《足印》-從幼稚園開始，對你的心意原來一直是愛情-: 24
「你仲記唔記得我哋細細個嘅時候，」我伸伸懶腰、躺睡在沙灘上，「小飛每晚都會陪我哋瞓覺？」
「緊係記得啦，小飛佢仲好聰明添。」阿柔說著也把身體傾後，像我一樣的躺睡下來。「呢晚瞓喺我肚上面，第二晚就會瞓返你肚上面，絕對唔會偏心~」
「有時你陪我一齊瞓埋落地下，小飛佢又會好聰明咁瞓喺我哋之間。」
「好似個攬枕一樣~」阿柔臉上總算回復笑容，「仲要係又識得發熱又軟腍腍嘅攬枕~」
「笑返咪幾好~」我又學阿柔的招牌動作，輕碰她的鼻尖，「小飛如果知道阿柔你笑返開心返嘅話，我相信佢都會開心嘅。」
「哎呀呀，又學我！」阿柔一邊雙手捏著我的臉頰、一邊甜笑著說：「不過…多謝你喎！氹返我開心！」
「唔好多謝我，要講就同小飛講~」我笑說：「啱啱番說話係小飛佢托我講你知嘅~」
「咁呀…」阿柔托著下腮，像是在思考著甚麼似的，「咁就兩個都多謝啦！又多謝小飛，又多謝天仔！」
真是的…看來我跟小飛也有相同的想法啊。看到阿柔你重拾笑容，我都不自覺的泛起了微笑呢。
終於紓解過阿柔情緒後，我們便繼續沿著海邊走走。
不得不說，這樣一邊慢慢的走著、一邊享受著迎面而來的海風，著實是個不錯的選擇。
「咁樣吹下海風又幾舒服喎，你覺唔覺？」我問。
「海風係幾舒服架，又唔會吹得太急又涼爽~」阿柔邊捏住我的臉邊笑說：「你平時咁懶緊係好少機會體驗得到啦~」
「我咪改緊囉衰妹…」我也不甘示弱的捏住阿柔的臉，「我都努力緊去改變架。」
「呵呵呵~係真唔係架你~」阿柔打趣的打量著我。
「緊係真啦！」我假裝生氣的說：「冇陰公咯，你個衰妹仲笑我…」
「哎呀呀…有人扮嬲啊~」…這麼快就露餡兒了。「講笑咋！天仔你嘅改變我緊係睇到啦~對咗你咁耐點會睇唔到~」
「都唔知你邊句真。」
「句句都真~」阿柔一邊說著、一邊向我戚戚眉，「係喎！如果我叫你聽日朝早五點十五分陪我起身你肯唔肯啊？」
「五點…？咁早有咩搞作啊。」我笑說。
「你估下~估中咗就話你知~」……
「快啲講。」說著我便往阿柔額上輕輕一彈。
「唔應承唔講~」這麼狡猾的喔？
「好，就應承你五點十五分起身~」我微笑。
「…」阿柔先是呆了一呆，接著才笑得甜甜的說：「真係嘅？」
「係啊，應承你喇。」我主動伸出尾指。
「呵呵呵~世界變喇~」阿柔口雖這樣說著，尾指也勾了上來。
「喂喂，你未答我到底咁早有咩搞作喎。」我輕力的扭著阿柔耳朵。
「想你陪我睇日出啊！」阿柔捏住我的臉，說：「睇完仲可以去行下山，直接環島遊一圈！」
「嘩，環島一圈會唔會好耐架？」雖然東龍島這裏不太大，但始終是一個島呢。
「彤彤話行晒就要大約三個鐘~你覺得自己得唔得呢？」阿柔托著下腮的問道。
「三個鐘啫係上次同你行屯門徑嘅預算時間嘛…」我舉起大拇指笑說：「咁就應該冇問題嘅。」
「嘻嘻，咁我哋聽日就挑戰下啦！」阿柔也學我舉起大拇指的說。
走著走著，我和阿柔都不知不覺的走到沙灘的盡頭，我們也掉過頭來，沿著我們一路走來時留在沙地上的足印開始回程。說到底，這裏都只是一個香港的小離島，沙灘的規模不太大也是很正常的。
差不多五時左右，我和阿柔總算慢慢踱步回到我們的營地。先前為了讓我可以紓解阿柔情緒而幫我拉走阿峰的阿彤和被拉走的阿峰二人早就回來，與阿揚阿詩四人正坐在營中玩著撲克牌。
「詩詩彤彤~我返嚟喇！」阿柔一彈一跳的走到兩位姊妹身旁，甜笑著的說。
「哎唷唷~柔柔同天仔拍完拖返嚟喇？」「呵呵，柔柔快啲去同天仔傾計，唔好阻住我打牌，走走走~」
「哎呀呀…你兩隻嘢又亂講…！」阿柔說罷便輕力的在兩位姊妹頸上各咬一口。
看著這個場景的我，臉上又不自覺的泛起了微笑。
「阿天，」阿峰走到我身邊拍拍我的肩膀，「啱啱唔好意思。」
「唔好介意，俗語都話不知者不罪呀嘛。」我一邊微笑著、一邊低聲的在阿峰耳邊問：「阿彤同你講咗啲咩？」
「阿彤佢話雖然阿柔成日都會用，但係就唔好喺佢面前提起顏文字，話佢有啲唔好嘅回憶。」阿峰也像我一樣的在我耳邊低聲說：「之後我都冇再追問。」
「咁就得，」我向阿峰舉起拇指，戚一戚眉的說：「同埋你句唔好意思，唔應該同我講喎。」
會意的阿峰，馬上不好意思的向阿柔道歉。阿柔也接受了道歉，說這只是個無心之失，並不會在意。
由於剛剛中午的時候已經使用了兩個燒烤包的其中一個，我們最後決定簡簡單單的，以即食麵作為這次露營首日的晚餐。至於如何決定由哪兩位幸運兒來下廚？當然是透過剪刀石頭布了。
我看著自己的右手手掌，都不知道這到底是幸運女神的眷顧還是玩笑，我第一場就被淘汰了…哪有可能五個人碰巧一起出剪刀！？
另外一位幸運兒則是阿峰，他跟阿揚激戰到最後一刻，惜敗下陣來。如是者今天的晚餐便交由我和阿峰負責，另外四人則在一旁玩著UNO卡牌。