私語施凌: 校園欺凌：解圍
「你係蠢材啊？連自己做過咩都唔知？」二哥粗魯咁揉亂我嘅頭髮。
「唉？」我呆滯咁抬起頭，我俾佢咁整一整，剛才嘅消極嘅心情全部都消散曬。
「你雖然人就蠢啲，但至少我哋全部人都睇到你嘅努力啊。而且已經成功救咗嗰位同學啊，唔係咩？」二哥望住我頭頂凌亂嘅頭髮同呆滯嘅表情，笑住咁講。
正常嘅施凌，根本唔會自己出夜街。都唔會咁大膽，完全唔理屋企反對，所以由細到大都係屋企人心目中嘅乖乖女。
因為今次咁冇交帶，先令所有人咁嬲。周老師剛才講施凌係為咗救人，所以先咁夜都急住走出去。二哥聽到之後，到而家都覺得不可思議。但諗深一層，佢會咁反抗，背後都係有原因。
有幾大嘅轉變，就代表住付出咗幾大嘅努力同勇氣。
「蠢材，快啲去瞓啊，晏就仲要一齊去學校。」二哥執返好啲藥水同膠布，準備離開。
「總之覺得自己冇錯嘅，就去做。如果做錯嘅話，之後再去做返啱佢。我哋全部人都會支持你，相信你。」二哥臨走時對我講。雖然佢同我平時未必好親近，但依然相信我嘅品性。
我瞓醒之後，依然覺得好攰，而媽媽已經準備好早餐俾我。
「你琴日救嗰位同學，冇事實在太好啦。不過好似幾大件事，睇吓，連新聞都有報喎。」媽媽拎手機新聞俾我睇。
“某登討論區尋人 網民齊救受欺凌少女”
我睇到標題之後，驚嚇到差啲連口裡面嘅早餐都噴出嚟。
「咳咳咳......」我努力想將卡喺喉嚨嘅食物咳返出嚟。
「咁唔小心啊。有冇事？」媽媽嚇咗一跳，幫我拍一拍背脊，令我舒服啲。
「蠢材，你又搞乜啊？」二哥喺廚房倒杯水，遞俾我。
「唔該......」我大口咁飲一啖水，冷靜返個人。
「你都係喺某登見個同學可能有事，所以先衝出去救佢？」二哥拎走我手上嘅手機，睇一睇個新聞。
「算係啦......」我心虛咁講。
「嗯......估唔到你都係某登仔喎......AC係咩啊？」佢一臉八卦咁問我。
「關你咩事啊！」我一臉緊張，怕佢知道我嘅某登AC。
「做咩咁緊張啊？」二哥探究咁望住我，然後開玩笑咁講：「一定出好多膠post，唔敢俾人知。」
「哼！」我都冇心情再理佢，專心去睇新聞嘅內容。越睇我嘅內心就越不安，身體都出曬冷汗。
新聞所講嘅某登post，果然就係我琴晚開嗰個。而且記者今朝已經即刻去學校，等校方出嚟回應。但校方表示校園欺凌嘅事都係剛得知，所以會查清楚事件，俾學生一個公道。
死啦......我好似又唔小心搞咗大件事......
「一陣全家一齊去見家長啊，我打咗電話俾阿遠，佢話今日都會過嚟。」見臨近中午，媽媽對我哋講。
越接近見家長嘅時間，我嘅表情就越忐忑不安。聽到全家都要一齊去，令我更加驚同緊張。
「又唔係去旅行，唔洗全家一齊去啦。」二哥開聲阻止媽媽。
「我都係擔心阿凌啊......」媽媽反駁佢。
「太多人反而會麻煩到老師，我一個陪施凌去得啦。」二哥講完之後，為免媽媽堅持跟埋去，佢轉身催促我：「行啦施凌！出門啦！」
「咁早出門？你哋兩個唔食埋晏先？」媽媽仲未嚟得切反應，已經見我哋兩兄妹要出門。
「我哋自己搞掂啊！」二哥好快就準備好，我都返房換校服出門。唔洗成家一齊去，我即刻鬆咗一口氣。
二哥望住一直沉默嘅我，輕聲問：「你好緊張？」
「有少少啦......」我語氣僵硬咁講。
「冇事，如果有啲嘢唔想俾人知，我會幫你保密。」二哥輕聲對我講。
「多謝二哥！」我感動咁抬頭望住佢。
原本我唔太鍾意二哥性格太我行我素，而且冇耐性，有啲火爆。而二哥佢同樣唔鍾意我性格太細膽同冇主見，所以兩兄妹一直以嚟都唔太親近。但佢今次咁細心，考慮到我嘅感受，令我感覺同佢之間嘅距離拉近咗唔少。
二哥唔習慣太肉麻嘅氣氛，所以笑住咁巢亂我嘅頭，然後快步咁行。我都唔介意佢喺街搞亂我個頭，扎返好頭髮，傻笑咁跟上去佢嘅腳步。
周老師已經將琴晚發生嘅事同校長講，校長都同意由周老師親自向我嘅家長解釋。
「其實校方已經商量過，件事好嚴重，所以我哋會見曬3D班所有同學，認真去處理。今次叫你哋嚟，係因為施凌都算係當事人，我哋想清晰了解返成件事，同埋我想向家長你解釋返。」周老師依然記得呢個性格火爆嘅二哥，所以講嘢都小心翼翼。
「施凌，你盡量將你所知道嘅都講曬出嚟啊。」周老師對我講。
「其實我知嘅並唔多......」我唔敢講太多，怕會唔小心講咗自己就係網上爆料嘅報夢者。
「唔緊要，知幾多講幾多就得啦。」周老師耐心咁安撫我。
我不安咁望住二哥，發現佢唔耐煩咁睥住我。嚇到我即刻另返轉頭，望住周老師。二哥最憎就係我優柔寡斷嘅性格，我都唔敢去激嬲佢，唯有唔提某登嘅事啦。
「我其實係上次幫完李綺恩之後，先開始同佢有交流。見到佢send咗段奇怪嘅msg嚟，好似想做傻事，我先嚇到跑落街搵佢，同埋打俾周老師你。」我盡量避開啲敏感字眼。
「咁你點解會知道李綺恩喺山上邊嘅？」周老師好奇咁問。
咁啱問正我唔敢答嘅問題，我完全諗唔到有咩藉口。所有人都等待我嘅答案，我嘅沉默令氣氛有啲尷尬，手心緊張到不斷出冷汗。
「嗰位同學同阿凌提過嗰個地方啊，所以佢未試吓去搵。」二哥突然開聲講，我聽到之後震驚咁望住佢。
「阿凌琴晚同我講嘅。」二哥再補充一句，然後偷偷對我打咗個眼色。
二哥佢......點解要幫我解圍......
周老師都冇特別去懷疑，只係再補充講一吓佢所知嘅事。
當提到我匿埋偷拍李綺恩被欺凌嘅片，二哥用充滿探究嘅眼神望住我。而我冷汗都一直冇停過，好想快啲見完家長。
喺返屋企嘅路程，我同二哥都沉默不語。我加快腳步，而家只係想快啲返屋企。
「施凌，你就係報夢者？」二哥突然打破沉默。
「點解......你會知......」我抬頭驚恐咁望住佢。
「唔肯定嫁，純粹講吓。」二哥擺一擺手，佢原本只係懷疑，都冇足夠嘅證據，但而家已經唔需要證據啦。
我驚覺自己唔小心承認咗，都好後悔自己多口，而家唯有諗點去解釋啦。
「其實你講大話咁垃圾，好難唔發現喎。」二哥取笑我。
「你唔嬲咩......」我輕聲咁問，小心翼翼咁留意佢嘅情緒，發現佢仲可以笑得出。
「嬲咩啊？嬲你唔識講大話？」二哥再次伸手，笑住咁巢亂我個頭。
「唔好玩啦！」我好嬲咁想拍開佢隻手，阻止佢嘅動作。
「衰妹啊......居然識發惡反抗？」二哥冇收手，反而更加粗魯咁巢我個頭，搞到我扎好嘅髮型成個鳥巢咁。
二哥笑夠之後，細聲感嘆：「大個女啦......施凌......」
「好！今晚二哥請食飯，想食咩快啲講！」二哥心情睇落好靚，令我覺得好奇怪。
「唔得，今晚大哥返嚟食啊，媽咪應該已經煮好飯。」我諗都唔諗就拒絕。
「我send咗msg同阿媽講，就算要鬧都有二哥我幫你頂住。你可以放心喎，行啦！」二哥對搖一搖手上嘅手機，然後推住我向前行。對住我行我素嘅二哥，我真係好頭痛。
其實二哥喺一開始因為好奇，上某登搵返報夢者嘅post睇，已經發現施凌好可疑。明明佢話自己係因為睇完報夢者嘅post先落街搵李綺恩，但報夢者嘅開post時間係喺我跑落街之後。
我講嘅說話有太多可疑嘅地方，但二哥冇因為我講大話而嬲。聽完周老師講嘅嘢之後，反而覺得有啲驚喜，我居然咁大膽。
原來自己個妹喺不知不覺間，不斷去成長。變得勇敢，令二哥覺得有啲陌生。
如果係其他人起底，二哥一般都係抱住食花生嘅態度。但今次起底同我有關，佢返到屋企，即刻追返曬報夢者所有嘅留言。
今次起底嘅其實並唔係我，我純粹放咗身一條欺凌片上去，之後再講少少陸雨琪佢哋壞話。
二哥見開頭陸雨琪佢哋被人起底，我仲留言想阻止，結果俾某登仔瘋狂負皮，睇到都想笑。
二哥並唔覺得起人底係好事，但我都係出於冇心。而且出發點都係善良嘅，事後都好後悔。
身為阿哥，佢只能夠默默咁睇住個妹去成長。確保能夠保持住單純善良嘅本心，否則佢一定會出手阻止。
明明原本佢係咁諗......
當二哥見報夢者留言話自己都俾陸雨琪恰過，佢嘅怒火即刻湧上嚟。