《我係劉備，我要光復香港》

夏雨連綿，驚雷震懾，將瞓喺床上面嘅我嘈醒咗。

「嗯...」

我緩緩睜開眼睛望住被白色窗花隔住嘅景象，盡係高樓大廈的掩蓋，加上烏雲密佈，令到間房都照唔到光。

「大哥，你醒喇？」一張唔係咁熟悉嘅面容對住我講。

「羽，早晨。」我都同佢打返聲招呼。





「哇今日真係落好大雨...一朝早就比啲行雷聲嘈醒咗...。」關羽摸著額頭道。

「同第一日穿越嗰陣差唔多..」我說。

「又係。」關羽點頭同意。

我一時陷入咗回想之中...

赤壁江上，腳下流水匆匆，四周都好似準備好瀰漫着一種腥血的味道...同埋兵器上嘅血鏽味。





因為呢度將會有一場腥風血雨嘅戰爭。

「不滅曹賊誓不罷休！光復漢室！」

呢一戰...係決一勝負嘅關鍵時刻。一定要趁呢一次，將水沉火熱嘅漢室喺曹操個仆街手上拯救出來！

「主公，軍師已經開始作法，戰船亦都已經準備就緒，隨時都可以出發！」趙雲拱手說。

「水軍部隊都嚴陣而待喇。」糜芳報告。





「啱啱收到消息。你老婆都已經抵達咗江夏，唔使擔心。」孫乾道。

「好，咁行啦，都係時候吹起反擊嘅號角喇！」

我企喺戰船嘅甲板上面，拔劍出鞘，用劍尖指住赤紅色嘅天空。

「全軍出擊！」

周瑜企喺領頭嘅戰船上，離遠睇到我的劍閃過光茫，便露出咗一絲笑意，然後向全軍吶喊助威。

【另一邊廂】

「都督，你信諸葛亮條友真係借到東風？」說話嘅係一個肌肉厚壯嘅男人。

「阿蒙，佢就自己立咗軍令狀，借唔到佢就要拎個人頭嚟交換㗎啦。」周瑜說道。





英姿颯爽的周公瑾，面露著笑容，言談之間滲透著毫不在乎嘅感覺。

「公瑾就冇撚錯喇，諸葛亮呢個人咁撚古惑，肯定有啲咩詭計。」

「主公！」眾人見到孫權嘅出現立即一改態度。

「免禮啦，呢場仗大家加油！」孫權道。

「我一定唔會令你失望！」周瑜肅然起敬。

「咁我都出發喇！火燒連環船嘅功臣非我莫屬！」黃蓋策起裝滿燃油嘅運糧船揚帆。

「得啦，你仲有命返嚟一定加你人工。」孫權笑道。





「主公，你咁係擾亂緊大家嘅軍心啊...」魯肅搖了搖頭。

「係咩...哈哈哈Sor鳩。」孫權掦手。　

【又返到嚟呢邊廂】

「大哥，黃蓋好似已經出咗發啦，不過而家仲吹緊大西北風...萬一火船撞埋去，就會將火勢吹返我哋呢邊....」關羽分析緊。

「信軍師啦。」我希望減低佢哋嘅疑惑。

但係老實講，我真係唔知應該點樣答佢哋囉。

孔明固之然係勁，仲係勁到出晒汁嗰隻添。

咁但係要我去相信一個常人會有呼風喚雨嘅能力，就真係有啲難度。





比著係你，無端端有條友同你講：「喂我可以問個天借啲風用吓呀！」

你都會鬧佢係痴線佬啦係咪先...？

「知道啦。」關羽點頭回應。

「嗰個孔明有乜咁值得大哥你去信佢啫？」成面鬍鬚嘅張飛都行咗入嚟。

「純粹係覺得佢有少少料事如神啫，唔信佢我哋都冇其他辦法。」我解釋道。

不過講返其實孔明本身就好似已經幾痴線..。

點解咁講呢？





幾年之前，曹操手下最強悍嘅大將軍夏候惇就帶住十九幾萬人追殺我，咁就梗係打算逃走啦。

咁呢個時候孔明就提議咗一條橋比我。

佢好似一早知道夏候惇嘅軍隊會喺博望坡出現，預先就叫咗關羽張飛喺山谷埋伏，佢哋一行過就一把火燒到佢地變灰。

最尾我哋都叫勉強贏咗啦，事後我就問返佢：「點解你又知曹軍會喺呢度進兵？」

「世事一早就已經安排好曬...」

佢當時就係咁答我，我就比佢搞到𢱑曬頭，不過自此之後我就覺得信佢係一個係唔錯嘅決定。

【又另一個另一邊廂】

「丞相！黃蓋架船浮咗大半喺海面，會唔會輕得有啲誇張...？可能係詐降呀。」荀彧焦急咁向座上嘅曹操滙報。

梗係輕，因為成架船都只係裝滿易燃物。

「驚乜撚啫？定啲嚟。」曹操氣定神閒咁講。

「但係...」

「再講野就掉你落江餵魚！」

「知道...」荀彧只得吞回到口嘅說話。

「哈哈，飲返杯？」曹操輕舉裝有杜康酒嘅壺。

「屬下...唔飲酒。」荀彧道。

曹操立即露出銳利的目光瞪著他。

「叫你飲就飲啦咁多嗲！」夏候惇見狀便幫忙解圍。

荀彧被逼吞下酒水..。

看著曹操淨係掛住飲酒作樂個樣，荀彧都只好無奈咁嘆一口氣。