空想的平行線

嗰一年，我Form 4。

一直以來，我都係個唔鍾意讀書嘅人，係好撚唔鐘意讀書嗰種，所以係低form混分混咗3年精英班之後，如無意外哋喺高form成為咗少數俾人踢咗出去嘅人。所以基本上，成班入面我無幾個係識嘅。而本身同班嘅靚女，都去晒隔離班，所以話「知識改變命運」真係唔係冇根據嘅。

但係，亦都正正係咁，之後嗰三年，我都同佢同班。

亦都係咁，我嘅故事亦都係咁開始咗。

得嗰16歲仔，鍾意一個人可以好簡單，我亦都認我係膚淺嘅，當初鍾意佢嘅原因好簡單，就係貪佢靚，我諗無人唔鍾意靚女掛。喺之後嘅日子，每日返學上堂最爽嘅事就係可以偷望佢，笑嘅時候望，佢上堂訓教嘅時候望，抄筆記嘅時候都望，唔知你哋明唔明，但係好似只要望到佢個口就會好似含住堆砂糖咁，好甜。





講左咁耐，好似連佢係咩樣都未講，戴定頭盔先，以下嘅描述可能係我先覺得嘅，不過你哋就姑且信住先啦。佢矮我大半個頭，戴住副大方形半框黑色眼鏡，皮膚超白，眼大大，經過嘅時候永遠有陣果汁糖嘅味。

以上嘅嘢都係我日日上堂偷望佢得返嚟嘅結論，但係，因為我同佢從來都無同過班，所以根本就無機會會同佢講到嘢或者點。直到一個月後嘅一日，對大部份中學生都好重要嘅一日終於嚟，就係調位嘅大日子。而好好彩咁，佢安排咗坐我後面，而我終於可以唔洗淨係隔住成間班房咁偷望佢。

我知道，坐我後面我點望到佢呀係咪？所以話你哋冇想像力。嗰時喺我班房後面係有個鐘嘅，你哋絕對想像唔到當時嘅我係幾咁有時間觀念，準時每5分鐘就會向後望吓個鐘-------下面嘅佢；每日收功課嘅時候仲係有幾早就得咁早就開始擰轉面收後面嘅功課；上堂嘅時候無論教嘅嘢係識定唔識我都可以搵到嘢去問佢。就係咁，經過咗我個半月嘅努力，我同佢終於由莫不相識變成有兩句計傾嘅同學。

而個半月之後，就係我哋學年嘅第一個大日子----運動會。而運動會對我哋唔同人黎講，都有唔同嘅意義：有D人會當運動會係比自己多兩日假期；有D人會當係幫自己社爭光嘅日子；而我，今年運動會嘅目標只有一個，就係喺完咗嗰日成功搵佢一齊影相，換個講法，其實我只係唔想參加任何項目，等我可以好好享受吓冇堂上嘅日子。

去到運動會當日，我懷著輕快嘅心情，昂首闊步咁踏入運動場，準備好好咁耍廢兩日。點知，一行入去，就有人將塊號碼布塞入我隻手入面，寫住：
Boys B grade




1500m
High Jump
。
。
。
。
。
。
仆你個街，又比個社長砌我去送頭。





好死唔死，朝頭早9點第一個項目就係1500m，無奈之下我唯有當落去散吓步，同其他一樣比社長陷害嘅羔羊一齊吹住水咁行夠4個圈。直到最後一圈嘅時候，連個計圈嘅阿Sir都睇我哋唔過眼，係咁催我哋跑快D，我哋先急急腳跑埋最後一圈，唔再喺到霸住個場。

跑完上返看台，咁就梗係開始睇下其他傻仔喺下面跑同埋同friend吹水啦，吹吓吹吓，話咁快就到咗lunchtime嘅時間，終於有得跟返班一齊，同埋有得睇下今日着咗運動衫嘅佢。不得不說，佢細細粒，個樣又甜，着起運動服上嚟真係超級gfable，可以嘅話我都想過去成個痴漢咁痴住佢，但無奈佢又同佢班friend一齊，我啱啱喺場上面又跑到成個阿伯喺到散步咁，只好退一步海闊天空啦。

去到lunch之後，因為跳高係喺第二日，所以我都係無無聊聊咁就完咗第一日嘅運動會。

去到第二日，唔知點解心情同第一日好似唔同咗，本來諗住淨係去落場hea吓，幫手攞參賽分，但係唔知點解，我望住個跳高欄，竟然個心開始係都諗：其實，要攞塊牌有冇可能呢？跟住，我嘅視線開始水平向右望。我靠！佢竟然係幫手睇成績嘅helper。唉，你話世間上有咩慘過俾自己暗戀嘅人睇到自己柒吖。逼於無奈之下，唯有下下我都出盡全力去跳。可惜，我唔係小說入面嘅男主角，冇主角光環嘅加持，所以最後都係毫無意外咁輸咗。本來以為今次嘅運動會目標睇嚟已經冇望啦，但係喺我離開緊跳高場嘅時候，我望一望咗佢，佢又望一望我，仲同我點一點咗頭，笑左一下。雖然唔知佢嗰一笑係禮貌嘅笑容定係恥笑緊我，但係，佢笑嘅時候真係好靚，好甜，好似有好多條蟲係個心到跳嚟跳去咁。

以後係呢一笑，令我決定咗。。。
XXX，可唔可以同我影張相呀
喂！XXX，一齊影張相吖
咦，XXX好似未同你你影喎
。
。
。




冇錯，喺我同全班其他女仔影晒相之後，我終於可以名正言順咁。。。
「喂，我同其他人都影晒相啦，差你一個咋，快D一齊影埋啦。」

冇錯，當你為咗去同一個你中意嘅女仔影相，為咗可以合理化你去搵佢影相呢件事，你係可以有心機到特登去同晒其他唔關事嘅人去影，目的就係為咗掩蓋佢喺你心中係獨特嘅呢個事實。旁人聽到可能會覺得，其實你都同咗其他女仔影啦，就算一早就搵佢影，根本就唔會有人覺得有咩嘢。啱，係架，但係當你鍾意咗一個人，就唔會真係咁理性去諗咁多嘢，只會帶著自己最傻、最天真嘅諗法，去盡量毫無痕跡咁去接近嗰個人。

「好呀！你想點影？」
「是但啦，XXX！過嚟幫手揸機啦！」
「咔嚓」

就係咁，我同佢嘅第一張合照就咁誕生咗，而我哋嘅距離好似亦都近咗。

好似。