私語施凌: 校園欺凌：被欺凌者
漆黑嘅房間裡面，房間嘅門縫透住外邊客廳嘅燈光。客廳傳嚟電視同家人對話嘅聲音，好熱鬧。佢哋並冇注意到，正喺房間熟睡嘅家人有任何異常，只係當佢太眼瞓。
而房間嘅床上面，我將自己全身，包括頭都埋喺被鋪下。如果仔細聽，可以聽到微弱嘅抽泣聲。
如果可以就咁焗死自己就好啦......
真係好想趁住屋企人瞓曬，喺露台直接跳......
每晚我入睡前，都會幻想自己以唔同嘅方式離開呢個世界。咩自殺方式最快，最簡單，又唔會太辛苦呢？
我好討厭自己，永遠都只係空想，連少少實行嘅勇氣都冇。
每晚我入睡前，都會反覆諗返起唔開心嘅回憶，而偷偷喊。我唔想俾家人同其他人發現咁懦弱掉臉嘅我，所以都會扮到好早瞓覺。
我其實並唔鍾意瞓覺，因為一擘大眼已經係朝早。我每朝都祈望自己嗰日會頭暈身㷫，咁我就可以請假，唔洗返學。當然每次量完體溫，都係失望會比較多。
我見時間冇多，先慢吞吞咁背起書包，行返學校。我想呢段路程可以永遠都行唔完，但根本冇可能。行到班房外邊，我已經聽到一班同學熱鬧嘅嘻笑。
我好討厭其他人嘅笑容同嘻笑聲，都討厭其他人望住我，因為總係覺得佢地喺度恥笑我，我對自己好自卑。
我自己知自己事，人又生得唔靚唔可愛，性格又內向自閉。同任何人都無可能熟，平日喺學校一日都唔會講超過十句嘢。回想自己呢十幾年人生，都好似諗唔起自己有邊幾個朋友。
我鼓起勇氣，入到班房，發現自己嘅座位已經俾班上一個人氣好高嘅女仔坐咗。我見陸雨琪坐咗自己個位，我自己又唔敢坐其他人嘅座位，一時之間有啲手足無措同尷尬。
「喂，施凌返咗嚟啦。」正喺度同陸雨琪傾計嘅同學，李綺恩想暗示叫佢一齊轉其他位置傾計。
「唔洗理佢啦，未由得佢企喺度囉。哈哈哈......」陸雨琪一向都睇我唔順眼。因為我性格細膽懦弱，發生任何事都好似一臉委屈嘅表情，永遠都係所有人眼中嘅弱者。
而喺陸雨琪眼中，我只係一個小丑，任人欺負都唔敢反抗。喺我身上，佢感覺到前所未有嘅優越感。
我只能夠尷尬咁企喺原地，好似罰企咁。有啲同學以同情嘅目光望住我，有啲就喺度偷笑。直至上堂嘅鐘聲響起，我先返去自己嘅座位。
夠啦！唔好再望住我！唔好留意我！我只係想消失......
我低住頭，扮睇書，隱藏起自己陰森嘅表情。
每日都做重複嘅事，每日都係同樣嘅心情。對上一次心情好，都唔記得咗係幾耐之前嘅事啦。
每日返學校都好似小丑一樣俾人開玩笑，我好唔甘心。明明我咩嘢都冇做過，我只係想做一個低調嘅透明人。點解啲小學雞要嚟打擾我，嚟拎優越感啊，真係煩。
直到有一日，我發現大家嘅欺凌對像變咗做原本陸雨琪嘅好朋友，李綺恩。而欺凌嘅手法已經唔再係冷暴力，而係更加嚴重。
李綺恩係個好潮好靚嘅女仔，同我完全係兩個世界嘅人。佢原本係陸雨琪嘅好朋友，所以都算係班裡面嘅中心人物。我同佢同班咁耐，都未講過一句嘢。
當同學突然集體轉向欺凌李綺恩，我覺得好奇怪。我一直喺班上都冇朋友，所以自己唔會知道咁多班裡面嘅事。我拎起手機，打開已經好耐冇入去睇過嘅班群。見到陸雨琪琴晚send咗一條片出嚟，我心血來潮打開嚟睇。
「李綺恩！搶人男朋友啊！」
「你係咪覺得自己好靚借？」
片段中，幾個女仔，包括陸雨琪都圍住李綺恩拳打腳踢，對佢講啲好難聽嘅說話。四圍嘅人冇諗過出嚟幫李綺恩，而係喺周邊幸災樂禍。
我只係透過片段，都可以感受到李綺恩當時有幾痛同幾無助。我睇完之後，當晚完全瞓唔著。雖然唔知佢係咪真係搶人男朋友，但見佢被人校園欺凌，我望佢嘅眼神都流露出些少同情。
「哈哈哈......」
真係討厭嘅笑聲，我喺樓下已經聽到。突然一隻女裝皮鞋喺我頭頂跌落嚟。好彩我行慢一步，唔係一定正中我個頭，我唔耐煩咁抬起頭。
樓上嘅陸雨琪見差啲掉中嘅人係我而唔係其他人，即刻放心，繼續同其他人嘻笑。
我默默將鞋執起，企埋一邊等待鞋嘅主人。果然見到李綺恩只係著住一隻鞋，緊張咁喺樓梯跑落嚟。搵唔到自己隻鞋，佢無助咁蹲喺地下，眼淚忍唔住一滴一滴咁流出嚟。
而樓上嘅同學見到之後，反而更加開心咁歡呼。我冇打算喺同學面前出去幫李綺恩，如果幫佢，連我自己都會被人重點欺凌。等到上堂鐘響起，同學返入課室，我先行出嚟。
「呢隻鞋係你嫁。」我行埋去，將隻鞋還俾李綺恩。佢冇估到居然有同學肯幫佢，仲要係平日內向自閉嘅施凌。
「多謝你......」李綺恩有啲若寵受驚，佢以前嘅自信耀眼，喺經歷咗呢一個星期被欺凌嘅日子之後，已經消失得七七八八。
我還完俾佢之後，就直接越過佢，急步返課室，都唔想同佢有太多交流。
「施凌！以前你俾班上邊嘅同學恰同笑，但我冇幫你，真係對唔住啊！」李綺恩見我要走，即刻叫住我，講出自己心底嘅說話。
「點解要同我講對唔住？」我因為佢嘅道歉而停住腳步，內中充滿疑惑。
其實我一直唔討厭李綺恩，佢並唔算一個欺凌者，最多只係一個旁觀者。呢一點我係分得好清楚，所以我諗唔到佢對我道歉嘅理由。
我被同學冷暴力同排擠，其實我都好清楚自己嘅內向性格係主要原因。比起其他人，我更加討厭自己。
我對李綺恩依然有啲警惕，單單望外表，已經知我哋兩個係唔同世界嘅人。我會懷疑佢同我道歉，係咪因為當咗我係一個同樣被人排擠嘅同伴，我唔需要人同情我。
「你......其實有冇諗過反抗？」李綺恩講完，自己都覺得冇呢個可能性。佢呢個問題雖然係喺度問我，但同樣都喺度問佢自己。
「反抗？」我當然有諗過啦，我經常喺個腦度幻想。幻想自己變勇敢，講出自己內心嘅諗法。幻想自己改變之後，識到好多好多朋友。改變係需要大量嘅勇氣，但我一啲都冇。
雖然我好清楚要改變係冇太大可能，但李綺恩嘅呢句說話，居然令我內心開始動搖。上堂嘅時候，我偷偷用手機打開某登討論區，開咗一個新嘅帳號。再開個post，將李綺恩俾陸雨琪等人欺凌嘅片放上去。
不過我嘅手指遲遲唔敢撳確定發送，因為我內心依然動搖得好勵害。我雖然係想陸雨琪佢哋受個教訓，但放上討論區俾人公審嘅話，又好似太過分同嚴重咗。
我嘅內心掙扎咗一陣，先發現自己始終都係冇呢個膽量，手指轉向取消鍵嘅位置，準備撳落去。
「施凌！」突然鄭老師嚴厲咁叫我個名，嚇到我成個人彈起。手指都唔小心撳咗確定發送，我震驚咁望住手機成功發送嘅頁面，雙眼瞪大，口都嚇到唔記得合埋。
「而家上堂你仲喺度睇手機？放學你嚟搵我拎返，而家專心啲啊！」我仲未回過神，鄭老師已經憤怒咁一手搶咗我嘅手機，直接撳關機。
其他同學幸災樂禍咁偷笑，我有啲內疚咁望向陸雨琪，發現佢小人得志嘅表情。應該係佢向鄭老師供我出嚟，我而家個腦都好複雜。
「施凌！你仲四圍望？咁鍾意望就企喺身，俾你望曬全班！」鄭老師再一次打斷我嘅思緒，罰我企喺身。四圍嘅同學都望住我偷笑，令我尷尬到臉都紅曬。
“算啦，應該冇咩事嘅，個post好快會沉底。”我內心不斷安慰自己。
跟住落嚟嘅堂我都係心不在焉，完全集中唔到。放學之後，我即刻去教員室想拎返部手機。俾鄭老師訓話咗成個鐘，終於可以離開。
我一出學校門口，就緊張咁打開手機睇某登。發現我剛才嘅post居然上咗熱門，仲好多人俾正皮，証明已經好多人睇咗。
#2. 哇～又一個牛丸姐
#15. 等起底
#38. 打人嘅係藍田中學嘅陸雨琪，張梓晴，陳嘉敏
#47. 救樓豬同樓上老母，補返相，同幾個人嘅ig
個post只係短短半日，已經有五百幾個留言，而且過千正皮。某登仔喺頭五十個留言內已經將片段中打人嘅三個人起曬底，好有效率。
“好似過分咗......”見到陸雨琪等人因我而被人起底，佢哋被某登仔講咗好多難聽嘅說話。對佢哋嘅外表，平日行為性格，甚至講埋佢哋嘅家人。我內心總有啲不安同內疚，應該唔會有事掛......
我一邊睇住手機裡嘅留言，一邊心不在焉咁行返屋企。其間差啲喺紅燈行出馬路，被學校嘅周老師拉返上行人路，令我回過神。
「行路要專心啲，唔好睇手機，好危險嫁。」周老師並冇嚴厲咁教訓我，而係溫柔咁拍一拍我個頭。周老師喺我哋學校教中文，一向對學生好好，好受學生歡迎。
今日我居然同咗咁多人講嘢，令我有啲若寵受驚。我紅住臉道歉，就快步行返屋企。因為有些小開心，我嘅腳步比平時輕快。
#339. 樓豬去咗邊？有冇其他嘢爆？
“其他嘢啊？”我苦惱咁咬一咬手指甲，皺住眉頭將平日陸雨琪幾個人對同學嘅'小玩笑'打出嚟，當中夾雜住自己一直嫁嚟對佢哋嘅不滿。
撳確定發送......
我終於將自己嘅內心說話講出嚟啦，雖然只係對住網絡上面嘅陌生人，但都令我嘅心情一吓子舒暢咗唔少。
好快就有唔少某登仔留言支持我，令我第一次有種得到人認同嘅感覺。
「阿凌，係咪識咗朋友？連食飯都睇住手機唔放？」媽媽難得見到我一直拎住電話，心不在焉。隔幾分鐘又望一望，隱藏唔住嘴角嘅笑容，所以佢哋都覺得好好奇。
「朋友？」我聽到呢個形容有啲迷惘，但望住唔少某登仔支持我，鼓勵我，同埋一啲搞笑啲留言。我又唔想家人一直擔心我冇朋友，所以就認真咁點點頭。雖然講咗大話，但家人放心就好啦。
正常我呢個時間應該已經瞓咗覺，但我一直興奮咁同新識嘅網友吹水。post都已經爆咗一個，而有關陸雨琪等人嘅爆料同相都越嚟越多，有啲事連我呢個同班同學都唔知道。
#753. 被人打嗰個女仔都唔係咩好人，勾人男朋友。起埋個男仔同佢嘅底。
網絡嘅力量真係好勁......居然有某登仔將被欺凌嘅李綺恩都起埋底。我見到之後，一直飄飄然嘅心情瞬間跌返落現實。我想阻止，但長期缺乏同人交流嘅我，根本唔會知用咩說話去阻止好。