［真人真事改篇］《有一種鍾意，係我鍾意你鍾意我。》/《初戀1000天》: 第六章下 「誰正與你一起 便承認我很妒忌 像望見當時 懂得感動又何必 錯過你先知愛你」 〈錯過你〉

https://www.youtube.com/watch?v=rw__UPeMC0M
第六章下「咩呀？」Jessie錯愕地看着Andy。

Andy突然俯下身來，小聲地問道：「你同James咩關係？做咩無啦啦一齊食Lunch，仲為咗佢dum低我地！」

「你又知嘅？」Jessie驚訝地問道。





「咁你就要多謝Deborah啦，有佢係到嘅地方，係唔會有秘密嘅，你唔係咁多年都未參透依個理道呀嘛？」Andy說。

Deborah，是他們班上的八婆堆裏的其中一員，只要有他們的地方，就必定會有是非。

曾經，Jessie也是他們的其中一員，結果，也許因為沒有八婆應有的特質，不符合加入他們八婆堆的資格，竟遭到他們杯葛。自此，Jessie便再沒和她們說過一句話。

「唔好轉移話題，快啲答我，你地做咩無啦啦咁Close？」Andy追問道。
Jonathan沒想過Andy會把他不敢問的問題說了出來，馬上盯着Jessie，期待又害怕聽到她的答案。

「err……」不擅說謊的Jessie不太願欺騙她的朋友，猶豫了片刻，終於還是承認了他們的關係，說：「我地⋯⋯一齊咗。」





「吓？你地一齊咗？幾時嘅事？點解我地唔知架？」Andy驚訝得大叫了出來。

「Sh……！」雖然課室裏的人都已散去，James去了找Miss Yeung重測，Deborah 也不在，謹慎的Jessie還是連忙按住Andy的嘴巴，卻沒有留意Jonathan的臉上的表情頓時僵硬起來。

Andy稍為冷靜下來，Jessie才鬆開了手，而Andy馬上繼續追問道：「所以點解你會同James一齊？係你追佢定佢追你？」

「James唔係鍾意咗Jessie好耐啦咩？緊係佢追Jessie啦！」一旁的Chloe搭嘴道。

「我點知會唔會Jessie都暗戀咗佢好耐？」Andy說。





「你用下腦都知啦吓嘛。」Chloe無奈地說道，「係呢，我突然醒起你琴晚係咪搵過我？我咁啱去咗沖涼，沖完出黎覆返你，你又無再覆我。」

「係呀，不過無野啦。」Jessie開始執拾書包，準備去一會的籃球練習。

「我見你震咗我好多次喎，真係無野？」

「有呀，我有啲肚餓，去唔去小食部買啲野食？」

「欸，我就唔洗啦，今日約咗人。」Andy難得地拒絕道。

「你都有人約？邊個咁睇唔開？」Jessie調侃道。

「緊係有！」Andy壓低聲量，在Jessie耳邊小聲地說：「呀C約咗我一陣去試新開嗰間甜品鋪。」以免Jonathan聽見。





「你同佢仲有聯絡架？我以為你已經放棄咗佢添。」Jessie驚訝地說，然後輕聲問道：「今日唔係男子籃球都要練波咩？佢⋯⋯唔洗去？」

「唔知佢喎，總之佢約咗我，」Andy看了看手錶，說：「夠鐘啦，我落去搵佢先。今晚先再問你同James啲野，記得覆我MSN！拜拜。」

「我又去。」Chloe跟在Andy背後說。

「你？黎做我地電燈膽呀？唔好啦。」Andy嫌棄道。

「我係到你地無咁尷尬呀嘛。我唔想咁快返去呀，比我跟埋一齊啦⋯⋯」Chloe跟着Andy的步伐，離開了課室，只剩下Jessie和Jonathan。

當Jessie快收拾完畢時，才發現還有一份英文Reading還未做，想起Jonathan答應她的事，剛準備便把Reading遞到他桌上，Jonathan便拿起背包，不發一言地準備離開。

「你去邊呀？我仲有份Reading未做。」Jessie看着Jonathan的背影說。
豈料，Jonathan竟依然一句話都沒說，便離開了課室，獨剩Jessie一人。





佢做咩唔理我？Jessie心想，拿着Reading的手還懸在半空。


「你究竟有幾撚on9先會漏咗份Re-quiz嘅筆記係櫃桶？」Lemon問道。

「屌，仲好意思講，唔係今朝借咗比你依條仆街，我點會漏咗係櫃桶？」James一口氣跨了幾級樓梯，三步拼兩步便跑到課室前，剛巧碰到正離開課室的Jonathan。

二人撞個正着，被逼面面相覻。

看着戴着黑框眼鏡、頭髮被風得凌亂不堪的James，那嬉皮笑臉的樣子，還有言猶在耳的髒話，Jonathan實在想不懂Jessie為甚麼會和這樣的人在一起，甚至為了和他吃飯而撇下了三年來幾乎每天都一起吃飯的他們？

他究竟有甚麼好？比他還好？這些問題不斷在Jonathan腦海裏浮現，使他竟不自覺地瞪了James一眼，便板着一張臉，越過James和Lemon，沿着樓梯離開了，然而，還是能隱若聽到Lemon的話：「你爭佢錢呀？個樣西到好似你爭佢十萬九千七咁。呀，我知啦，一定係因為你同Jessie一齊咗！⋯⋯」

他的一切煩躁、抑鬱與反常，好像瞬間找到了答案。