【穿越/愛情】《我同鍾意咗十一年嘅人表白，佢竟然跳海死咗》: 六十三

一如意料，在路上我碰上了正在回去休息處的Owen。
「阿軒？你唔係休息緊嘅咩？」Owen似是有點意外遇見了我。
「無啊，我見天氣幾好咪行下囉。」我也裝作驚訝地回應說。
「今日天氣都真係幾好，影相都幾啱，唔怪得阿晴影得咁開心。」Owen滿意地看著天色。
「阿晴開心又唔止係因為天氣嘅，仲有因為Aiko買啱咗嘢飲啫。」我一聽見有機會，馬上乘機把話題轉移到我的目標路線上。
「嘢飲？」Owen果然被我引起了好奇心。
「Aiko熟阿晴，所以咪特登買咗陽光檸檬茶俾佢囉。如果淨係得維他檸檬茶，阿晴會發火㗎。」我扮了一個阿晴生氣翻白眼的樣子。
「真㗎？呢樣我又真係未聽過喎。」Owen饒有趣味地聽著。
「阿晴其實仲有好多怪癖㗎，我哋幾個由中學開始識佢，呢啲嘢知得特別多。」這時候，我作了一個神秘的樣子靠近Owen一步，低聲說：「趁住阿晴忙緊唔喺度，你又會同佢結婚喇，有冇興趣聽多啲阿晴嘅嘢？」
Owen雙眼靈動一轉，微笑著點了點頭。



我和Owen走過了一道小橋，行到一個相對遠離拍攝位置的地方。
「其實阿晴呢，特別鍾意小動物，但係千奇唔好養狗，因為佢細個俾狗追過㗎。」
「真㗎？我淨係知佢驚狗咋，原來佢俾狗追過㗎？」Owen有點驚訝。
「嗯，喺佢七歲嗰陣啊......」我說起了阿晴被狗追的故事。

漸漸地，我和Owen的對話，由我說一句，佢追問一句，到後來他聽得入神，只剩我一人在說話。
「佢好鍾意詩，特別係現代詩，所以送詩集俾佢一定無錯。」
「佢通常都唔會帶散紙出街，平時都無咩所謂，但如果佢嗰日要小巴，記得要提一提佢先，因為你知有啲小巴無八達通㗎啦。」
「佢麻麻地鍾意睇戲，不過所有文學小說改編嘅戲一定要帶佢睇，特別係張愛玲。」


「佢做每件事都一定會諗人哋先，所以無論件事係點處理，一定要關心佢嘅感受，因為佢好多時都會唔聲唔聲咁犧牲咗自己。」
「佢好鍾意海，唔開心又唔見人嘅話，只要去最近嘅海旁就會搵到佢。」
「如果佢嬲到出面，咁佢一定係好嬲好嬲，因為佢係一個會收埋情緒嘅人，嗰時一定停止所有做緊嘅嘢去安慰佢。」
「當佢傷心嘅時候，唔洗講啲咩安慰說話住，你擺定杯水俾佢，到佢攞起杯水飲嘅一刻，就代表可以同佢傾啦。」......
當我述說著阿晴的特性，眼前就似看見了不同時候，不同場景當中的她。
生氣的她、害怕狗的她、哭泣的她、讀詩的她、大意的她、散發文學氣質的她、低調付出的她。
每一個她，都伴隨著一個我。
每一個她，我都很珍惜。
曾經很靠近的我，陪伴著她一路成長的我。
那些時候曾經如此接近，差點以為那就是一輩子將會有的幸福感覺，可是原來，幸福只維持了一個剎那。



我發現原來即使再了解，再明白，再愛一個人，並不等於對方就會成為你的愛人。
再了解她，但卻沒有了解到她所愛的人並不是我。
再明白她，卻仍是不明白到底我們為甚麼會錯過了彼此。
再愛她，卻沒有可以愛她的身份。

原本以上一切對阿晴的認識，都是我在心中日積月累地記錄下來，提醒自己如何愛護阿晴所用的。
但事到如今，我只成為了她故事的敍述者，因為她的故事，將會由另一個人開始執筆。
所以我想到唯一可以做的，就是將阿晴的故事分享給Owen知道，讓Owen可以代替我，用最適合最明白阿晴的方式來愛護她。