有啲責任，其實一早應該由自己去負責。
你講得啱，若果想得到幸福，其實，就應該由我同阿晴兩個負責，而唔係只係假手於人，寄望由其他人去陪自己愛嘅人去得到幸福。
我一直以嚟都話，無夢想，邊得嚟夢想成真呢？


但原來有夢想係唔夠㗎。
有夢想之後，就要親手將佢實現出嚟，只有咁樣，先可以夢想成真。
而一個人嘅力量唔夠，所以，我需要同阿晴一齊努力。
所以，即使我都係改變唔到阿晴要死嘅命運，但我至少要俾佢知道，佢無愛錯過我，而我，亦一直以嚟都咁愛佢。
我好想，俾佢知道，佢唔需要再自己一個苦苦堅持，因為，我哋可以兩個人一齊堅持。
呢件事嘅最後可能我會完全失憶？或者有其他影響？
但係，今次我想跟自己嘅心意去做一次。
自己嘅幸福，永遠都唔應該交俾人哋去負責。
所以，我想由我自己去決定自己嘅幸福，仲有為我最重視嘅人帶嚟幸福。
我覺得，刻意忘記傷痛而建立嘅幸福只係自欺欺人。


以前，當我面前有99%成功機會嘅時候，我都唔敢去為阿晴帶嚟幸福。
但係，而家嘅我明白，其實，機會唔係必然嘅，話有就有，話無就可以無，
今日，我情願揀為咗最後呢1%嘅可能去換我同佢真正嘅幸福。
我嘅幸福，就只有阿晴，所以即使只有1%成功機會，我都要試。
我要，再追阿晴一次。
你放心，今次同之前嘅穿越唔同。
因為唔係由我去守護阿晴。
今次我唔係孤軍作戰。
今次，係由我同阿晴，一齊去守護我哋嘅幸福同未來。」
在我說話期間，我發現自己不知不覺間握緊了拳頭，整個身子也在微微抖動著。


 
對上一次有這感覺，好像已經是在中學時代將要進行班際籃球賽決賽的時候。
這抖動並不是來自緊張或害怕，而是對終於可以面對最重要一戰的興奮感。
這身體的抖震正在告訴我，我已準備好跟歷史的自動修補力量開戰了。
 
「好啦，既然你有咁嘅決心，我唯一可以做嘅，就係支持你。」天使的溫柔笑容終於重現臉上：「的確，未來係點係無人知道嘅，可能你只需要做出少少嘅改變，結果已經可以改變好多。」
得到天使的認同，我不禁感到安慰。
「我啱啱諗到，阿晴結婚日呢個回憶載點之所以會出現咁大嘅唔同，其實一切都係嚟自你嘅努力。因為你趕走咗盧業成、盡力咁為阿晴搵一個新嘅伴侶，甚至將你同阿晴嘅相處之道同Owen分享，最後先會出現咗阿晴同Owen結婚呢一個全新嘅結局。
而且，喺每個回憶載點入面，其實你亦都改變緊阿晴心入面對你嘅感覺。喺穿越時空嘅過程入面，雖然你睇唔到阿晴心入面嘅反應，但你同佢共舞、為佢完成生日願望、摩天輪嘅表白、趕走intern嘅追求者、長洲渡假屋嘅對話，仲有好多好多由你帶嚟嘅新片段都會令阿晴對你嘅好感增加。
我想講嘅係，雖然你哋因為心入面嘅退縮最後都係無一齊到，但係，唔代表你曾經穿越嘅努力係白費嘅。
假如你跟住落嚟決定要穿越去阿晴嘅婚禮，你以往所做嘅都會成為你嘅基礎。
所以即使以前嘅改變唔多，但歷史的確不知不覺間因為你而改變緊原有嘅軌跡。」