【穿越/愛情】《我同鍾意咗十一年嘅人表白，佢竟然跳海死咗》: 九

「穿越時空開心嗎？」
一聽背後傳來的陰聲細氣，我便知道是死神了。
「點解我會翻咗嚟嘅？係咪已經救番阿晴啦？」我興奮地問。
「如果搭下膊頭就救翻條命，咁你錫佢一啖咪逞救到世界？」死神一邊說完，一邊自以為幽默地掩嘴發出了尖聲的笑聲。
看著他這個模樣，若說他前生不是太監，恐怕也難以令人相信了。
 
「但係你又話除非救翻阿晴或者個旅程完哂，否則都唔會翻到嚟嘅？」我不解地問。
「我見你咁努力做咗咁多嘢，加上又係第一次穿越時空，咪俾個優惠你翻一翻嚟，做下賽後檢討先囉。」死神輕輕一飄就來到了我的身前。
「咁即係阿晴......？」
「係，依然係死嘅。」死神目無表情地回應。


「咁你做咩咁快拉我翻嚟啫，話哂我啱啱先搭到阿晴膊頭，如果你俾多少少時間我，我至少都可以欣賞多一陣佢個怕羞樣啊！」我略有不滿地說。
「嗱，愚蠢嘅人類，唔係我拉你翻嚟㗎，啱啱係你嘅回憶載點自動完結咗。簡單嚟講，其實回憶載點有兩個自動完結嘅原因。第一，就係你嘅穿越改變咗歷史，令到本身存在喺嗰一刻嘅『關鍵詞』消失，咁自然回憶載點就會回結。例如，『關鍵詞』係開心，但因為穿越最後令開心嘅事無咗，咁回憶載點就會馬上完結。」死神一如既往地耐心解釋。
「咁第二個原因呢？」我好奇地問。
「第二個原因好簡單，就係因為穿越嘅時間到，亦都即係歷史中嘅你喺嗰個時間訓咗覺。因為回憶載點係由大腦精神運作嘅時間點建立，所以若然你喺嗰一段本身就已經訓咗覺，大腦會進入休閒狀態，而回憶載點就會消失。所以只要一到歷史之中你嘅休息時間，回憶載點就會馬上消失。」死神再次解釋。
 
「既然都翻咗嚟啦，不如你俾我重新去多一次啱啱個載點啊！我而家知道咗要做啲咩，我相信今次再去成效會大好多㗎！」我自豪地笑了，深感向死神提出了一個好建議。
「正喎！咁好玩！去多次囉！」死神本來還在嬉皮笑臉，突然間卻變成厭惡的樣子：「你估而家去迪士尼咩？想去就去？我要話你知，所有回憶載點都只可以經歷一次穿越改寫。因為呢啲全部都係你嘅歷史嚟，如果經歷多於一次改寫，你嘅人生就等同於至少經歷三次同一個場景，到時候你嘅大腦就會因為回憶混亂而受到衝擊，最後會令到你思覺失調或者永遠失憶。」
聽到死神這樣說，我內心既是感到可惜，但同時又有一點欣喜。
可惜的是，在第一次的穿越中，我並沒有成功對歷史作出什麼重大的改變。
但欣喜的是，我至少在我的回憶之中加添了多一點與阿晴美好的經歷。


而且，我也對之後的穿越時空有了明確的目標。
我，要追到阿晴。
 
「有目標幾好啊。」死神突然從我的身前閃現到我身旁，手上拿著了一個不知從何而來的蘋果在吃著。
「點解你知我諗緊咩嘅？」我驚詫地問。
「愚蠢嘅人類，我話哂都有個「神」字喎，睇穿你諗咩呢啲能力濕濕碎啦。」死神一臉自豪地咬了一口蘋果，然後又說：「或者你會覺得你所改變嘅歷史唔多，但我會話你知，即使歷史只係偏移少少，但一旦軌跡改變咗，之後嘅命運可能都可以有好大嘅分別。所以，愚蠢嘅人類，既然未知之後將會點樣發展，不如就努力去改變每一次嘅歷史先啦。」
聽了死神的說話，我感到他其實是想要鼓勵我，所以向他報以帶著決心嘅微笑。
 
「好啦，休息完，又準備出發啦，之後落嚟就係連續八次嘅穿越載點。」死神的蘋果在不知不覺間已經吃完，「所以我順帶一提，若然八次嘅穿越最後都救唔翻阿晴，咁就代表佢再無可能再翻生，但因為陰間亦無位置俾佢，所以佢將會化作無主孤魂，天堂地獄都去唔到。簡單嚟講，就係只可以做一隻孤獨鬼。」
有了死神這番說話，我對於要在歷史中追到阿晴的決心就更大了。


是的，還有八次機會。
一定要把她帶回來。
 
「愚蠢嘅人類，出發去用盡全力咁去救你心愛嘅女人啦。」死神目光炯炯地看著我，似是在我為加添決心。
於是，我握緊了拳頭，深呼吸了一口氣。
然後，大叫一聲。
「天命最高！」
即使天命最高，但接下來，我就要逆天而行了。
 
強光冒起。
眼前一切事物全然消失。