廟街有殭屍（已在各大書局上架）: 第三十五章

我們終於看見他的模樣。
 
他是一個五十多歲的人，模樣怪異，皮膚全皺，身上都是傷痕，穿一襲中式黃色唐服，手腳被鎖扣住。
 
「黃色嘅眼？係黃殭？」我問。
 
「係。」南門蔚回答。
 
「又係啲咩殭屍呀？我⋯⋯我返上去先得唔得？」AV仁說，可是沒有人理會他。
 




「終於！終於有活人⋯⋯快啲過嚟。」他興奮地呼叫。
 
「你係？」我問。
 
「應該係你哋邊個？嚟呢度搵我。」他說。
 
「你有無見過一個三十歲、戴白色眼鏡、面上有胎印嘅男人？」我把上司的模樣描述予他。
 
「喔⋯⋯前幾日有嘅。」他說。





我大喜，問：「咁佢去咗邊？」
 
「其實你哋知唔知呢度係咩地方？」
 
「前身係精神病院。」
 
「哈，啱一半。呢個世界，第一缺透明度係監獄，第二就係精神病院，精神病人係最無權益可言，所以最好用，死咗都無人知。用嚟研究最好。」
 
「研究？研究咩？」我問。
 




他忽然露出殭屍牙，嚇得AV仁退了一步後，露出猙獰的笑容，似是十分滿足。
 
「當然係研究人點變成殭屍。」他說。
 
「唔係就咁咬咪得？」我問。
「應該唔係咁簡單。」她說。
 
「呢個姑娘仔有啲料，佢哋兩個都係平常人，唯獨係妳，妳有唔一樣嘅能力，等我估下，驅魔最出名嘅，伽氏？唔係⋯⋯妳係南門一氏？」他問。
 
「係。」她似乎沒多在意，問：「係點樣嘅變屍？」
 
「妳覺得呢？」他問。
 
「將全港變殭屍嘅方法？」她道。
 




「南門一氏果然唔同，聰明伶俐，早聽聞過你哋先祖昔日用反間計殺咗女真人。」
 
「係邊個想咁樣？」她問。
 
「我答咗妳，對我有咩好處？」他說。
 
「我可以幫你解脫。」
 
「解脫⋯⋯你以為我係被困喺度？哈哈哈哈⋯⋯」
 
我們面面相覻。
 
他續說：「我可以講晒所有嘢畀你哋聽，只係需要一個條件⋯⋯」
 
「係咩？」




 
他卻不予理會，說：「要知個男人去咗邊，就要首先要知呢間精神病院嘅歷史。呢度前身係國家醫院宿舍，我相信你哋都知，去到二戰期間香港淪陷，日軍喺呢度殺咗好多人，加上附近係亂葬崗，至陰至寒之地，成為咗好有利嘅條件，到1971年後，政府有人發現呢點，就將呢度改建，當時好多人以為係想要變成精神病院，無錯呢個係表面，但實際上係煉屍地點，將無人理嘅病人煉成殭屍，名符其實嘅人體實驗地方。」
 
「政府帶頭？」AV仁問。