［真人真事改篇］《有一種鍾意，係我鍾意你鍾意我。》/《初戀1000天》: 第十章下
第十章下
來到了一座空曠且視野開闊的山頭，各人才依照負責人的指示停下了步伐，再一個接一個地跟着負責人走到指定的地方，而這地方將是他們這一整夜的據點。
等了半晌，終於到Jessie走到她的據點了。
這是個視野最為開闊的地方，能清楚看到山下的萬家燈火，但面對漆黑的環境，她還是有點恐懼，腦海還不斷浮現恐怖片的畫面，而愈是要自己不要想，就愈是無法自拔，使她無法好好享受這片夜景。
「Jessie？係咪你係我隔離？」這時，Jessie耳邊傳來Jonathan的聲音。
「Jessie？」這時，突然傳來一把聲音。
唔係一人一個位架咩，邊個叫我個名？唔通撞鬼？Jessie像恐怖片的主角，把嘴巴牢牢盒上，不敢發出一點聲音，還合上眼睛，心中默唸起主禱文來：我們在天上的父，願人都尊你的名為聖。願你的國降臨；願你的旨意行在地上⋯⋯
直到快唸完的時候，突然有人拍了她的肩膀一下。
「哇⋯⋯」Jessie被嚇得大叫起來，Jonathan見狀連忙用手捂着她的嘴巴，悄悄地說：「係我Jonathan呀。」
Jessie還是不敢張開眼睛。
「你摯大對眼睇下先啦。」聽到Jonathan這樣說，Jessie才猶䂊地張開了一隻眼睛，借着對岸的萬家燈火，勉強看清眼前人的身形，確實與Jonathan很相似，懸空的心才安定下來，想要說話，嘴巴卻還被Jonathan捂着。
眼見Jessie終於冷靜下來，Jonathan這才放開了手，繼續壓聲量說：「你再大叫，Queenie佢地聽到就弊。」
「嚇死人咩，我以為自己撞鬼呀。」Jessie發現，Jonathan原來躺了在自己身旁，只相隔幾個手掌的距離。
「你平時睇開嗰啲恐怖片恐怖過依到好多啦，仲以為你一定唔驚添。」
「問題係我睇嗰陣都好驚呀嘛。算啦，你唔好再講，我個腦又開始浮現嗰啲畫面。」雖然腦海再次浮現那些讓人不安的畫面，可是有Jonathan在身旁，Jessie剛才那份恐懼頓時減去了一半。
「其實你依到風景幾靚呀，啲雲又開始散，仲睇到月亮同幾粒星。」Jonathan用手臂作枕頭，放在腦勺後，目光被掛在夜空的明月吸引着，皮膚在夏夜的微風下暑氣全消，一種久違的愜意在心裏洋溢。
聽到Jonathan的說話，Jessie才開始留意起天上的被眾星拱照的月亮。
「點解嗰粒星特別閃？」Jessie指着那顆格外閃耀的星問道。
「嗰粒？北極星囉，以前啲人靠佢認路嗰粒。」Jonathan回應道。
「犀利喎，咁都知。」Jessie打從心底讚嘆道。
「有啲常識都應該知嘅。」
「知你叻啦，第一名。」Jessie揶揄道。
「講笑咋，我都剩係認得依粒星。」Jonathan說道。
「係咩？」Jessie隨意地說道，雙眼忙着欣賞天上的星光，享受微風溫柔的撫摸，還有蟬鳴的聲音。
「係呢，點解James無陪你Join依個活動？」Jonathan假裝不經意地問道，可那不自然的語氣卻出賣了他。
幸好，被James這名字抓住了焦點的Jessie無暇深究Jonathan的語氣，回應道：「佢都唔肯。」
「你叫到都唔肯？點解呀？」
「佢可能鍾意打機，多過鍾意我。」Jessie的語氣充滿了苦澀的味道，懷念起以前那個看見自己上線，就會馬上放下手上的遊戲，專心致志地和自己聊天的James。
「點會，佢唔係對你好好咩？放學都會送你返屋企。」
「你又知？」Jessie沒料到Jonathan竟會知道這些細節。
「我之前見你地搭同一架車，應該都係送你返去啦。」
「係嘅，佢每晚都會同我傾電話，又會送我返屋企。⋯⋯」聽到這裏，Jonathan有點後悔自己提起這個話題，卻沒聽到Jessie心裏那句：但每次傾電話都係我打比佢，而佢每次都打緊機。依家仲日日都要Re-quiz，都唔得閒理我⋯⋯
「但我地好似兩個世界嘅人。」
這句話像密閉空間裏的一扇窗，為Jonathan帶來了一點希望的氧氣。
「點兩個世界法？」Jonathan問道。
Jessie很少主動和人分享自己的事，因為這樣會令她沒有安全感，如把自己赤身於他人眼前一樣讓她不安，於是，她另開了一個話題，說：「你問我咁多問題，到我問你啦，你之前做咩無啦啦疏遠我同Andy佢地？」
「無呀，我都特登疏遠你地呀。」
「仲話無？明明我地咁多年都一齊食飯，小息又一齊傾偈，但你依一年同我地上去食飯嘅次數真係一隻手都數得晒，咁都話無？你⋯⋯係咪有心事？」雖然環境昏暗，可借着月色還是能隱約看到對方的輪廓，Jessie突然靠近Jonathan的臉，試圖增加壓逼感，讓他說出實情。
可惜，她不僅沒有成功，Jonathan還結巴起來，說：「邊⋯⋯邊有呀，我邊有唔開心。」
「係咩？全世界，連Joey都話你嗰陣唔開心喎。」Jessie還是對他窮追不捨，距離還是一樣的接近，他能清楚看到她的眼眸正牢牢盯着自己。
「都⋯⋯都話無囉，都無野值得我唔開心，你唔好哄咁埋啦。」不曾與女生如此接近的Jonathan的臉漸漸紅了起來。
可幸，環境之昏暗，使Jessie無法看到他臉上的紅暈。
都話架啦，有乜可能因為我唔開心？Jessie在心裏喃喃道。
「你都未答我問題，你同James究竟點兩個世界法？」
「你兩個竟然仲係到私會？」突然一把聲音打斷了Jessie和Jonathan的對話，還把膽小的Jessie嚇了一跳。
「你兩個做咩嗌我個名？竟然仲係到私會？」突然一把聲音打斷了Jessie和Jonathan的對話，還把膽小的Jessie嚇了一跳。
「哇，你行路無聲架？嚇死人咩！」Jessie輕拍自己被嚇得心跳加速的胸口說道。
「一陣比Queenie發現點算？緊係靜靜雞鼠過黎，哇，你依到風景唔錯喎。」說罷，Joey也躺了在Jessie身旁，欣賞起這片夜色來，又問道：「你地講咩講起我個名？」
「我話你地全部都話佢唔開心，問佢點解，但佢都堅持自己嗰陣無唔開心。都話架啦，唔係因為我囉。」Jessie略帶委屈地說道。
乜真係咁明顯咩，Jonathan心想。
「係咩？」Joey口裏這樣說，心裏卻一點也不相信Jessie說的話，「話時話，James做咩唔陪你Join依個活動，唔驚你比人追走咗咩？」
Joey所說的那個「人」沒有別個，其實就是躺在Jessie旁邊的Jonathan。
她還是深信自己的直覺：Jonathan一定係鍾意Jessie，先會見到Jessie同James一齊之後咁唔開心。
「你地問啲野都一樣架喎，」Joey的話讓Jessie想起她和James的關係匪淺，便說：「你同James唔係不嬲都傾開計架咩？佢無話你知咩？」
「佢問我有無Join，我以為佢Join咗先問我咋，點知黎到先發現佢根本無Join。」
你地成日傾偈架？Jessie很想這樣問，可又會顯得她像是在呷醋，只好把話呑回肚裏，說：「佢點會join依啲活動呀，佢剩係鍾意打機架咋嘛。」
「其實你地都幾唔同，你鍾意讀書，佢鍾意打機，你咁靜，佢咁嘈，其實我真係好好奇，究竟點解你會同佢一齊？」
「可能我嗰陣癡咗線掛？」Jessie苦笑着說。
其實她知道那時和他在一起，並不是因為自己真的喜歡他，她要的，只是一個能隨時在她有需要的時候出現在身旁，陪着自己的人，而對象是不是James其實不太重要，所以她根本沒把二人是否合拍算盡這段關係裏。
「你講到好似好後悔同咗James一齊咁。」Joey說道。
「唔知呀，唔好提佢啦，睇星好過。」Jessie說道。
不知不覺間，已來到凌晨時分，對岸大廈的燈光陸續關上，終於真的漆黑得伸手不見五指，天上的繁星才終於露出了它們的真面目，照得這片夜空閃閃生輝，美得像一幅畫布，使Jessie不禁沉醉在這片美的不可思議的星空。
突然一架飛機劃過這片夜空，引起了Jonathan的思考，問道：「你地有無諗過第時要去邊到讀書？」
「除咗香港仲可以去邊？你唔係諗住去外國讀書呀嘛？」Jessie問道。
「唔知呀，問下姐，咁你地想讀咩科？」
「呃，可以嘅話，我想讀⋯⋯」
在漫天星光下，年輕的他們討論起那些如天上的星一樣遙不可及的夢想和未來，眼裏閃爍的光芒比北極星更耀眼——是懵懂無知的青春獨有的記號。