【穿越/愛情】《我同鍾意咗十一年嘅人表白，佢竟然跳海死咗》: 六十六（續）

我沒有望向阿晴，所以不知道她說出這句話時候的表情。
「嗯，希望你幸福快樂。」我以一個禮貌的笑容配合這句話說出，眼神卻落在遠處的窗。
 
「我突然覺得，時間過得好快。」阿晴的濃妝不襯她現在略帶愁悶的樣子，「十幾年，好似轉眼就過。好多以前中學幻想將來嘅事，眨下眼，就好似已經發生哂。」
「發生咗咪好囉，除非你有後悔嘅啫。」我似笑非笑地回應著。
「人生，多多少少總係會有啲遺憾嘅。」阿晴看著自己的雙手，不知在想什麼，「如果有得穿越時空就好啦。」
此話如刀，正接刺中了我的心臟，泊泊地流出一陣心酸。
「有啲嘢，穿越時空都未必改變到嘅。」我吐出了此刻無奈心聲的上半句。
而未說出口的下半句是：「就好似我同你咁。」
 


「又唔係一定要改變啲咩嘅，如果有機會可以經歷多一次以前嘅事，其實我已經好滿足。」阿晴的臉上展現了微笑，似乎已在想像中享受著回憶的美好，「以前中學嗰種無憂無慮，對未來充滿期望嘅生活，其實真係好好。」
「每日就係盡情打波，盡情玩，然後又搏命去溫書考dse，雖然做嘅嘢全部都唔知為咩，但係，真係好開心。」我想起了那段每天都在阿晴身邊的日子，親近得因為她而想去上學，親近得連最難捱的歷史課都覺得幸福，親近得以為將來一定會娶到她。
那時候的我想過，一上大學，就要把阿晴追到手。
我也想過，要在巴黎鐵塔前向她求婚。
我甚至想過，我們的家中要在中西區，而且一定要養一貓一狗。
能夠幻想的日子，確實很幸福。
可是成長，就是把幻想像美妙的氣泡般逐一被刺破。
或者如五月天所說，「成熟就是幻想幻滅一場磨練」。
 
「係喎，你諗住幾時先搵翻個女朋友啊？」阿晴把話題一轉，帶著俏皮的語氣問我。


「唔知呢，隨緣啦，反正我咁好條件。」我不在乎地笑了笑，「而且我仲想繼續追下夢，邊有時間拍拖啊？」
阿晴聽了，一時間沒有回話，只是兩眼放空地看著我。
正當我想再多說一句的時候，阿晴又突然笑了笑，然後問：「咁點解，你唔好好哋搵個人陪你一齊追夢呢？」
「我一早已經搵咗，只係嗰個人無揀到陪我追夢啫。」我苦笑地回答著，腦海中浮現了「莫道你在選擇人，人亦能選擇你」這句歌詞。
 
就在我等待著阿晴的回話時，新娘房門被打開了。
進來的人是攝影師的助手。
「新娘你好啊，攝影師想趁住無人同埋你哋兩位未換婚紗同西裝，幫你同新郎喺教會正門影幾張相。」
阿晴點了點頭，微笑說：「好啊唔該你，我一分鐘內到。」
助手關上了門，阿晴也緩緩地站了起來，把繡花鞋重新穿上。


 
「阿軒啊。」阿晴穿好了鞋，走到門前。
「嗯？」我看著停在門前的阿晴，她的表情是今天未曾出現的認真。
「應承我一樣嘢。」阿晴正視著我的雙眼。
我沒有作聲，靜靜地看著她一雙眼眸。
 
「應承我，你要比我更幸福。」