廟街有殭屍（已在各大書局上架）: 第三十三章

「係呢⋯⋯其實我有啲嘢想問。」我說。
 
「乜嘢？」AV仁說。
 
「嗯，我想問有無人聽過高街？」我說。
 
「我知啦，我以前喺嗰度做過嘢，我遲啲帶你哋去就得。」AV仁說。
 
吃得七七八八的時候，AV仁夾好餘下盛菜，仔細的放進飯盒內。
 


「留返聽日呀？」呂嬸問。
 
「唔係呀，我帶畀小君。」
 
「小君？」我問南門蔚：「上次嗰個小君？佢住呢度㗎？」
 
「一樓。」
 
「一樓？唔係雞竇？」
 


她細聲說：「嗯，佢係一樓嘅⋯⋯工作者。」
 
「咩？」
 
「嗯工作者。」
 
「妳大聲啲啦。」
 
「性工作者呀！」
 


「喂！我聽到㗎！」AV仁怒視我們說。
 
「其實係咪佢女朋友？」我又輕聲問。
 
「你自己問佢。」她說。
 
他包好飯盒後，隨即捧盒而去，我好奇之下，便尾隨他落樓，來到一樓滿是霓紅燈的地方，各有不同佳麗站在門口開價，一個紙醉金迷之地。
 
他越過人群，來到門口的第一間房，敲兩下門，就有一個十七年華、清純脫俗的女生出來，正是跟我們去海洋公園的那個小君。
 
「嘩！多謝你！」小君說。
 
「攰唔攰？我帶咗啲嘢嚟畀你，快啲食！」AV仁說。
 
「係甜喎。」南門蔚不知何時在我的身後，一同監視。


 
「車，妳咪又係咁八卦。」
 
「我想落街買嘢經過啫。」
 
「咁嘢呢？」
 
「而家唔想買。」
 
「妳認我又唔會笑妳。」
 
「喂！你兩個，見到晒啦。」
 
只見小君跟AV仁兩個人望住我們，看來已經發現我們，小君只是微笑的點點頭。
 


我們來到糖水店，一碗「榴槤忘返」送上，小君興奮得不可交加，雙眼閃閃發亮，用湯匙輕輕向榴蓮一盛，送進口中，流露出美滿的笑容。
 
「嗯～好好食呀哈哈，好幸福。」小君說。
 
誰會想到一個這個天真可愛的少女會是妓女？
 
「我可唔可以問你一個問題？」我問。
 
「嗯？」小君說。
 
「喂！」AV仁似乎意識到我的問題說：「咪亂嚟呀。」
 
「妳點解會做呢份工嘅？」我已經沒有理會他。
 
「因為爸爸欠債。」她答得倒也爽快。


 
「但⋯⋯差人錢仲有好多選擇⋯⋯」我說。
 
「因為我爸爸借嘅唔係普通嘅大耳窿，係廟街最有勢力嘅黑社會，所以點還債唔到佢話事，嗰畢錢都俾我爸爸之前講嘅大咗三倍，佢話，呢個係最快最直接。」她說得輕鬆，但內容卻是非常沉重。
 
要還債加上父親的傷害，這是什麼答案。
 
「希望快啲還完啦。」我說。
 
「嗯！」她露出滿意的笑容。