私語施凌: 校園欺凌：串燒神偷
已經就快天光，我依然瞓唔著......
眼光光咁望住天花，腦海諗起呢半個月所發生嘅所有事。
雖然我應承咗二哥，話自己可以解決件事。但我其實依然好迷惘，唔清楚下一步應該點做。
我時不時望吓手機有冇msg，希望李綺恩可以主動向我解釋。如果佢肯向我解釋，我一定會願諒佢。但每一次望，結果都係令我失望。
我果然好傻......
雖然開頭只係我一時錯手放咗段片上某登，先令我捲入佢哋嘅校園欺凌。明明只係短短半個月，已經發生咗好多事，令我做咗好多以前唔敢做嘅事同決定。
我有冇後悔過？當然有......
但我經歷咗不平凡嘅半個月，我慢慢開始慶幸......自己當時嘅錯手。
喺呢半個月，李綺恩其實教識咗我好多嘢。佢提醒我去反抗、教識我去勇敢保護其他人、令我明白到......做朋友......原來係咁簡單嘅事。
我嘅優點，全部都係李綺恩話俾我知。因為佢，我先慢慢學識去欣賞同鍾意自己。
回頭一望，先發現一直自卑嘅自己，係幾咁好笑，明明我並唔比其他人差。所有簡單嘅事同道理，我居然而家先學識......
我唔後悔當時相信李綺恩，去咗應約......因為佢，先有而家嘅我。
而家嘅我，擁有識朋友嘅勇氣、可以依賴嘅家人、欣賞自己嘅能力......
我......並唔後悔啊......
我再次打開手機望，發現自己收到個msg，但並唔係李綺恩Whatapp我。
見到只係一位某登仔pm我，我失望嘅同時都有啲疑惑。pm我嘅某登仔叫串燒神偷，我對呢個名完全冇印象，應該冇喺post度傾過計。
串燒神偷同我say完hi之後，就直接send咗條google link俾我。我疑惑咁打開，裡面居然有之前我被學校刪除咗嘅片同埋整合咗陸雨琪佢哋呢班欺凌者嘅資料。
我嘅身體好似瞬間淋咗凍水，嚇到出曬冷汗。
報夢者：你係邊個？點解會有呢段片？
串燒神偷：唔自爆，段片同資料你想點處理由得你。我瞓陣先，早抖。
我唔知對方係邊個、點樣拎到呢段片、知唔知我真實身份......但對方send俾我嘅目的係咩？要我出post放上某登？點解要經由我手去爆料啊？一連串嘅問題喺我腦海度不斷徘徊。
拎返段片嘅我反而比剛才更加迷惘，我應該點做好......
時間喺我煩惱嘅時候不知不覺流逝，聽到雀仔嘅叫聲，我先意識到，天已經光啦。
我避開父母匿入廁所，換好校服，煩惱咁望住鏡裡面嘅自己。臉上嘅瘀青未退，依然好明顯。其他人一望就會發現，而家都唔知點返學。
「咚咚」門外傳嚟幾聲搞門聲，嚇咗我一跳。
「阿凌！搞掂未啊？」我聽到媽媽催我，但我唔敢出去。緊張嘅我握緊拳頭，思考應該點算好。
「咚咚」隔咗一陣，門外再嚟幾聲搞門聲。
「施凌，阿媽而家入咗廚房整早餐啊，快啲出門。」我聽到二哥把聲，即刻放心咁開門。
「落樓下等我，我好快搞掂。」二哥借佢頂cap帽俾我戴住，然後輕輕打開門，推我出門口。
「阿媽，我同施凌出去食啊！」二哥一邊擦牙洗臉一邊講。
「死仔！唔準啊！阿媽準備好曬又出去食，成日食街外嘢！而家仲要教壞你個妹！」媽媽準備發火，但二哥敷衍咁應幾句就出門。
我見到二哥順利落到嚟，都鬆咗一口氣。
「二哥啊......」我輕聲叫佢。
「點啊？」二哥打咗個喊露。因為太早起身，根本未完全醒曬，仲好眼瞓。
「你琴晚冇瞓咩？」我擔心咁望住佢眼底嘅黑眼圈。
「我黑眼圈好勁咩？真係羨慕你，後生唔瞓都冇黑眼圈。做老人家真係慘......」二哥覺得佢嘅眼皮攰到就嚟擘唔大。
「你都係得廿五炸，成日喺度扮老。而且你又知我冇瞓？」我雖然都好攰，但盡量扮到好精神咁反駁佢。
「唔好諗住呃到你阿哥我啊，我咩嘢都知嫁。」二哥自信嘅表情令我覺得好嬲又好笑。
以前因為同二哥性格相反，而且年紀相差大，令我每次同佢一齊，都覺得有壓力。我根本想像唔到原來我哋可以好似而家咁，相處得親近又自然，真係不可思議......
「得閒可唔可以再教我踩單車啊？」我期待咁問佢。
「吓？咁麻煩......今次我唔會咁易放過你嫁。無論跌到損手爛腳又好，阿媽求情都好，都一定教到你識為止。」二哥表情唔耐煩咁講。
「我知道啦！一定唔會再逃避......」無論學踩單車，定學校嗰邊都好......
「我聽住先啦！」佢拍一拍我個頭。
同二哥分開之後，我企喺學校門口深呼吸，做好心理準備。
將頭頂嘅帽除落嚟，放入書包。抬起頭，自然咁行入學校。我臉上嘅瘀青，吸引到唔少老師同學生嘅目光。我皺起眉頭，盡量唔去理佢哋，快步咁行返上班房。
一入班房，同學都停低手上做嘅嘢，驚訝咁望向我，對我竊竊私語。唔習慣成為其他人焦點嘅我，急步行返自己位。
「施凌，早晨。新髮型唔錯喎，幾得意。」沐宇航琴日已經見過我成臉瘀青嘅樣，所以並冇驚訝。
「多謝......」我知道佢讚我只係出於禮貌，但依然忍唔住怕羞。耳仔瞬間變通紅同灼熱，傻笑咁摸一摸自己嘅頭髮。
我放低書包冇耐，鄭老師就喺班房門外叫我：「施凌，出一出嚟啊。」
「係！」我喺同學嘅注視下，企喺身，一步步咁行出去。
「你成臉瘀曬，係咪被人恰啊？陸雨琪佢哋？」鄭老師拉我埋角落，輕聲問我。
因為李綺恩嘅事搞到好大，所以學校而家好重視校園欺凌嘅事。
「嗯。」我誠實咁點點頭。
如果係以前嘅我，應該會猶豫，唔敢篤陸雨琪佢哋出嚟。我仲會同情佢哋，怕篤完佢哋出嚟，佢哋會受罰。
但而家......心態好似唔同咗......
「唉......我再去話吓佢哋啦。好啦，你返去上堂啦。」鄭老師無奈咁嘆一口氣。
“話吓佢哋？咁話完佢哋之後，佢哋未會恰得我仲勁？就好似當初恰李綺恩咁......”呢個想法瞬間喺我腦海出現，令我諗得有啲入神。
「返去上堂啦，施凌！」鄭老師見我依然神情呆滯咁企喺原地，再一次開聲提醒我。
「呃......唔好意思啊。」我回過神，慌忙咁返課堂。
我上堂嘅時候心不在焉，腦海不受控制咁浮現咗好多諗法。
陸雨琪佢哋班欺凌者根本唔會怕俾老師話，俾人話完反而會變本加厲咁恰人。就算係上次佢哋俾人起底，佢哋都冇停止過欺凌呢個行為，反而將行動升級。
可以嘅話，我當然唔想任何人受到傷害。但如果唔想有下一個無辜嘅人被欺凌，我就一定要阻止佢哋。但問題係要點先可以阻止佢地呢？
點解永遠都係人善被人欺啊？我唔甘心......
“我要俾佢哋一個教訓，要報復佢哋，要佢哋親身試吓做被欺凌者嘅滋味......”好似有惡魔嘅聲音，不斷喺我腦海中徘徊。
我......果然好奇怪......
呢種感覺對溫柔善良嘅我嚟講，相當之陌生。令我恐懼嘅同時，又夾雜住興奮。
只要想像到陸雨琪佢哋將被欺凌者所承受嘅壓力全部體驗一次，我嘅內心就莫名興奮。
「施凌，你有冇事。」隔離嘅沐宇航擔心咁問我。佢無意中見我握緊拳頭，雙手微微抖震，以為我唔舒服。
「咳咳......我冇事。」我尷尬咁清一清喉嚨，其實我只係興奮到有啲手震......
我低住頭，控制住自己嘅表情，強迫自己冷靜落嚟。而家同以前唔同，短頭髮嘅我已經冇可能再借助長瀏海，將自己嘅表情同心事隱藏起嚟。
「冇事就好啦。」沐宇航鬆咗一口氣，猶豫咗一陣，向我提議：「放學不如一齊食串燒啊？」
沐宇航知道我最近狀態唔好，所以想約埋我食嘢，散吓心。雖然以前的確冇咩交流，但不知不覺間已經當咗我係自己嘅朋友。
聽到唔太熟嘅同學約自己，我其實想拒絕。不過聽到串燒兩個字，我就即刻諗起某登嘅串燒神偷。
我果然好在意串燒神偷......
到底佢幫我整合起底資料嘅目的係咩呢？佢係點樣拎到段片？真實身份係咪我識嘅人呢？所有嘅問題，我都想知道答案。
「施凌，你唔方便嘅話可以拒絕嫁。」沐宇航以為我唔想去，但唔好意思拒絕，所以主動俾落台階我。
「唔係啊......我可以去。」我沉思咗一吓，決定改變主意，應承佢。