【穿越/愛情】《我同鍾意咗十一年嘅人表白，佢竟然跳海死咗》: 二十七
接下來，香姨拉著我找了一個位置坐下，然後分享了她跟June爺爺的故事。
一個，似是只會出現在電影或電視之中的故事。
「呢個故事要由1922年嘅廣州佛山開始講起。
嗰一年喺佛山二牛村有兩家人同時生咗小朋友，王家生咗一個女，爸爸媽媽為佢改名做「王香」，亦都即係我；而另一家人，陳家就生咗一個男仔，個名叫做「陳詳」，亦都即係June嘅爺爺。
其實本身我哋王陳兩家人係村入面嘅關係已經好好，而咁啱仲要兩家人一齊有咗BB，所以自然就令我哋兩家人親上加親。
嗰個年代，其實父母之命嘅婚姻仲係好普遍，所以我同阿詳嘅爸爸媽媽一早已經傾好，等我哋兩個大個之後就會成婚，等佢哋兩家人真係可以做埋親家。
或者係因為兩家人實在太熟，所以我同阿詳基本上就係對方由細到大嘅好朋友，玩又一齊，打交又一齊，簡單啲講，就係青梅竹馬。
嗰時大家都無諗過要唔要結婚，但係當你每日嘅生活入面都有住對方嘅時候，你好自然就會覺得生命之中有對方係必然嘅。
直到有一日，當我發現原來佢係有可能會消失嘅時候，我先發現，原來呢個世界係無必然嘅存在。」
聽香姨把故事說到這裡，我不期然地想到了阿晴。
阿晴由中二開始，就走進了我的生命中。
即使她只是我每天上課時的玩伴，或是我課餘時的好友，但長年累月之後，她的陪伴、同在、傾談、笑顏，一一都成為了我生命中必然的存在。
或者，會否就像香姨所說，阿晴的出現就是為了向我證明，世上並沒有必然這回事？
「時間要跳到1938年。
嗰一年，我同阿詳都十六歲，本應仲應該係無憂無慮嘅青春日子，就俾一場抗日戰爭打亂咗。
我好記得嗰年嘅四月，當時我仲係農田度幫緊手收割，點知我家姐突然好急咁跑翻嚟同我講，話我爸爸、仲有阿詳同埋幾個我哋嘅朋友都要走啦。
當時，我都未明白我家姐講緊咩，我只係記得我一聽到阿詳要走，我就係咁跑係咁跑，一直跟家姐跑到村口。
喺村口，我見到差唔多全村嘅男人都上哂車，而我媽媽已經攬實我爸爸喊到收唔到聲。
我聽到身邊好多人講，呢架車，係要車哂啲男人上前線打日本仔。
而我哋每個人都知，上得前線就預咗九死一生。
所以呢一刻，其實就已經係生離死別。
我好唔容易咁搵到上咗車嘅阿詳，嗰一刻，我見到佢喺到一直四圍望，直到見到我嘅時候對眼先停低咗。
阿詳本身就係一個唔多講嘢嘅人，而喺嗰一刻，佢更加講唔到嘢。
我記得佢一望到我，即刻就跳咗落車，然後攬住咗我。
喺呢一個擁抱之前，其實我哋一直都無講過咩兒女私情嘅感情事，但或者因為大家都知道呢一刻再唔講，可能以後就無機會再講。
所以，嗰時我都係咩都無講，只係靜靜地咁由得佢攬住我，同埋用佢件衫嚟抹眼淚。
喺佢上車之前，佢望住我，好認真咁講咁一句：「等我，我會翻嚟娶你。」
其實有邊個會知打仗打到幾時啊？
而家諗翻，其實佢都係想安慰我，但係嗰刻嘅我咩都無諗，只係一心一意咁等佢翻嚟。
結果，當然佢再無翻過嚟。
而係同一年嘅十月，廣州俾日本仔攻陷咗。
好彩我哋一家有人脈，係淪陷之前坐船落咗嚟香港暫避，先叫做有一時嘅平安。
係香港嘅我，其實仲係好掛住阿詳，雖然心裡面明知佢兇多吉少，但始終就係放唔低佢。
講真，一個人由每一日都對住，變成完全消失係自己嘅生命入面，呢種感覺，就好似個身體失去咗一部分，無論點都會覺得有啲唔自在。」
我一邊聽著香姨的故事，內心卻一邊想到阿晴。
即使我與阿晴的關係遠遠不及香姨跟阿詳的經歷深厚，我卻對香姨的感覺身同感受。
自從阿晴與他人在一起開始，我的身體也好像缺少了一部分。
那一部分，或者就是心臟吧。
「到咗我廿三歲嗰年，我個心對阿詳嘅期望就跟住抗日戰爭一齊完咗。
或者你會問，點解我唔再等落去呢，或者打完仗就會搵到佢呢？
但其實我想話你聽，係嗰一個年代，二十歲都未結到婚嘅女人，已經足以俾人評頭品足。
即使係俾人點話都好，我都一直堅持住要等阿詳。
但係我由十六歲等到廿三歲，等到外人唔單止對我，更加對我嘅家人說三道四，我就明白，我係時候要做決定。
最後，我嫁咗俾一個小工廠嘅太子爺，生活尚算係唔錯。
係舒服而平安嘅生活之下，我以為呢個將會係我往後人生嘅寫照。
但係到我三十歲嘅時候，命運就同我開咗一個最大嘅玩笑。
當時嘅我，正喺醫院休息，準備生第三個小朋友。
就係我訓係床上面休息嘅時候，我突然聽到隔離床傳嚟好熟悉嘅廣東口音。
我好奇咁望過去，我估唔到，我竟然見到嘅係拖住一個小朋友係病床旁邊陪住一個女人嘅阿詳。
嗰一刻嘅感覺，又開心，又心酸。
開心，係因為一個曾經對自己最重要嘅人竟然死裡逃生。
心酸，係因為兩個曾經以為會同自己建立家庭嘅人，今日再遇嘅時候竟然已經各有家庭。
雖然心酸，但係既然難得遇翻一個生命中咁重要嘅人，我覺得都算係一份緣分。
所以，我就同佢相認咗。
我好記得，佢聽到我叫佢個名，然後望到我大住肚訓係病床上面嘅時候嘅表情。
佢嗰刻無驚訝，無出聲。
佢只係望實咗我嘅肚，微微一笑，然後眼角流咗一滴眼淚出嚟。
我無問佢到底嗰一刻有咩心情，因為我覺得，或者永遠都唔會有詞語可以形容到。
相遇翻之後，我哋都向對方講翻呢十幾年嘅經歷。
阿詳佢當年入伍，可惜中國軍一路敗退，所以佢只可以同幾個朋友一路逃走。
佢曾經逃走過翻去二牛村想搵翻我，可惜當時嘅二牛村一早就被日本仔攻陷哂，所以全條村已經無哂人。
一個親人都無嘅佢就咁流落嚟香港，係戰後開始去碼頭做下咕喱。
因為佢份人夠老實勤力，所以好得老闆歡心同信任，到後來更加將個女嫁咗俾佢，結果，就出現咗我遇上佢同佢家庭嘅一幕。
難得我哋咁都撞翻，其實我哋兩邊嘅家人都好為我哋高興，所以亦都因為咁啱兩家人都有小朋友，所以就自然熟絡起嚟。
之後，我哋時不時都有兩家人一齊嘅家庭聚會，一齊玩，一齊傾計，一齊學下點教仔。
呢一切嘅生活瑣事，我曾經都幻想過會同阿詳一一完成。
但係到最後，我哋都只可以係對方見證下，同另一個人完成。
或者，呢啲就係所謂現實嘅無奈啦。
就係咁，我同阿詳用好朋友嘅身份相處咗幾十年。
相處到阿詳老婆十幾年前過咗身，我同我老公就開始多咗陪阿詳。
而直到幾年前我老公都過埋身，加上阿詳有咗腦退化，就變咗我負責係老人院度照顧阿詳。
原本睇住阿詳慢慢忘記身邊所有嘢，而我都差唔多九十歲啦，我諗住呢個咁平凡同普通嘅發展，將會係我同佢之間嘅結局。
點知，就係一切似係走向平淡嘅時候，意外就發生咗。」
香姨說到這裡時刻意頓了一頓，害我滿滿的好奇心馬上抱怨起來。
香姨看著我著急的樣子，笑了笑，便把話繼續說下去。
「係今年2012年嘅八月，亦都即係四個月之後，發生咗一件事。
嗰日本來無咩特別，我同阿詳好似平時咁喺老人院外面嘅公園散下步。
點知散步嘅時候，突然有一個小朋友唔知係邊度衝咗出嚟。
呢一衝，咁啱撞到我，令到我個人向後跌。
我嗰一下咩都無諗，反而係即刻放開咗本身扶住阿詳嘅手。
事後我諗翻，或者我拉實阿詳，可能我唔會跌得咁應。
但嗰一刻應該係我自己下意識怕會拉跌佢，所以寧願鬆開手。
結果，我後腦落地，當場死亡。
而奇蹟，亦都係呢個時候出現。」