廟街有殭屍（已在各大書局上架）: 第四十五章

「蔚。」
 
「婆婆。」
 
「妳要記住，做一個驅魔師唔可以有太多情緒，一定要無情，如果唔係你會好容易同情嗰啲殭屍嘅遭遇而唔敢殺佢哋。」
 
「知道。」
 
「記住同情還同情，為咗蒼生，殭屍，一直都不能少。」
 




「知道。」
 
「劍指太低。」
 
「係。」
 
「墨氣唔夠。」
 
「係。」
 




「婆婆，咩Jollibee？」
 
「收聲！食慾喪志，以後唔準再提。以後食菜就得啦」
 
「係。」
 
「婆婆，點解我一定要殺屍。」
 
「因為呢片土地，有危險意識嘅人唔多，就算有，都無乜人會願意企出嚟，我哋一家，係點都要守住呢個土地。」
 




「點解要我哋，我哋放棄呢個地方得唔得？」
 
「唔得。」
 
「點解？」
 
「因為生於斯，長於斯，世上無第二條根。」
 
「妳醒啦？」我問。
 
她滿身是汗，看來是作了一個長夢。
 
「韓壬辰。」
 
「嗯？」




 
「你有無後悔過識咗我？本來你係為咗我可以保護你，但而家陷入絕境。」
 
她雖是香汗淋漓，但睡了一覺後，精神是好了不少，不過仍是高燒不退，臉頰是火紅得如蘋果。
 
「無。從來都無，我覺得做咗妳嘅助手係人生中最正確嘅事。」
 
「即使今日我哋有可能會死喺呢度？」
 
「無錯，人故有一死㗎啦，可以同妳死埋一齊都算唔錯。」我開玩笑道。
 
她微笑，有點婉惜的說：「但我都係幫唔到你解開謎團。」
 
「唔緊要啦，我都早有答案⋯⋯上司同殮房嘅事，九成都係同政府有關，妳都已經救咗我好多次，咁樣已經好足夠，無妳嘅話，我已經一早俾殮房唔知邊隻殭屍殺咗Lu。」
 




她笑了。
 
「放心，我會帶妳出去。」
 
「你？」
 
「喂，唔好咁睇少我先啦，雖然我學唔到妳一成，但殺一啲白屍絕對係綽綽有餘。」
 
她輕笑，還是有氣無力。
 
我說：「之前妳叫我訂嗰隻船，佢嚟緊。」
 
「佢願意嚟？」
 
「當然係一個天文數字，但夠佢亡命咁救我哋。」




 
「好，但要出去都好難。」
 
外面屍橫遍野，實在難以突圍。
 
「我叫咗佢去東灘，應該都係一段路，五分鐘路程好近。」
 
「嗯。」她面上仍有擔憂，我倒是明白。
 
「我聽日會開一架裝滿喇叭嘅車出去大街，引開大部分嘅殭屍，然後同妳會合，妳去海灘就得。」
 
「唔得。」
 
「得 。」
 




「你會死。」
 
「我唔會。妳對我無信心，都對自己有信心。」
 
「咩意思？」
 
「做咗你助手咁耐，點都有料。」我說。
 
她好不容易被我說服。
 
明日一早上，我就把教會內和附近民居所有的喇叭搜來，放在一架小型車上，因為白屍最敏感聲音，這絕對會把所有的殭屍引來。
 
把一切架好後，我說：「我好哋好快再見。」
 
「我都係跟你去。」
 
「妳仲燒緊，去只會拖累我，唔好啦。」
 
「⋯⋯」她把驅魔劍交給我，說：「咁呢個你護身。」
 
「妳呢？」
 
「我有符，同埋你最危險。」
 
「咁好啦。隻船十點到，如果十點三都見唔到我嚟，妳就走先。」
 
她點點頭，說：「⋯⋯小心。」
 
道別後，我駛著車，手有點震，其實我的內心也是非常緊張，不過為了南門，這是唯一的方法。
 
駕車駛到路中心，近食街的附近，已看到滿街都是殭屍，數量驚人得可怕，我打開嗽叭，頓時，群屍湧來，叫聲衝天。
 
我從未見過如此恐怖的場面。
 
「嚟啦嚟啦！」
 
我踩動油門，車全速前進，一下子推開了數隻殭屍，不過在茫茫屍海中，只是滄海一粟而已。
 
牠們全都不要命都衝來，像看見食物一樣，不絕而來來。
 
我踩盡油門，馬力最大，衝碼頭衝去，把他們摔在身後，牠們窮追不捨。
 
碼頭大街的殭屍更多，少說也有數千隻，堆滿在碼頭，一聽到引擎聲，發瘋般湧至。
 
「死死死！」
 
牠們口中不斷唸著死字，像惡咒一樣，面上盡是飢渴，狠不得把我碎屍萬斷。
 
十時零一，還有三分鐘，船應該差不多到，我只要繞過一圈就可以，誰知前路又突然湧出數千隻，千多隻殭屍堆在一條大路，車也有點受不住，車速開始慢了下來。幾隻殭屍見狀，立馬堆成一團，跳上車頂，欲從上襲擊我。
 
我一個急彎轉身，牠們站立不穩摔了下來，車卻轉彎減速，其他殭屍見狀，趁機上前用身軀頂翻車。
 
危急之下，我只好跳車，掏出青冥，血紅色劍身突出，左揮右撥，想在重圍殺出，但談何容易，眼前是重重圍困，數千隻殭屍圍得團團，我心中一涼，可能真的要命喪於此，現在只害怕南門蔚，她到底安全上船沒有？心裏正惆悵之際，眼前遠方酒店的頂部卻站了一隻殭屍。
 
黑色的西裝、紅色的領呔，脫下墨鏡後，露出黃色的眼睛⋯⋯是牠。