【穿越/愛情】《我同鍾意咗十一年嘅人表白，佢竟然跳海死咗》: 七十一

「阿軒？」天使一時不解。
「只要佢嘅『回憶載點』有我同佢初相識嘅一日，咁佢咪可以做到改寫我同佢相識呢件事囉！」我想到這裡，忍不到興奮地叫了出來。
可是天使卻微笑著搖搖頭，說：「理論上係啱嘅，但係第一，如果佢願意改寫你哋初相識嘅經過，點解唔直接叫佢接受消除記憶呢？既然你都知佢係唔會揀消除記憶嘅，咁佢又點會肯改寫你哋嘅相識經過呢？第二，穿越時空呢件事一直以來都係意外致死嘅人先有機會試，俾一個未死嘅人去試，我真係唔知天堂批唔批準。」
天使的話是對的，一時間，我又陷入沉默之中了。
當我和阿軒已經各自都未能與對方所愛的人共度一生的時候，我可以撒手人寰，但阿軒卻要在世間飽受煎熬，這對他真的公平嗎？
 
「阿晴，一直以來，每一個意外而死嘅人一聽到可以穿越時空，就會馬上諗到同最重要嘅人去經歷人生中最美好嘅時光多一次。你係第一個提出想放棄呢個機會嘅人。」天使突然打破了沉默，溫柔地看著我問：「我想問，如果真係有機會可以令阿軒忘記你哋之間嘅一切，你就真係願意放棄穿越時空嘅機會？而且你要知道，歷史一經改寫，就再無得翻轉頭。即係阿軒一忘記你，就唔會再有記得翻起嘅機會。」
「咁樣...實在太好啦。你有辦法？」我聽了，雖然心裡對於阿軒失去我們之間的記憶感到心痛，但讓一個已死的人感到心痛，總比讓一個在世之人痛苦一生更好。
天使不置可否地回應著：「阿軒而家係樓下嘅病房因為浸親而昏迷緊，我會去確認一啲嘢先，好快翻。」
說著，天使就消失在我的眼前中。


 
天使走後，房中就只剩下我和我的屍身。
看著這具靜靜地躺在床上跟我樣子相同的屍體，我感到了一陣釋懷。
或者，其實我內心早想逃離這段要命的婚姻。
這段婚姻，不但充滿了難受的時刻，而且還是我昧著良心放下最愛的人來成就的。
結果，成為了我人生中最大的遺憾。
現在這一死，不但讓母親可以得到一筆可觀的保險，同時又可能可以讓阿軒忘記我的存在，減少他的痛苦，所以也許已經是最好的結局了。
 
就在我胡思亂想之際，天使再次閃現於我眼前。
「因為阿軒昏迷緊嘅時候成個腦都係諗住你，所以我啱啱乘機感受咗一次佢腦海入面同你嘅『關鍵詞』係咩，然後再睇埋呢啲『關鍵詞』可以創造到咩『回憶載點』。結果，恭喜你，喺佢十個有你嘅『回憶載點』入面，第一個『回憶載點』就係第一次認識你嘅嗰一日。」天使微笑著說。


「但係正如你講，即使佢有，都唔代表佢會肯改寫呢個回憶㗎，佢份人好硬頸㗎......一係你俾我勸佢？」以我對阿軒的認識，他並不會如此容易就範。
「死人係絕對唔可以同在世嘅人對話嘅。」天使堅決地搖了搖頭，不過旋即回復了溫柔的笑容，說：「其實我心入面有少少諗法，或者可以幫助到你，只係呢個諗法實行之前，我需要過多一關。」
天使認真地看著我，然後凝重地問：「你真係決定用自己放棄穿越時空嚟換阿軒嘅記憶消失？」
我沒有回話，只是用最肯定的眼神點頭一下。
天使呼出了一口氣，然後說：「好，咁你再等我一陣。」
語音剛落，天使又消失不見了。
 
這次的「一陣」果然是「一陣」，不足十秒，天使又再現身了，而且是帶著高興的笑容。
「天堂批準咗你嘅提議，可以俾阿軒代替你本身有嘅名額去經歷一趟穿越時空嘅旅程。」天使一臉興奮地道。
「點解嘅？」我看著他如此高興，雖然未完全明白現時的事態發展，但仍有一點替他高興的微笑作為反應。


「天堂無解釋，但竟然好快就批準咗，其實我都好意外。」天使笑了笑。
「但即使阿軒可以穿越，始終佢唔肯改變回憶呢件事都未解決到喎......」我不解地說。
「其實喺我嘅諗法入面，要令佢肯改變回憶並唔難，最難嘅反而係技術上嘅問題。但係而家既然證實咗佢嘅『回憶載點』有你哋認識嘅第一日，而且又有天堂嘅批準，咁成件事就唔難啦。」天使滿意地笑著。
「即係點啊？」我仍然是不明白。