【穿越/愛情】《我同鍾意咗十一年嘅人表白，佢竟然跳海死咗》: 七十三

「你啱啱有冇留意到香姨嘅出現？」天使一臉凝重地問。
「梗係有啦，佢嘅故事好感動喎。有咩意外啊？」剛著聽著香姨的故事，加上看著阿軒成功讓香姨表白心事的一幕，我不期然被感動得雙眼通紅了。
「我想講嘅意外係，香姨竟然可以發現到阿軒手上嘅紅繩.....」天使沉吟著，用手摸著下巴在沉思。
「紅繩？」我一時不解。
「紅繩係時空穿越者嘅記號，其實主要係俾天使睇嘅。」天使解釋說。
「哦.....但係啱啱香姨咪解釋咗囉，佢係因為穿越咗幾次，所以先慢慢發現到呢個記號嘛。」我回憶著香姨剛才的話。
「呢個就係奇怪嘅地方......」天使緩慢地呼吸著，「因為呢個記號正常係唔會俾穿越者見到，即使穿越者穿越過幾多次都好。呢個設計，係為免唔同時空嘅穿越者發現其他穿越者嘅身分，然後互相接觸，引起不必要嘅混亂。」
「吓，咁但係點解香姨會見得到嘅？」我開始明白天使的疑惑。
「咁係因為有人幫咗佢『開眼』，令佢可以睇到自己嘅紅繩，甚至令佢相信咗自己睇到係因為穿越得多。所以令我最奇怪嘅係，到底係咩人做呢件事，而目的又係咩呢？」天使愈說下去，眉頭皺得愈厲害。
 


「但係即使香姨睇到自己嘅紅繩，都唔會對我哋嘅計劃有影響㗎。」我思考一下，一時間未明白當中的因果關係。
「你有冇聽過聖經入面嘅『分辨善惡樹』？只要食咗禁果，就可以知道世界上有善惡之分，然後就可以睇清楚到世界上面嘅善與惡。」天使再次解釋道：「而『開眼』呢個步驟就係有啲似，唔單止令自己可以睇到紅繩，當你話咗俾另一個穿越者知道嘅時候，對方就會好似被『開眼』一樣，慢慢就會睇到其他穿越者嘅存在。」
「哦.....所以你係擔心，阿軒可以睇到其他穿越者嘅身份，可能會影響到我哋嘅計劃？」我終於明白天使的意思了。
「嗯。不過當然，若然香姨呢件事只係一個偶然，我哋現階段都只可以靜觀其變，睇下阿軒之後會點。」天使無奈地笑了笑，引導著我將目光放回阿軒正在經歷的回憶載點中。
有了天使這句話，我也暫且擱下擔心，將精神放回到阿軒的載點經歷中。
 
來到了「南京之旅第一日」的載點，發展完全超出了我的想像。
無論是盧業成的外遇，或是阿軒的偷拍卻反遭盧業成設計陷害，都是我從前經歷的歷史中沒有的情節。
而當我看到歷史中的自己輕易中計時，不禁連連踩腳，恨不得馬上進入歷史之中罵醒自己。
然後接下來，當我看到阿軒為了讓盧業成離開我而接受打鬥的挑戰時，我心中既是感動，又是擔心。


因為我很了解盧業成的打架能力，但同時也知道阿軒倔強得要命的執著。
果然，毫不意外地，這場架一打下來，除了強弱懸殊，同時亦是死纏爛打。
作為只能旁觀的我，連想為阿軒吶喊助威或是叫停打鬥都無能為力，只可以默默地著急的流淚。
 
「天使你去幫下佢啦，再打落去阿軒頂唔順㗎。」我搖動著天使的手。
「唔係我唔想幫，而係如果天使干預太多歷史嘅進程，係嚴重嘅犯規嚟，唔單止我，可能連你都要受罰。」天使無奈地搖頭。
在我心裡，我知道若能夠有辦法幫助一心為救我而身陷險境的阿軒，我其實毫不介意受任何懲罰的。
可是，我也知道，自己總不能自私地迫著天使來為著自己而受罰吧。
所以，我繼續看著這場無情的打鬥。
每當阿軒受了一拳，我的心中就是一痛。


 
就在這時，阿軒倒地，盧業成把他踩住，準備補上一拳。
當我正要不忍目睹這殘酷的畫面而別過頭去時，我卻發現身邊的天使已不見蹤影。
當我回望過去，天使已出現在阿軒面前，用虛構的理由為他解困。
這時，我感到自己的嘴唇上傳來了陣陣血腥味，相信是我剛才看得太緊張而把嘴唇咬破了。