廟街有殭屍（已在各大書局上架）: 第七章
當我一覺醒來，昨日之事仿如夢一場，不真不實，但當我出廳望見地下的屍體，就覺得即使再荒謬也是真實發生。
打電話將屍體送回殮房後，雖然他們有懷疑過我會如何發現屍體，但沒有證據下，一切就不了了之。
而更讓我覺得奇怪，就是昨天殮房的屍體失竊案，原本我打得輸數，會被人炒魷魚，可是一回到殮房，就見到上司對我好言好氣，態度恭維。
「對唔住⋯⋯」我腳震得發抖。
「唔係唔係，我哋講對唔住就真啦。」上司竟不是對我兇惡的態度，而是溫柔的語氣。
「吓？」
「琴日，無嚇親你嘛？」
「喔⋯⋯無呀。」
上司一向是那些態度差劣的人，這樣的態度卻讓我有點害怕。
他拉我去後門，就是上香處，低聲跟我說：「相信你都知道發生咩事啦。」
「係⋯⋯對唔住，我會一力承擔返個責任⋯⋯不過我真係想你哋知道，我唔係有心整唔見，希望你哋唔好告我⋯⋯」
「你講咩呀，上頭落咗命令，琴日嘅事唔準再提。」
「明白⋯⋯」
「好啦，辛苦你啦。我相信經過呢件事之後，你同我都會升啦。」
「吓？」
「老實講，琴日所有屍體好似有返靈魂咁跳出嚟，畀著係我都會驚，所以你放心，我哋無怪過你，只不過你都知啦，呢件事傳咗出去，大家都會好大件事，特別係市民大眾，知道有屍體走出咗殮房，會點諗呀？傳媒又一定會大力渲染，到時恐慌就大件事。所以上頭要呢件一定要保密，你知道嗎？」
「屍體自己走出殮房？」
他拍手掌，不斷叫好：「無錯！我就係要呢種，就係一面無知嘅樣，完全唔知我講緊乜嘢咁，總之大家唔知，就大家都有著數，OK？」
「噢⋯⋯喔⋯⋯」我還是不太明白。
「放心啦，錄影帶只我有一個人睇過，係好恐怖，已經交咗去畀上頭，佢哋叫我哋唔好講出去，所以明白嗎？」
「明白。」
「返去做嘢啦。」
我完全摸不著頭腦，竟然是屍體自已跳出殮房？而我竟然又一點責任都不用負，真不敢想像。
難道，昨日所有屍體都是那些殭屍？想到這裏，我的後背不禁冒出冷汗。
一整天下來，我都沒有精神，特別是對著那些屍體，總有種感覺它們會如昨天的殭屍一樣，彈起咬人，腦海盡是這些畫面。
因為前一晚殮房遺失所有屍體，我不知上頭如何處理，但整件事確實壓了下來，沒有傳媒，也沒有家人找上門，整件門竟似沒有發生過一樣。我也樂得清閒，只處理新進幾具遺體。
下班後，天色昏晚，我搭小巴回葵芳地鐵站。
回到家裏，家裏有兩戶的燈都亮了，這次AV仁正在房間看A片，聲音吵鬧。我待他完事後，便輕力㪣門。
「阻唔阻你？」
「咦，改變主意想睇啦？」
「唔係⋯⋯我想問，你知道你尾房嗰個南門蔚有幾多？」
他放下耳機，關掉A片，說：「咦，你知道人哋個名啦？好熟咁喎。」
「只係傾過一次偈咁。」
「已經好多啦，我喺度住咗幾件，都係同佢傾過次數都好有限，你好叻仔㗎啦。」
「咁你知道佢有幾多？」
「咁我又唔係知幾多，因為佢好難相處，講嘢冷冰冰，成個冰山美人咁，又無乜話題，古古怪怪，你又唔可以同佢講AV，你明啦。」
「係⋯⋯你知唔知如果佢唔喺度，咁會喺邊度？」
「佢會喺廟街開檔。不過⋯⋯」他眼神有點閃縮說：「勸你唔好去，好古怪。」
「你可唔可以帶我去搵佢。」我說。
幾經請求，他終於答應了。
入夜後的油麻地廟街五光十色，龍蛇混雜，大排檔、雜貨、手信、色情用品店、嫖妓應有盡有。
據AV仁所講，廟街的勢力眾多，錯綜複雜，駐街有不少有命的風水算命師，形成連營夜檔的特色，來者探訪或問學業、或問前途、或求姻緣。
在云云算命檔之中，位於停車場轉右直行三十步有一檔不顯眼的小檔，正是南門蔚的攤檔。
「你自己去啦，我就去做facial先。」他帶我來到附近，就自己去了美容檔。
我站在那檔門口，鄰檔對我側目而視，途人避之則吉。
「先生，算命請坐，呢檔好邪㗎。」鄰檔一個穿功夫衫的老伯對我道。
她的攤檔門招牌上寫的不是「占卜、風水、八字」，而是空白一片。
揭開布廉，南門蔚正坐在裏面，閉目沉思。
其實怎樣看，她都是一位美女，不過麻煩類型。
不像其他算命師的打扮，她還是身穿白色連身短裙，桌上沒有算命書，枱面僅有一部電腦、一束花，擺設簡潔。
是淡淡的薰衣草味。
「你嚟找數？」她沒有開眼，卻已知道我的存在。
「呃⋯⋯一嚟啦。」她不提我也不記得此事，掏出二千蚊後，我說：「我仲有啲嘢想問妳。」
她終於睜開眼， 收下金錢說：「每條問題$100。」
「好，咁我可以坐低講？」
「可以，$100。」
我呆愣半响，良久後坐下，繼續說話：「其實呢，琴日究竟發生咩事⋯⋯」
「先伸手。」她說。
「左手定右手？」
「雙手，$200。」
我伸出手，她從一個殘破的龜甲倒出三個古舊的刀幣，放在我掌心，她的雙手包著並揉合我的手，過了三秒後，她縮手道：「放低。」
我分開合掌，刀幣咯噠落地。
「丁丑年壬寅月乙巳日甲申時，乙木命。陽壽尚餘六十九年三十一日。」
「啊南門大師，我唔係要算命，我係⋯⋯」我回顧四周，再壓低聲音說：「我係有麻煩上咗身，我怕我無咁長命。」
「我知。」
「妳知？」
「係，$300。你咁出名，我點會唔知。」
經她一講，我有點臉紅，原來我是名人也不自知。
「你令無數屍體走甩咗，全行人都識你。」她嘴角上勾道。