《足印》-從幼稚園開始，對你的心意原來一直是愛情-: 56
「我仲以為……你係去嗰度返兼職添。」呵，我倒是完全沒有想過這個情況。
「哈，其實嗰時我都係啱啱考完結他六級試冇耐，大約係三個月前？」他輕笑一聲，繼續解釋：「有日我返緊屋企嘅途中經過中心，見到佢哋招募緊唔同樂器嘅義教老師，授課對象係屋企經濟能力唔允許但係又對音樂有興趣嘅小朋友。我覺得好有意義，就膽粗粗咁交咗張履歷表去申請。」
「然後就成功咗？畀你出任結他嘅義教老師。」
「嗯，就係咁。平時都係一個星期左右一堂，教下班小朋友基礎知識同技巧咁樣。睇到佢哋學得認真，我都會好開心。」
「哎呀呀……估你唔到喎。」我微笑著，輕輕的肘擊他一下。
他淺笑一聲，續說：「咁未來……又真係冇人可以預計得到嘅。」
「係架，正所謂事在人為，呢個世界就係咩都有可能發生，充滿住一個又一個未知，所以人生先至會咁奇妙。」我笑說。
「我都係咁諗。」天仔抬頭看著藍天，開始慨嘆起來：「不過除咗奇妙，我仲覺得人生好有挑戰性。就好似你講嘅咁，呢個世界的確充滿住種種嘅未知，不過正因為咁先會有無限嘅可能性。
好多時候，人遇到困難都會唔經唔覺咁選擇咗去逃避，唔會選擇去正視問題嘅所在，所以久而久之，好多人都會慢慢咁喺難關面前原地踏步……有時我都會諗，咁樣又係咪真係有意義呢？我自己就覺得……遇到困難反而更加應該要勇敢去面對，嘗試去衝破呢個難關，而唔係選擇去逃避。
我覺得…人生就係一條冇得回頭嘅路。喺呢條人生路上面，每個人都會隨著時間不斷咁樣向前行，一步一步咁樣成長。正因為冇得回頭，我更加認為人應該要腳踏實地咁去面對一個又一個挑戰，咁樣先算得上係一個充實嘅人生。
與其浪費光陰咁樣喺呢條人生路上停濟不前，鼓起勇氣一直向前行會唔會係個更好嘅選擇呢？至少……我自己係咁樣認為啦。」
我還是頭一次看著天仔說出這些說話。
這些…有關人生感悟的說話。
他真的…有所成長了……
「呵呵，講得幾好啊。」我如實說。
「冇悶親你就好。」他微笑。
說著說著，我們已經走到了樓下。
「我上去喇，唔該你送我喎。」我捏捏他的臉頰，說。
「客咩氣啊，傻妹。」天仔輕輕彈了一彈我額頭。
我甜笑一下：「搵日再約你啦，拜拜~」
「如果方便嘅話，不如就聽日？」他笑問。
「哎呀呀……今次又有咩搞作啊？」我反問。
「聽日朝早九點，樓下公園呢度等。我帶你去個地方。」天仔拍拍我的頭，微笑說完一句便轉身走回家。
獨自等著升降機的那段時間，我又回想起天仔剛剛所說的話。
人生就是一條不能回頭的路……
正因為不能回頭，所以更不應該在難關面前止步不前。
不然，只會白白浪費自己的光陰…嗎？
哈哈，他也說得挺好的。
我一直都知道他有那一份努力的心，可就是不夠堅定，總是不自覺的打回原形。
這樣說的話，自小以來，他也有過不少浪費光陰的時刻吧。
但是最重要的，是他現在真的有所轉變了。
下定了決心，一步一步的往前、一步一步的成長。
看著這樣的他，總覺得……
明明當年還只是一顆剛剛發芽不久的小種子，
但現在……好像已經茁壯成長為一棵大樹了。
其實，早在三年前我就已經看到他所下定的決心。
但當時的我們……彼此都認為時機還未成熟。
如果是三年後的現在……
時機，成熟了嗎？
我也不清楚。
翌日，我走到公園應約時，天仔已經坐在石椅上對我揮著手。
「柔，早晨。」他微笑說。
「天仔早晨~揹咁大個背囊，諗住帶我去邊啊？」我注意到他的大背包，問。
「哈，你跟嚟咪知囉。」天仔向我伸出手，笑說：「拖住啦。」
我微笑一下，捉住他的手：「好啊。」
天仔就這樣牽著我的手，把我帶到車站並乘車到達屯門。
起初我還未猜到這個傻瓜到底打算把我帶到屯門何處，但當他在何福堂站牽著我走下輕鐵時，我總算是猜到了他的意圖。
「哎呀呀……想帶我行山就早啲講呀嘛，早知我就帶埋支登山杖嚟啦。」我按住自己額頭，苦笑一聲。
「咩都講晒你聽咪冇驚喜囉。」他笑說，隨即從背包中取出一支登山杖遞向我：「拎住啦，傻妹。」
我先是怔了一怔，反應過來後才笑著接過登山杖。
哈哈，想不到他也挺細心體貼的嘛。
「你又會自己買咗一支嘅？」
「因為有個麻煩人叮囑過我要努力充實人生，所以我呢三年嚟間唔中都會去行山~」
「喔……」我甜笑一下：「唔怪得啦。」
「嗯？唔怪得啲咩？」
「冇嘢~」
「你個傻妹奇奇怪怪咁……行咯？」天仔說著又向我伸出手。
「呵呵，今次使唔使我教你轉左定轉右架？」我捉緊他的手，打趣的笑說。
「哈，你一路行一路睇下我有冇行錯路咪知囉~」他答。
「好，就唔提你，睇下你自己識唔識得行。」我淺笑。
難怪……你在機場抱住我的時候，我會覺得你的胸襟變得更為廣闊了。
原來，那不是錯覺啊。
三年沒見面……直到剛才為止，我都沒為意到你變得更壯了些呢。
在行山徑上緩緩走著，看著沿路上的景色，使我不自覺憶起留學期間的事。
在英國那邊，我把大多時間都花了在學習和實習上，剩餘的時間都用了在陪伴家人和自己的休憩當中。
這樣想起來……我都有三年多沒有抽時間行山了呢。
很懷念呢。
很懷念，這種親身接觸大自然的放鬆感覺。
很懷念，過去與最喜歡的你一起行山的時光。
(聽日就大結局喇！大家覺得天仔會點樣正式表白呢？
點都好，希望大家都會鍾意個結局啦！)