廟街有殭屍（已在各大書局上架）: 第四十一章

「閃開！」南門蔚和我都同時拿出符，想制服屋內的殭屍，沒想到餘下的兩個人大叫不好，飛身擋去符咒，用力捉住我們，另一人急忙鬆開鐵鍊，讓牠立馬跳出屋外，奔到街上，不知往何處去。
 
「做咩？」我問：「你哋知唔知自己做緊咩？」
 
「唔好殺佢呀，殺咗佢我哋就死㗎啦。」他們說。
 
「佢係殭屍！一放佢出去就會好大鑊！」AV仁說。
 
「你哋⋯⋯你哋點知佢係殭屍？」他們不可思議地說。
 




「你哋唔知咬到人好大鑊？」
 
「唔係人哋死，就我哋死㗎啦⋯⋯」
 
他們面面相覻，驚恐地說：「死啦，外人知道咗，我哋一定會死，佢一定會殺咗我哋⋯⋯」
 
說罷，竟嚇得頭也不回地奔出屋外。
 
「究竟係咩事，長洲有殭屍？」AV仁問。
 




南門蔚抬頭往遠處一眺望，說：「我見到佢上咗山，我哋都上山，如果俾佢咬咗人就煩，反正工會都係嗰度，我都要調查一下。」
 
望向海邊，天色灰暗，遠方有一巨大烏雲捲來，波濤洶湧，浪拍捲岸上，幾家店舖都被大浪所捲。
 
「睇嚟有好大風浪。」AV仁說。
 
一路上頂住風浪，街上並無半人，大家都避風，上到山的半腳，有一間隱密小屋，上面有一塊細牌寫著：「長洲驅魔工會」
 
進內，內裏杯盤狼藉，空無一人，忽聽門外大叫：「你哋係咩人？！」
 




我們三人轉身一看，是一個十七、八歲的少年，手上捧著一個白雲骨灰甕。
 
「驅魔工會南門蔚，嚟調查長洲區馬劍一少保嘅死。」她說。
 
他放軟敵視的眼神，雙眼一紅，說：「你哋終於嚟啦，師父死得好慘，你哋一定要為佢報仇！」
 
「你係佢徒弟？」我問。
 
「係，但弟子不才，返到嚟先知師父慘死喺殭屍手上。」他氣憤地踏地，雙手緊緊抱住骨灰甕，像擁着珍貴的寶物一樣，看來裏面就是馬少保的灰。
 
「成件事係點？」南門蔚問。
 
「要快啦，如果唔係俾隻殭屍出去，長洲啲居民就有難。」我說。
 
「最好就將所有居民殺死！」他咬牙切齒，怒目圓睜。




 
此話一出，我們無不驚訝，作為工會的人，應該以保護眾生為己任，竟然會說出這樣的說話。
 
「點解咁講？」南門蔚問。
 
「因為師父係俾所有居民殺死㗎！」他說。
 
「點會咁？你唔係話佢係俾殭屍殺死？」
 
「係！兩樣都係！事情要由一年前講起。」
 
我回望海邊窗外，一場龐大的暴風雨正要來臨。
 
一年前，長洲來了一個奇怪的男人，黑衣高帽，他倒也招搖，初到埗就以一倍價錢租了長洲所有空置的渡假屋、餐廳和娛樂場所。
 




正常一個人怎能住那得那麼多的房屋？可以有什麼用？
 
他只有一個要求，不放租就可，任由渡假屋、餐廳和娛樂場所空置。
 
面對這樣的怪客，大家雖然有感不妥，但有錢賺而自己不用付出什麼，甚至不用勞動，便不太在意，只當是金主。
 
這個情況持續六個月，六個月後的某天，他突然說要斷絕所有的供求，不再租用任何地方。
 
大部分的長洲居民都習慣了他的課金供養，一個穩定又不用工作的方法，再者因為他的長租壟斷整個長洲市場，沒有人再放租外客，沒有遊客再來長洲居住，現在失去金蛋，大家都大惑不解，一起追問那黑衣怪人。
 
「要我唔走都可以，但要你哋做一件事。」那男子說。
 
「係？」
 
「每家每戶都養黑貓。」




 
一時間，長洲的養貓風氣大盛，不喜歡貓的養，喜歡的養多幾隻，總之家家戶戶養了貓，逼滿長洲。
 
這時，在長洲駐守的馬伯覺得此事並不簡單，決定去調查一下黑衣男子。