【穿越/愛情】《我同鍾意咗十一年嘅人表白，佢竟然跳海死咗》: 七十四（續）

婚禮順利地完成，而回憶載點的最後，意外地再次出現了一位天使和穿越者。
而他們的話中，竟然令阿軒加以生疑。
這時候我身邊的天使雙眉經已蹙緊了。
「首先係香姨，之後到安蕎、撒拉斐爾......」天使自言自語地沉吟著，「而且呢個載點出現嘅見習天使基斯拿更加奇怪......」
我向天使投以了一個疑問的表情。
「正常嚟講，天使好少會現身同人有交流，所以撒拉斐爾會出現已經有啲奇怪。然後如果你記得，當撒拉斐爾聽到阿軒講『死神帶佢穿越時空』呢件事嘅時候，佢首先係有啲驚訝，但最後係忍住咗啲嘢無講。」天使提起了先前的畫面。
我點點頭表示記得。
 
「其實撒拉斐爾之所以要忍住，係因為我扮死神呢件事得到咗天堂嘅確認，而為免其他天使有誤會而破壞咗呢個計劃，所以天堂特別出咗一個保密通告，因為咁所以撒拉斐爾先會有意識忍住唔講。」天使解釋著：「但奇就奇在最後殺出咗呢個見習一日嘅天使基斯拿，好明顯佢喺係通告出咗之後先至上任，所以就咩都同阿軒講哂。佢出現得咁巧合，感覺上，好似有人要專登破壞我哋嘅計劃咁......」
 


我雖然完全明白天使的考慮，可是我見阿軒已進入穿越的過程中，不禁緊張地問：「但阿軒已經翻緊嚟啦，一翻到佢一定會問你身份嘅事，到時候可能會穿煲㗎，點算啊？」
天使氣定神閒地笑了笑，說：「放心，問題係要解決，但爭取時間唔難嘅。」
只是天使雙手在空中一陣彈撥，阿軒的穿越時空馬上停止，轉眼間他已在的士之上。
「我將佢帶咗去早少少嘅時間，應該夠我哋傾下對策。」天使打了一個「ok」的手勢。
「但其實以阿軒聽咗嘅嘢，佢肯定會懷疑你嘅身份，仲有質疑點解佢可以穿越。」我思考著。
「無錯，所以而家嘅方向有兩個。第一，再作新嘅原因去解釋，令佢信服之後繼續接受我哋嘅計劃，去埋『第一日相識』呢個載點度改寫你哋嘅相識；第二，同佢講出真相，好處係至少俾佢明白你嘅用心良苦，但壞處係佢未必會咁順攤接受消除記憶嘅建議。」天使清楚地點明了目前僅有的路向，但可惜兩條都不算是容易選擇的路。
 
只是，這次我很快就有了決定。
「同佢坦白啦。」我堅定地說。
「你唔怕佢聽完之後唔接受去『第一日相識』呢個載點度改寫你哋嘅相識經過？」天使反問。


「我怕，但係我覺得我同佢之間實在已經錯過咗太多俾對方嘅心意。無論係以前嘅歷史，或者係新嘅歷史。我明白，對方接收唔到肯定嘅愛意係好難受，但其實心入面有愛意但一直都要收收埋埋都係好辛苦。既然我都要死啦，我好想感受一次，俾愛我嘅人知道，其實我都愛佢，係一樣點嘅感受。」我真摯地道出了自己的心聲。
而我心中所想的，就是當阿軒已經盡力了那麼久，他的努力，至少值得知道背後有人一直明白，而且形而重之地看待他的愛意。
同時之間，即使他可能會失憶，但能夠感受片刻來自我坦率的愛意，我也心滿意足了。
 
「但係，若然佢明白哂所有嘢，佢咪更有可能為咗唔想忘記呢啲嘢而唔肯選擇消取記憶囉？」這次終於到天使不解了。
「如果係咁，就請你同佢講『嗰件事』。」我笑了笑。
「就算講咗，又有咩用呢？」天使這時心裡應該在想，即使提到無關痛癢的「嗰件事」，對事情又有何幫助呢？
「只要係阿軒，佢就會明白㗎啦。麻煩你到時試下。」我微笑一下，對於終於有事情令天使想不明白感到有一點點的自豪。
「好，咁我都預備去見阿軒啦。」天使看著此時畫面，阿軒已一臉驚愕地見著了我燒炭而死的屍身，「我最後要講一句就係，若然到最後阿軒都係唔肯改變你哋初相識嘅經過，我係唔可以強迫佢嘅。而即使改變失敗，你都需要上天堂啦。」
「嗯，我明白，多謝你為我做咗咁多嘢。」我深深向天使一躬，以表謝意。


 
就這樣，天使化成一陣金煙在我眼前消失，轉眼已顯現在阿軒面前，開始了一陣激烈的對質。
到底結果會變成怎樣呢？
到底阿軒會選擇改變我們最初的相識嗎？
這些我都不知道。
我唯一知道的是，阿軒的出現，已是我此生最大的幸福。
即使我們沒有真正在一起過，但他的照顧，他的明白，每分每秒都是彌足珍貴的。
能經歷新舊歷史兩次被他愛慕的時刻，其實我已賺到了。
如今，我唯一的盼望，就是他能幸福。
 
他知道我喜歡張愛玲，我也知道他喜歡五月天。
若我們有機會再對話，我想將這首歌送給他作為道別的背景音樂。
 
「我們都要把自己照顧好
好到遺憾無法打擾


好好的生活
好好的變老
好好假裝我 已經把你忘掉」
 
阿軒，你經常掛在口邊的是，「唔夢想，又邊得嚟夢想成真呢？」
那麼我最後的一個夢想，就是要你幸福。
請這個夢想一定一定要成真。
請你，一定一定要幸福。