廟街有殭屍（已在各大書局上架）: 第五十章

他沿匯豐中心駛出，直轉入往西環方向，沿途盡是殭屍在街上襲擊人的情況，牠們如飢餓的狼，見人就撲上去，或將中年男人碎屍，或將年輕男人咬成殭屍，其他路人見狀，紛紛嚇得逃亡叫救命，但是沒有人來，反被數十隻殭屍所困，一個婦人抱著一個小女孩被重重圍困，一群殭屍撲上，二人之後也受感染變成殭屍，繼續撲向街上的另外途人。
 
目睹這一幕，我忍不住大叫：「停車！停車！停車！」
 
「你而家去都無用。」她冷靜地說。
 
「佢⋯⋯佢⋯⋯佢哋係咩、咩⋯⋯咩嚟㗎。」他問。
 
「殭屍。」南門蔚說。
 




這一帶已頓成人間地獄，慘不忍睹。
 
「香港失守。」我嘆道。
 
「仲未。」南門蔚說。
 
「仲未？佢哋已經入晒嚟啦喎。」我說。
 
「仲有一個方法救到香港，返廟街。」她說。
 




「廟街？點解？」我問。
 
「殭屍同人類唔同，好似軍隊咁講集體意志，所以係最好嘅軍人，當上層要做乜，佢哋完全違反唔同上層嘅意志，只能照做，所有攻擊都係靠上級意思。所以如果喺嗰區最高級嘅殭屍死咗⋯⋯」
 
「其他殭屍就會散亂？」我問，想起長洲殺死黃殭後，所有的殭屍群龍無首的樣子。
 
「無錯。」
 
「但妳都係無答我問題，關返廟街咩事？」
 




「你有無留意，佢頭先講嘢地點背景喺廟街天后廟？所以只要殺死佢，香港仲會有救。」她說。
 
「好，司機唔該衝去廟街，快嘅。」我叫道。
 
「痴線㗎，你當我真係司機？我當然唔會去啦，而家返屋企避難！」他罵道。
 
「香港國難當前，如果呢個地方失守，唇亡齒寒，你唔係以為可以獨善其身呀？」我勸喻。
 
「唓，我最多咪走去第二度，我又唔當呢度係屋企，呢度關我春事。」他笑道。
 
「呯」的一聲巨響，忽然一陣失重，天轉地轉，車輛被不知名物翻側，我們被撞得翻滾數圈。
 
「嘩，好痛。」我道。
 
「無事嘛？」她問。




 
「呢個故事教訓我哋一定攬安全帶。」我道。
 
「啊！」司機忽然大叫，被一手拉了出車外，我們好不容易爬出車廂，只見一個身材魁梧、滿身是肌肉的男人，單手拿著司機，他已經被吸乾所有的血，成了一具乾屍，面上是不明不白的眼神。
 
「韓壬辰、南門蔚⋯⋯搵到。」牠瞪著我們，以一雙藍色的眼睛。
 
那雙藍色的眼睛是寶藍色，眼神呆滯，只單單注視我們。
 
「藍殭？」我問：「白⋯⋯黑⋯⋯紅⋯⋯黃⋯⋯藍⋯⋯咪已經好高級？」
 
「係，已經係好高等嘅殭屍。」南門蔚說。
 
「妳有無遇過？」我問。
 




「聽過，我婆婆就係死喺藍殭手上，而我從來未遇過。」她說，表情極為認真，看來這次她也覺得眼前所站之人非同小可。
 
「咁佢哋嘅能力係咩？」我問。
 
「我都唔知。」她說。
 
「唔緊要，都係咁打啫。」我說，只是心裏也沒有什麼底。
 
「睇嚟今次佢哋係好認真，派咗唔少殭屍嘅精英入嚟香港。」她說：「係真係想一次過將香港變成殭屍城市。」
 
「但佢哋會失敗。」
 
「我都唔知，要睇下今次入嚟嘅，到底係幾多高等嘅殭屍⋯⋯」南門蔚說。
 
「殺咗佢先！」我白符在手，注入墨氣，頓時藍色水符，揮向牠腹前。




 
牠一個翻身閃過，再抓住我過肩摔，我被狠狠摔在地下，全身骨裂一般，牠沒有放過半秒機會，跳起，一招跪地裂，我急忙翻滾，牠的膝蓋猛然撼破地面，碎石飛天，威力驚人，如果沒有避開，我必然魂斷於此。
 
「乜料⋯⋯」
 
我望着眼前滿身肌肉的男人和碎裂的地面。