【穿越/愛情】《我同鍾意咗十一年嘅人表白，佢竟然跳海死咗》: 十二
當我走到過去那四眼男生身邊時，我發現有兩個樣子普通的男生正從四眼男生手上接過兩張五十元紙幣，然後高興地離去。
四眼男生發現了我好奇的樣子，於是便說：「明知自己今晚都無咩機會，所以佢哋咪直接賣自己張卡俾我囉，起碼都叫做有翻少少收獲啊。」
「但係你每張卡用五十蚊買翻嚟啊？唔怕蝕咩？」我驚訝地問。
四眼男生精明地托一下眼鏡，鏡片彷佛閃過亮光，然後道：「根據我環繞全場一週，我已經睇過大部分場內女仔嘅卡牌，而我特別記低咗女神級嘅女仔拎咗咩卡，再根據每張卡可以有機會接觸到幾多個女神嚟做分析，所以每一張我買嘅卡，一定係根據市值率嚟定價，保證即使市價浮動，但係我仍然可以獲利。」
聽著這四眼男生頭頭是道的解釋，連實際年齡已有二十五歲的我也不禁拍手讚好。
「講咗咗多我都未自我介紹，人稱『牛頭角少年巴菲特』就係我啦，你可以叫我Buffet。」說著，Buffet已熟練地伸出了手，而我也禮貌地握了一下，感覺就像是遇上了保險經紀一樣。
「點啊同學，你想買啤牌定賣啤牌呢？」Buffet以親切的笑容問。
「我想買。」我肯定地說。
「想買咩number？我見同你咁好傾，可以俾翻個八折你喎。」Buffet一邊說，一邊不知從哪裡掏出了一部計算機。
雖然我理解不了到底我與他何時有「好傾」的情況，但我還是回答他說：「我想要張Ace。」
「識貨！Ace咁啱做緊特價，計埋個折俾你齊頭三百！」
「三百？！」我差點大叫了出來。
「算抵啦，我估你咁有眼光揀定張Ace，一定係睇中咗佢嘅潛力嘅。」我從Buffet的鏡片上彷佛看到了兩個「$」的符號。
「潛力？」我聽不明白。
「嗱，你望下左邊嘅十點方向！」Buffet一手搭上我的肩膊，一邊把我身子轉向，「前面嗰個係「聖天馬中學」嘅女神，身材高挑，再加上有42吋長腿。而佢手上嘅牌，係Ace。」
我看著前方明顯是刻意穿上了短裙的女生，完全是充滿機心地在賣弄一對長腿。而看著她身邊被重重的男生包圍，可見她的策略是成功的。
「你再望下身後嘅四點方向！」我還未欣賞完那對42吋長腿，Buffet再次強行把我轉了半圈，「著住紅色裙嘅係「華義書院」嘅Rosalina，人稱「重慶麻辣三小」嘅佢雖然唔高，但勝在夠哂玩得，而且個樣仲非常似ABC，重點係，佢都係拎住一張Ace。」
看著前方正在舞池中與三個男生跳著貼身舞的Rosalina，看來並不只是「三小」的火辣程度啊。
「除咗佢哋兩個，拎住Ace而且係高質嘅女仔仲有四個，所以一張三百蚊，算係優勢價啦！我手上就得翻最後呢一張啫，手快有手慢就無啦。」Buffet專業的推銷口吻，果然讓我感受到壓力。
阿晴啊，為什麼你就要拿到一張跟這堆女神相同的牌呢？
不過，既然難得穿越時空，也難得經歷唯一一次有機會與阿晴共舞的機會。
「好啦，三百就三百！」我毅然決定付款，正當我打算從褲袋中掏出我常用的G2000銀包時，我發現拿出來的只是一個漲得快要爆開的One Piece銀包。
Shit。
我忘記了現在的我只是個貧富的中學生，這時候的我並沒有插滿信用卡的G2000銀包，我有的只是塞滿了足球明星卡的One Piece銀包。
即使如此，我還是打開銀包一看。
不出所料，整個銀包就有一張二十元正。
「你唔好賣張卡俾人，你等我，我一定翻嚟！」我肯定地對Buffet說。
「緣份呢啲嘢話嚟就嚟，話走就走，你想捉住佢，你就要快啦。」Buffet像是看著一個落入圈套的獵物，欣喜地看著我。
而我，也確實是一隻毫無選擇的獵物。
錢銀問題，從來九公和蕭揚也會是好幫手。
但當我看著九公正忙於拿著他手上的「同花順」在舞池中「獵食」時，我決定向蕭揚求救。
「三百蚊買一張卡？不如我出去買十副啤牌俾你啦。」蕭揚聽了我的敍述，不禁眉頭一皺。
「親愛嘅主席，而家江湖救急啊！唔係個個都好似你咁一個人企係度都有人搵㗎嘛！」我氣急敗壞地說。
「你又講得啱，啱啱係咁有一大堆女仔堆嚟問我拎住咩牌，都唔知咩事。」蕭揚漫不經心地說。
「咁你而家救唔救我啊？」我無奈地說。
「得啦，帶我過去俾錢啦。」蕭揚放下手中的雜果賓治，掏出了真皮的Gucci錢包。
果然，兄弟就是兄弟。
若然因為今天的事，最後我與阿晴能夠成為一對，我一定會爽快地給予蕭揚一封大利是。
「咩話？五百蚊？」我這次真的叫了出來。
「真係唔好意思啦，因為啱啱你走一走開，就有十幾人過嚟問我買呢隻Ace。咁經歷完需求增加之後呢，呢張Ace有少少週期性增長都係好正常嘅。嗱，我份人就好講信用嘅，我專登都等埋你俾你買先㗎啦！要唔要緣份，就睇你啦。」Buffet露出的笑容，讓我確信他長大後必定會成為一個奸商。
「唔知道呢個舞會嘅主辦人知唔知道有人非法炒賣啤牌呢？」這時候，蕭揚就突然說話了，「如果佢知，我相信你呢門生意一定做唔到落去。」
Buffet一聽，眼鏡的鏡片再次亮光一閃：「你想威脅我？」
「唔係威脅，係提醒啫，因為我咁啱同主辦人都幾熟。」蕭揚雙目銳利地看著Buffet，但臉上仍然是灑然的笑容。
「我話你哋知，呢張係全場最後一張Ace，所以我一蚊都唔會減俾你。但如果你破壞我生意，我就會即刻撕爛再吞咗張Ace。到時候我無錢，但係你都唔洗旨意同你鍾意嘅女仔跳舞。你係咪想一拍兩散啊？」Buffet咬牙切齒的，似乎完全不打算退讓。
「係。」蕭揚竟然比我更快出口回答，我完全來不及捂住他的嘴巴。
果然，遇上倔強的人就是傲氣比天高的蕭揚的死穴。
「我而家就撕俾你睇！」Buffet雙指已放在Ace卡的邊緣。
「咁我而家就去搵主辦人啦。」蕭揚雙手一攤，一款毫不在意的樣子。
當然，因為在意的人是我啊！
「我撕啦！」Buffet的雙指微微用力，我看著卡上出現了一絲的裂痕。
這道裂痕，彷彿就在撕破著我與阿晴的緣份。
難道，這次的歷史正是要再一次印證我與阿晴的有緣無份？