私語施凌: 校園欺凌：懦弱者
某登仔雖然將個男仔同李綺恩嘅資料起埋底，但佢哋主力去攻擊嘅目標都係陸雨琪，同埋一班嘅欺凌者。
幾靚仔......但好MK......個男仔......
我撳開佢嘅 Facebook 同 IG 睇，基本上已經冇曬嘢睇。喺個男仔發覺自己被人起底之後，已經即時刪曬啲相。
不過有唔少快手嘅某登仔一早cap好曬圖，放返上去個post度。個男仔唔只朋友多，而且成日四圍去玩，好充實嘅生活。
果然，佢哋全部人都好似同我嚟自唔同嘅世界。
某登仔佢哋明明大部分都係唔識佢哋，偏偏對件事一個比一個熱心，連post都爆咗好幾個。我開頭都係，興奮咁睇曬咁多嘅資料。但冷靜過後，就發現自己好迷惘。
有資料又如何，我要拎嚟做咩？
#932. 個男仔係溝女王嚟嫁，佢保持住單身，一直釣住一大班女兵
溝女王啊？
我見到個男仔啲MK相之後，打咗個冷震。我最怕就係呢類型，感覺上好難同佢哋相處到。
我並未將今晚拍嘅片放上網公開，心裡邊猶豫不決。上次我放片上網，已經搞到咁大件事。今次事件熱度未退，而且呢條片比上一條更嚴重，我真係唔夠膽再放上某登。
我而家最擔心嘅係，如果網上邊講嘅嘢係真，咁李綺恩知唔知呢件事。我並唔討厭李綺恩，所以都唔想睇到佢因呢件事而受傷。
再次返學，已經係兩日後。我依然踏正響鐘先返課室，望向李綺恩嘅座位，發現佢未返嚟。
遲到？請假？
難得星期六日放假，但我依然冇咩心情，一直都好擔心李綺恩。一直等待星期一來臨，可以睇吓佢嘅情況。見到佢未返嚟，我都有少少失望。
「3D班施凌同學，請而家即刻到教員室。」廣播突然叫我嘅名，令我有啲驚訝。但我都唔理太多，即刻起身去教員室。
「咚咚」
我敲一敲教員室嘅門，一開門就見到副校長，訓導主任等幾個老師都在場，氣氛好嚴肅。而李綺恩都喺度，低住頭，外露嘅皮膚同臉部仲可以見到未退嘅瘀青。
「老師，早晨。」我見佢哋目光轉曬去我身上，我緊張咁上前打招呼。
老師們對我點一點頭，然後直接進入正題：「施凌，你可唔可以講返星期五晚發生嘅事啊？你應該都在場。」
「我有拍到當時嘅情況......」我主動拎出手機，打開星期五晚拍到嘅片。希望可以做證據，令學校主持公道，保護返李綺恩。
「好，既然係咁，施凌你帶手機返學就唔追究。但你嘅手機暫時交俾我哋保管先，你哋而家返課室上堂先。老師睇完之後，自然會還李綺恩一個公道。」副校長一臉嚴肅咁接過我嘅手機。
「知道副校，拜託你哋啦。」我發自真心咁彎腰鞠躬，將所有希望交曬俾佢哋。
「多謝你......施凌......」李綺恩已經同我講過好多句多謝，因為佢都諗唔到，除咗多謝以外嘅說話。
「嗯......」我都唔善長講嘢，唯有含糊咁帶過。
我拖住李綺恩嘅手，同佢一齊行返班房。我哋一路上都沉默，李綺恩嘅手好冰冷。我將手再捉緊一啲，想將自己嘅溫度由手心傳俾佢。
行到班房門口，我因為怕同學見到會誤會，會將怒火轉移到我身上，最後我都係鬆開咗李綺恩隻手。李綺恩有少少失落，但佢都可以理解。
我同李綺恩一前一後行入課室，部分同學以懷疑嘅目光望住我。我返到座位，就一直低住頭扮睇書，努力無視佢哋嘅目光。
「喂，搞咩啊？你點會被叫出去嫁？」坐我隔離位嘅沐宇航低聲問我。
雖然同施凌做咗同桌咁耐都冇咩點交流，但都知施凌只係唔識同人相處，其實人係好好。
「冇事......」我有啲緊張咁講。
「冇事就好啦，你都要注意吓。陸雨琪佢哋一直望住你呢邊，你唔好再同李綺恩行得太埋。」沐宇航真心有啲擔心平時與世無爭嘅施凌會捲埋入陸雨琪佢哋嘅私怨，所以先好心提一提佢。
「我知道......」我知道啊，但可以點啊？要我見死不救啊？我真係做得到咩？
其實我當初都係想見死不救嫁，我真係唔想捲入呢件事。但喺一開始多手放陸雨琪佢哋段片網嘅一刻，我注定走唔到。
我都想走，都想遠離佢哋，回復返自己事不關己嘅生活態度。但係已經跳咗入去，真係咁簡單可以話走就走咩？
一放小息，陸雨琪為首嘅幾個同學走過嚟我嘅座位，圍住我。
沐宇航見到之後，企起身將位置讓俾佢哋。佢路過我嘅時候，偷偷地拍一拍我嘅背脊為我打氣。佢冇回頭，直接就走落樓下買嘢飲。
沐宇航自問只能夠幫到咁多，唔理施凌聽唔聽佢嘅忠告，佢都控制唔到。
我低住頭扮專心睇書，扮留意唔到佢哋。
「砰！」
陸雨琪大力咁用手掌拍落我嘅枱面，全班嘅氣氛即刻變得好緊張，靜默無聲。我合埋手上嘅書，鼓起勇氣，抬起頭直視佢哋。但微微抖震嘅雙手，已經將我嘅內心出賣咗。
「施凌，今朝老師叫你出去，同你講啲咩啊？」陸雨琪半威脅咁問我。因為星期五晚嘅事，有街坊向學校投訴，佢哋幾個都俾老師叫過去傾計。
不過明明星期五晚施凌並冇出現，點解連佢都會俾老師叫出去傾呢？
「冇咩特別......老師關心一吓我屋企嘅私事，唔方便喺度公開講。」我一緊張，就會好自然咁講對自己有利嘅大話。我估唔到自己呢個缺點，喺我危急嘅時候反而幫到我解圍。
「真嘅？」陸雨琪用懷疑嘅目光望住我。
我勇敢咁直視佢，佢哋啲表情都放鬆咗唔少，睇怕都信咗七八成。好彩我天生就一個無辜無害嘅外表，雖然唔習慣講大話，但講咗都好少俾人發現。
「要我信你都可以嘅......」陸雨琪突然諗到新嘅計劃，擺出一個神秘嘅笑容。
陸雨琪低下頭，喺我耳邊細細聲講：「我哋一陣體育堂，你搵機會偷李綺恩嘅銀包、鎖匙同電話嚟，我要睇佢冇曬啲嘢仲點返到屋企。」
「吓？」我震驚咁抬起頭，下意識想拒絕幫佢哋做壞事。
但我嘅拒絕並冇講出口，「咕嚕」一聲，連埋口水吞返落個肚。因為拒絕咗之後嘅後果，我唔敢去想像。
我冇開聲講應唔應承，但有微微點一點頭。
「哈哈哈......」陸雨琪佢哋見到我點頭之後，滿意咁笑住離開。
佢哋好期待一陣間嘅惡作劇，高高在上咁睇其他人痛苦而又無能為力嘅表情，令佢哋產生一種快感。好似吸毒咁，不知不覺間令佢哋上癮。
我聽到佢哋嘅嘻笑聲之後，突然覺得有啲屈辱。我臉色發白，緊緊咁咬住牙，用力到好似想將牙咬碎咁。我覺得懦弱嘅自己簡直好似一個小丑，好易俾其他人玩同利用。
我認我係細膽懦弱，但我一直都相信自己。我做事永遠都會堅守自己嘅原則，唔偷唔搶，唔去害人。無論遇到咩事都好，都要堅守住。
但我錯啦，我錯在信錯咗自己。
一邊係自己嘅原則，一邊係恐懼......
自己一直堅守嘅原則，最終都係輸俾自己嘅恐懼，自己嘅懦弱。我簡直係垃圾都不如......
我心虛咁抬起頭望向李綺恩嘅方向，發現佢都擔心咁望向我，怕連累我。
我同佢對視之後，即刻低下頭，想逃避佢嘅視線。而家我對自己嘅厭惡感已經到咗極致......
我一直心不在焉咁上堂，不知不覺到上體育堂嘅時候。我跟住同學一齊離開課室，去操場上堂。
我根本諗唔到方法自己一個留喺課室，實行陸雨琪佢哋嘅計劃，所以我都係想算啦......我嘅心一直喺度猶豫。
陸雨琪佢哋見我一直都冇行動嘅意思，所以都開始急躁起嚟。
「老師，施凌好似有啲唔舒服，上唔到體育堂。」其中一個同學舉手同體育老師講，而我發白嘅臉色，都印證咗佢哋嘅講法。
「咁施凌一陣上體育堂，坐喺隔離睇得啦。」體育老師見到我臉色之後，擔心咁講。
「老師，外邊天氣咁凍，一陣間施凌病得嚴重咗點算啊？不如俾佢留喺課室，睇下書仲好啦。」嗰位同學不停幫我製造機會留喺課室。
老師最後都應承咗準我留喺課室，而家課室得返我一個人。佢哋製造曬機會俾我，如果失敗咗，恐怕一定唔會放過我。
我一步一步咁行去李綺恩嘅座位，我覺得每一步都異常沉重。