私語施凌: 校園欺凌：要暴露身份？
我一直跑，跑過咗李綺恩屋企樓下，跑過咗學校，跑過咗公園，全部都見唔到李綺恩嘅身影。
我一隻手捉實自己嘅電話，一次又一次咁打李綺恩嘅電話號碼，但依然冇人聽。
「聽電話啊！求吓你！」我無助咁對住冇人接聽嘅電話哀求，心情已經急躁到有少少失去理性。
"冷靜啲啊！施凌！一直盲目咁跑都係冇可能搵到李綺恩嫁！"我舉起自己另一隻，用力咁拍打幾吓自己嘅臉頰。利用火辣辣嘅痛感，強迫自己冷靜落嚟。
冷靜咗之後，我拎起手機打電話俾周老師，老師講過，有咩事可以搵佢幫手。
「喂？」喺電話對邊，傳嚟周老師熟悉嘅聲音。
「周老師......」我聽到令人安心嘅聲音之後，心裡邊嘅委屈好似瞬間湧上嚟。連聲音都有少少抖震，好似下一秒就會喊出嚟。
周老師唔知對方係邊個，但聽到對方抖震嘅聲音之後，呆咗幾秒。突然諗起今日曾經俾過自己電話號碼學生，叫佢有事搵佢，估唔到咁快。
周老師猜測咁問：「你係施凌？發生咩事啊？」
「李綺恩佢send咗段好奇怪嘅信息俾我，之後我一直打電話俾佢都冇人聽，我懷疑佢要做傻事啊。我而家四圍搵佢，我想麻煩老師你都幫手搵佢屋企人，睇吓知唔知李綺恩喺邊。」我深深咁吸一口氣，盡量忍住自己嘅情緒，冷靜咁解釋。
「好！你自己都要小心啲，唔好去危險嘅地方，有李綺恩消息即刻通知我啊！」周老師意識到事情嘅嚴重性，急速咁講完就收線，再打電話俾李綺恩嘅家人。
"之後我應該去邊搵？做啲咩好啊？"聽完電話，我迷惘咁企喺路中心望住手機。我覺得自己真係好冇用，自己一個就咩都做唔到。
我喺手機睇到某登嘅笑臉公仔，下意識咁撳入去。其實搞咗咁大件事出嚟，我已經決定唔再用某登。但我自己一個處理唔到，我需要人幫手。雖然內心有啲掙扎，但而家最重要係搵返李綺恩。
我喺某登再次開第二個post，但今次唔係起底post，而係尋人post，希望啲某登仔可以幫手搵李綺恩。
我開post幾秒後，已經有某登仔留言話落街幫手搵。我好感動，連搵得返李綺恩嘅信心都增加咗。
某登仔根據之前起李綺恩底嘅相，猜測出幾個佢會去嘅地方。其中一張相係李綺恩同之前俾人起底男仔嘅行山合照，相中李綺恩燦爛嘅笑容，令我覺得好遙遠，好似已經好耐冇見到啦。
背景係喺山上邊？李綺恩有可能喺嗰度？
呢座山距離我而家嘅位置並唔遠，但我從來冇試過行夜山。雖然我記得周老師剛才叮囑我唔好去危險嘅地方，但為咗搵返李綺恩，我決定試吓上去搵一搵。
好凍，而且前邊暗到幾乎睇唔到路。冷風吹過，樹葉喺寧靜嘅夜晚，發出「沙啦沙啦」嘅聲音，令四圍氣氛更加陰森恐怖。
好驚......
我用手機電筒照一照幽暗嘅山路，心裡嘅恐懼令我忍唔住退後一步，想離開。冷風吹到我塊臉有啲僵硬同刺痛，身體都不停咁抖震。
"可能李綺恩未必喺山上邊，我去其他安全啲嘅地方搵比較好。"我轉身想離開，但又猶豫不決。
而家搵返李綺恩先最重要......我忍住自己後退嘅欲望，咬緊牙關，向住上山嘅路跑。
好攰，隻腳跑到好酸好痛。我好似哮喘咁，大口大口咁呼吸四圍冰冷嘅空氣，空氣凍到我嘅鼻腔都開始剌痛。我嘅速度開始不停減慢，好似隨時會跌倒瞓低。
好辛苦......好想停低休息......
但我唔敢停低，我好怕自己以後會後悔。我喺自己十五年嘅人生裡面，第一次識到朋友，第一次咁渴望去改變自己，我先唔想咁容易就放棄。
前邊嘅山路開始崎嶇難行，我吞一吞口水。一隻手捉緊自己嘅手機，另外一隻手輔助自己保持平衡，不停咁向上爬。
「哎呀！」我一直專心留意住腳下嘅路，頭一時唔注意就撞到粗大嘅樹幹。
好痛......我揉一揉自己嘅頭，繼續小心咁向上爬。我雖然怕，但喺自己不斷安慰自己嘅情況下，其實已經開始慢慢改變同成長。
居然單憑自己一個，爬到上山，我之前係諗都冇諗過。仲差少少，我努力咁堅持行埋上去。
終於見到喺山頂嘅石頭上邊，好似有一個身影，我用盡住力大叫：「李綺恩！」
對方聽到之後好似被嚇到，身體微微一震，緩緩咁轉過身，驚訝咁問：「施凌？點解......」
果然係李綺恩！
我想加快腳步向前跑，但雙腳一軟，就跌跪喺地下。碎石有部分劃破我嘅皮膚，腳上傳嚟嘅痛感，令我有返少少真實感。
「施凌！你有冇事啊？」李綺恩見我跌倒，即刻緊張咁跑過嚟想扶起我。
我冇抬頭，而係伸手推開李綺恩，佢被我推開之後表情好驚愕。
「點解啊？點解要send嗰段奇怪嘅msg俾我，之後又要玩失蹤？」我心裡一直強忍住嘅委屈好似水一樣，瞬間滿瀉。有啲嬲李綺恩，佢嗰段msg真係嚇親我。
「對唔住......」李綺恩慚愧咁對我講。
「你唔係要對我講啊！」我大聲咁打斷佢嘅說話，但自己講完之後都被自己嚇到，有啲呆滯咁抬頭望李綺恩嘅反應。
我一時衝口而出，語氣好差，我講完之後即刻就後悔啦。心虛咁低下頭，避開李綺恩嘅目光。
「你肯嚟搵我，我好開心。」李綺恩見我手足無措咁，安撫咁對我笑一笑。
「可唔可以做聽眾，聽吓我放負啊？」佢對我伸出手，等待我嘅答覆。
「好！」我怕羞咁拍一拍手上嘅泥沙，然後想用自己件衫抹乾淨，但被李綺恩阻止。
「你隻手跌損咗啊，我幫你搞搞先。」佢望一望我嘅手掌，輕柔咁拖住我去石頭度坐低休息。然後拎一樽清水同紙巾出嚟，幫我手同腳嘅傷口做簡單嘅清潔。
「唔該你啊。」我咬住牙坐好，忍住清水流過傷口嘅刺痛感。
李綺恩見我怕痛，都盡量減輕動作。佢幫我處理完之後，有啲感嘆：「施凌，其實我一直都好羨慕你嫁。」
我聽到之後滿臉疑惑，覺得佢呢句說話完全係不可思議。
「你唔好講笑啦，你人又靚，人緣咁好，明明更加值得人羨慕......」我有啲尷尬咁傻笑。
喺我眼中嘅李綺恩係最接近我理想中嘅自己，人又靚，口才又好，又多朋友......同我完全係兩個世界嘅人一樣。所以我諗唔到自閉又陰沈嘅自己，有乜值得人欣賞同羨慕。
「我冇講笑，雖然你平時好少嘢講，又成日自己一個。但你完全唔在乎其他人點睇，做返真正嘅自己。性格又溫柔，成日唔計較，默默咁去幫人。」雖然李綺恩真正同我相處嘅時間並唔多，但我喺班裡面所做嘅，其實都有人睇到。
我聽到佢咁讚我，其實自己都有少少心虛。我成日自己一個，因為我唔識同人相處，唔係因為唔在乎其他人睇法。我成日幫人，係因為唔識點去拒絕其他人。
「反而係我......人緣好，多朋友又點啊？而家都走曬......」李綺恩表情好受傷咁，我怕自己講錯嘢，唯有沉默。
「你知唔知我上次點解話要多謝'報夢者'啊？」李綺恩轉過頭問我，我輕輕咁搖頭，表示自己唔知。
「我真係好鍾意嗰個男仔嫁，但根本唔知道原來陸雨琪都鍾意佢，而且佢仲同好多女仔有曖昧。無論其他人講咩，我都冇懷疑過佢。但多得'報夢者'，我先識得去醒。」李綺恩突然講起感情問題，令完全無感情經驗嘅我覺得好唔自在。
「而家嘅我，已經好似搵唔到目標咁。朋友、同學、我鍾意嘅人，已經咩都冇曬啦......」李綺恩強忍住嘅眼淚，終於由眼眶滿瀉出嚟。
「咁我呢？你唔係講過我係你朋友咩？」我又再一次衝口而出咁問佢。
李綺恩聽到之後呆滯咁望住我，連眼淚都唔記得再流出嚟。呆咗幾秒，先忍唔住笑出聲：「哈哈哈哈......施凌，你真係好可愛。」
「吓？」我見到李綺恩爆笑，先發現自己好似講咗句自我感覺良好嘅說話，臉同耳仔瞬間紅曬。
「係啊，我而家多咗你呢個朋友。」李綺恩盡量忍住臉上嘅笑容。
「唉？嗰邊有兩個人，係咪李綺恩？」
突然喺我同李綺恩身後傳嚟幾個人行山者嘅聲音，打斷咗我哋嘅對話。我哋好似聽到李綺恩個名，所以注意力即刻集中喺嗰幾個人身上。
「李綺恩？」幾個行山者走到我哋面前問。
「我係，你哋識得我？」李綺恩思考咗一陣，確定自己唔識呢幾個人，所以奇怪佢哋點解可以講出自己個名。
「我哋喺某登見到'報夢者'開咗個尋人post，話你可能會做傻事啊，所以未出嚟試吓搵你。」其中一個行山者講。
「又係'報夢者'？」李綺恩低聲咁自言自語。
起底事件發生之後，李綺恩其實已經開始留意某登，佢一直懷疑'報夢者'就係同班同學。而且睇'報夢者'嘅留言，發現佢會幫自己講好說話，所以陸雨琪佢哋先會誤會'報夢者'就係自己。
李綺恩努力回想班上面每個同學，邊個會比較大機會係'報夢者'呢？
我聽到佢哋提'報夢者'嘅時候，即刻心跳加速，好怕被人發現我係'報夢者'本人。我見李綺恩低頭思考，突然抬頭望我。我嚇到好似被淋凍水一樣，瞬間出曬冷汗。
「係喎！我都唔記得通知返周老師，話已經搵返你。」我即刻轉移話題，逃避佢哋嘅視線，打電話俾周老師報平安。
我同李綺恩跟住嗰幾個熱心嘅某登仔一齊安全咁落山，分別嘅時候，李綺恩對佢哋講：「多謝你哋啊。我害你哋咁膽心，真係唔好意思。」
「下次唔好做傻事啦，仲有好多人都好關心你。」
「係啊，'報夢者'為咗你，都做咗好多。」
「而家咁夜，你哋兩個女仔返去都小心啲啊，再見。」
嗰幾個某登仔每次提起'報夢者'，我都嚇一嚇。雖然好感激佢哋咁熱心，但我都想佢哋快啲走，再講得多我怕自己身份會俾李綺恩發現。