廟街有殭屍（已在各大書局上架）: 第二章

話說我任職這份工後就搬出屋企，一來家人嫌棄，二來我也想獨立。
 
畢竟錢也不多，只能在油尖旺區找住處，本來預算是萬多左右，但最終找到一間七千蚊的，不過是跟人同居，是位於廟街的一幢唐樓，千幾尺的單位分成四戶，共用廁所、廚房。
 
這幢唐樓龍蛇混雜，吸毒、賣淫、洗黑錢、買兇殺人，你想像到的地下產業都盡在此處，經常會在大樓下的地方看見躺在地上、失去呼吸的白粉友，或是一個平頭裝中年大叔拖着四個打扮得花枝招展的妓女上樓，因一樓就是妓窩。
 
但勝在我住的單位是高層，景觀開揚又風景不錯，因此我沒有多想便租下。
 
我第一日搬進新屋，就結識到AV仁 - 我的鄰房。他是一個短髪的眼鏡男，正正常常，我一進屋就聽見極大聲的呻吟聲，他一見到我就關掉房間的AV，熱情地跟我握手，不知道是不是錯筧，我覺得手是黏黏黐黐的。
 




「叫我阿仁得啦，點稱呼？」AV說。
 
「韓壬辰，你⋯⋯住咗好耐啦？」
 
「幾年咁啫哈哈，」他隨手在桌面拿起一盒AV問：「啱？」
 
「我唔使啦⋯⋯」
 
他目光一斜，露出奸狡的眼神，食指搖晃說：「喔，鬼馬啦，GV？」」
 




「我唔睇，平時睇開四書五經。」
 
「真定假。」
 
「真係假。」
 
「哈哈。」他笑說：「我鍾意你。」
 
我們的屋企左面是我跟AV仁的兩間房，然後穿過一條長走廊，盡頭就是浴室和另外兩間房。（奇怪是我們的廁所跟浴室是分開）
 




「呢度另一房客就係呂嬸同佢個女，佢個女都十幾歲啦，學生妹，幾靚女㗎，不過聽聞佢係做PTGF。」AV仁指著浴室左面的房間說。
 
「喔。」鄰居的八卦事我沒有什麼興趣。
 
「跟住仲有另一個女仔住喺度⋯⋯我都唔知點形容佢。」AV仁說。
 
「唔知點形容？」
 
「你有無見過仙女？」
 
「咁我又無。」
 
「佢就好似仙女咁靚 ，係我見過最靚嘅人，不過講古怪，佢應該係最古怪嗰個，比呂嬸一家仲怪，佢喺廟街有開檔。」
 
「喔⋯⋯」我沿房窗偷瞄室內，只見暗黑的房間裏，貼滿不同的符咒，一道道黃符寫滿鬼劃符的咒文。




 
我搖搖頭，再漂亮的女生是一個騙子或是精神病人也沒有意思。
 
「如果有咩仲想知就搵我啦，我喺房間咋⋯⋯不過你知啦，最好敲敲門先⋯⋯男人嘛。」AV仁說道。
 
「好啊，唔該你。」
 
「仲有呀，提醒你一句，半夜就唔好亂落街啦，廟街『好雜㗎』。」他臨關上房門前，意味深長地說：「如果天黑有人叫你個名，千祈唔好應。」
 
「吓？」
 
我未來得及反應，房門已經關上。