【青春純愛+靈異】收音機裡的情人: 第九章：最後

在考試前的三個月裡，我差不多每天都與孔子溫習，就連孔子這個靠努力取勝的人也沒有像我般勤快。上課小息時，我也不會耗費一分一秒，拼命把所有知識，所有考卷都做過一遍，在沒人膽敢與我交流的情況底下，我便可以毫無雜念地爲着彤彤奮鬥。

可能是這就是愛情的動力吧！ 


時間轉眼間就到了家長日，也就是派成績表的日子，在選修科的考卷都奪得全班頭幾的狀態下，我也有信心自己有一半機會能夠抱得美人歸，剩下來只能看主科的平時分和其他次要科目的成績了。 

學生：任樂謙
操行： D
中文 7/155




英文 21/155
數學 3/155
物理 1/155
地理 4/155
宗教 133/155
體育 141/155 
總排名：27/155 


「屌！宗教同體育點解可以比得咁撚低㗎？我又冇遲交功課，個人又唔係手腳唔協調，有乜理由佢可以比得咁低，拉低嗮個總排名㗎！」我心中默唸。





 此時，向來沉默的母親也忍不住開口：「我見我個仔平時好勤力咁溫書，其他科又咁高分，點解係宗教同體育咁低嘅？」 

「任太！因爲你個仔之前記咗個大過，咁宗教科就有一半評分都係講學生表現嘅，咁個大過就嚴重咁影響學生表現呢欄，所以總成績就咁低啦！至於體育，老師好似話係任同學停課嗰個禮拜係考試週，所以同學就錯過嗮啲考試，咪唔少項目都變咗零分囉！據我所知，只有放病假先可以補考，所以任同學喺呢個科目就蝕底啲。」班主任一如既往地用着她臭串的嘴臉回答。 

「吓！冇得補考㗎咩？咁呢兩科都計落總排名㗎？」我從沒看過母親如此關注自己兒子的成績。

 「應該就冇喇，因爲任同學嘅情況有啲特別，話嗮我哋之前都無試過有同學停課停咁耐。總排名方面，其實宗教同體育呢兩科嘅比重只係普通選修科嘅一半，所以都唔算影響好大啫。」 

「虧你仲可以講得咁口響㗎喎！我從來都無聽過學校有咩學生表現分，你就影響細呀！我原本諗住有頭十㗎！」我再也壓不下自己的怒氣。





 「任同學，你冷靜啲，其實你對成績表有咩不滿可以一陣間去校務處填表比學校處理，你同我講係無用嘅。」 

「呢間咩濕鳩教會學校嚟㗎！宗教體育呢啲垃圾科都可以計到咁高比重，咁彤彤一陣間喺出面見到全級成績排名咪知我同第一爭成廿幾名囉！」我當然沒把這句話說出後，只是在反覆思量，苦惱該如何向彤彤交代。

 「呀仔！咁係你犯大過唔啱在先，同埋下次要對老師要好啲禮貌呀！唔該曬老師！」我就料到怕事的母親根本不敢反抗老師，只能對這一切的不公逆來順受。 

「喂！你做咩唔同老師拗啫？係都要拉我出嚟！佢態度有差，個制度又咁有問題，你唔想反抗嘅咩？」

 「佢都話同佢講無用啦！宜家落去校務處填表算啦！咁你又真係記咗個大過，係咁㗎喇！」母親一向相信我根本就不會打人，犯下大過，但她此時也無奈地接受現況。 

在到校務處途中，我看到壁報上貼着的全級排名，第一果然由陳志豪拿下，看來這一切都是他幹的好事呢。 我

趕快填寫那份根本就不會有實質用途的表格，便匆忙離開這間龍門任搬的學校。 





可惜以我這樣的操行，根本就不會有其他同級的學校肯收下我，我也只可以困在這垃圾學校與荒謬的制度來個困獸鬥。 



當天下午，我按照約定來到涼亭，看到她換上了迷人的紗長裙，隨着徐風一吹，白滑的長腿便顯露於眼前。但是，她悉心打扮，應該不是爲了接受我，而是跟我餞別吧？ 

「呀謙！你嚟咗喇？」 
「係呀！你睇咗全級排名嗰可？」我再三確認她見我的用意。 

「睇咗！你排第27呀嘛！」她看似輕鬆的道。 

「我同你比我個目標好似爭得有啲遠添.......」

 「唔緊要，我見你都好努力咁去溫書呀！你物理直頭攞第一添！可能係其他科冇咁好拉低咗啫。」她反而像在安慰我。 





「其實成績從來都唔係最重要，最重要嘅係你有好努力咁爲自己嘅前途去奮鬥。見到你咁生性，我呢個朋友都好開心呀！」她是暗示我失敗了嗎？

 「其實個排名係俾體育物理呢啲無聊科拉低嗮咋！你睇，我其他科都好努力，我真係有好大決心想追你㗎！」我拿出成績表，嘗試挽回劣勢。

 「唔緊要啦，我明㗎喇，只不過我覺得自己好似.......同你冇情侶嗰種feel…...」爲何女人總是喜歡談虛無縹緲的感覺？我爲她付出這麼多，她難道就看不到嗎？

 「咁點解要同我講咩考第一啫？你一開頭話唔鍾意我未得囉！點解要比個假希望我？？」淚水慢慢湧往眼眶，不知何時會衝破防守，掉出眼眸。 

「對唔住呀.......我都知你好努力咁付出，所以我俾呢個機會你都係想比時間自己嘗試鍾意你，但係........最尾都係冇feel。如果我冇feel都同你一齊，咁我會更加後悔呀！！」她早我一步哭了。

 「咁點解你又會鍾意嗰個對你一啲都唔好嘅陳志豪呀？就算有無feel都好，點解你要鍾意一個當你係玩具嘅人？」

 「feel 呢啲嘢好難講㗎嘛！可能我就係咁犯賤，明知佢對我唔好，我都仲係好鍾意佢......」她越發內疚，臉龐佈滿着淚痕。 

「咁你都唔好咁怪自己，你都控制唔到嘅，唔係你嘅錯.......」就算我有多麼討厭陳志豪，我也不忍心看到心上人爲了這些賤人哭得花容失色。





「其實我都有諗過同你喺埋一齊，但我睇唔到我哋嘅將來，我哋嘅前途，好似好迷茫，好唔安全咁......但陳志豪唔知點解就比到安全感我，係咪我衰，我貪錢呀？？」她自責的模樣不斷痛擊我的心扉。爲什麼她要爲了我而自責？

「可能我真係唔適合你呢？如果你真係覺得唔開心嘅，我唔會一廂情願㗎，你返去同佢一齊啦！有得陪喺你身邊我已經好開心。」是否天下間的男人都喜歡裝作豁達瀟灑地讓愛呢？縱使內心是多麼的不情願，我也甘心輸給他，默默地在旁守護她。

 「唔使喇！我已經決定去英國讀書。」 

「吓？你認真㗎？」即使她有男朋友，我也想繼續陪伴在她身邊的呀！爲何她要如此匆忙的離開？

 「我想去外國讀書，想有好啲嘅未來......有得走邊個會唔走呀？」的確，要尋求更好的機會，就要到海外。那些在香港追求豐厚財產的人何嘗不是爲了離開這個生活令人窒息的小島？

 「咁去外國都好嘅，至少有前途先......」我這些低下階層，甫出生就已經註定困住在這小島上，怎能奢望自己也像別人一樣遠走高飛？ 

「咁陳志豪會唔會陪你呀？我就一定留翻喺香港。」我遞上紙巾給她拭走淚水。如果她自己一個到海外讀書，我也不算輸給陳志豪吧。 





「唔會呀。佢話佢屋企人想佢留低，不過佢好似會轉去間好啲嘅學校。」她平靜下來，嗓音也沒那麼抖顫。她是想陳志豪陪她嗎？ 

「你唔驚孤獨呀？去到嗰度咪冇嗮朋友囉？」 

「唔緊要啦！朋友可以再識啫！啊豪都應承咗我會多啲facetime我㗎喇！......呀！你都得㗎！」看來她若不是在我面前也不記得自己有這個朋友。

可惜，我沒錢用蘋果電話，不能用facetime，可能從一開始我們兩人就是無法接通的。 

「唔使喇。你幾時走呀？」我心如死灰，深知自己也許一輩子都不會和她在一起，倒不如好好的道別，把這段關係畫上一段完美的句號。 

「應該呢個禮拜就走喇。不如我哋趁走之前出嚟約下啦！」 

「都好呀。」

這可能會是第一次，和最後一次與她單獨約會了。