廟街有殭屍（已在各大書局上架）: 第十二章

「鎖咗㗎啦喎。」我說。
 
「咁你入唔入去？」
 
「點入先？」
 
她拿出紅線，插進鎖裏扭兩扭，門鎖竟「啪」一聲的打開。
 
「有無咁勁呀？但偷入去好似犯法喎。」
 




「你可以留喺度，我唔介意。」
 
我立即說：「我好想入去。」
 
我比她搶先一步入閘，馬上便後悔，這裏陰陰森林，黑得不見天日，伸手不見五指，我打開手機電筒，微弱的燈光照進漆黑之中，仿佛有什麼恐怖的東西正在等我，不由得心中打了一個冷顫，此時此景，就像一個人玩鬼片Game的心情。
 
「行得未？」
 
「得⋯⋯」
 




我們小心翼翼地走落去，經過兩層長樓梯，來到地鐵大堂，只有少數的招牌燈光仍在照著，與日頭人來人往的大堂成極大的對比，我不寒而慄。
 
「啦～啦～」
 
「妳⋯⋯聽唔聽到有歌聲？」
 
「聽到。」
 
「跳入去。」
 




「入去？」
 
「係呀！入去，入閘。」
 
「我哋行到咁入做乜呀？」
 
「要入去月台。」
 
我們好不容易穿過漫長的電梯，浴途只有踏踏的地步聲，不知為何我已覺得有點恐怖，來到空無一人的月台，地鐵的車站內，招牌燈又讓月台光亮一點，只不過這種光是有點詭異。
 
「坐陣。」
 
她坐在月台上的椅子中，托著頭遙望玻璃門的廣告，然後給了我一部剛才那舊式的相機。
 
「原來妳搞一大輪就係想我喺地鐵裏邊幫妳影寫真，妳早講啦我有更好地點可以介紹畀妳。」




 
「邊個要影寫真？」她又擺出冷面，眼神想殺死我。
 
「我。我要影，我要影妳。」我說。
 
「我無。」她完全無視我的冷笑話。
 
「咁妳畀呢部相機我做咩？」
 
「靈動相機，有重雲笈七籤符文，可以捉到怨靈。」
 
「點解要呢部機先捉到？我之前捉天后廟嗰隻又唔使？」
 
「嗰隻係好鬼，呢隻好大機會係怨靈，普通相機無鎮魂功用。」
 




「怨靈？」
 
「鬼都有衰嘅鬼。你有無聽過呢個地鐵站嘅傳說？」
 
「咩傳說？」
 
坐在黑邃的地鐵站內，她開始說起往事。
 
「呢件事喺幾年前發生，事發喺下晝1點幾，當時一列由中環往觀塘嘅地鐵駛入呢個油麻地站。
 
當時車長忽然察覺一個校服女學生由月台跌咗入路軌，唔單係咁，喺月台等列車嘅乘客同樣目擊情況，有人大聲叫：『喂！司機停車，有人自殺呀！』
 
車長當時有拉剎車掣，但列車仍然行咗一段距離先停低，在場嘅人都認為女學生捲入咗車底，就通知警方同消防到場，並安排所有乘客落車。
 
當時地鐵即時暫停佐敦去旺角站嘅列車服務，等救援人員入去，但佢哋搜索咗1個鐘，發現路軌並無任何人⋯⋯或者殘肢，其後再用工具將列車升起，都係未發現女學生蹤影，甚至連血都無。




 
去到下晝兩點幾，救援人員將事件改為誤報，列車服務亦恢復正常。至於涉事列車則直接駛返車廠，經詳細檢驗後亦無發現。
 
事後地鐵發言人話，涉事車長健康良好，精神狀況無問題；在場乘客亦言之鑿鑿地稱目擊女學生跌落路軌，但無法解釋救援人員找唔到女學生嘅原因，令事件漸漸成為都市傳說。」
 
「咁妳講晒成件事出嚟，係想講咩？」
 
「我想講，當日嘅事係一宗煉屍事件，有人故意殺人，想製造殭屍。」