《足印》-從幼稚園開始，對你的心意原來一直是愛情-: 13
「呼…」我喝了一口水，向阿柔問道：「阿柔你點啊？咁樣揹住你行會唔會好震啊？」
「唔會啊…」阿柔搖搖頭，「我仲好開心添~」
「呵呵，咩事咁開心啊傻妹？」我淺笑。
「見到天仔你咁溫柔幫我檢查傷勢，又唔怕辛苦咁揹住我行山，」阿柔一邊甜笑著、一邊把頭伏在我肩膀上，「係女仔都會開心架~」
「呵呵，咁你好彩~」我伸一伸懶腰，「換轉係其他女仔我就唔會咁做~」
「哎呀呀~乜我咁特別架咩~」阿柔打趣的把臉伸到我的面前、笑著的說。
「邊有可能扔低你一個~」我輕力捏住阿柔的臉頰。
「天仔又口花花~」阿柔甜笑著的回答。
「係真心話嚟囉。」我看見前方的分叉路分別通向上下兩個方向，「係呢，前面係向上定係向下行啊？」
「下面~呢度向下行多半個鐘左右就會到景峰花園架喇。」阿柔說著又不好意思的撓撓頭，「哈哈…又要麻煩多你半個鐘喇天仔…」
「唔麻煩，」我一邊背起背包、一邊說：「咁我估上面嗰條路就係通往藍地水塘啦？」
「係啊~天仔你應承我，遲啲要陪我行返一次藍地水塘架！」阿柔笑著的向我伸出尾指，當然我也勾住了。
「應承你喇，上嚟啦傻妹，」我又做出半蹲在地的動作，「我哋落山喇~」
「嗯！」阿柔單腳彈上我的背後便把頭伏在我的肩膀上休息，我也背住她慢慢下山。
下山的路需要走過不少的石梯，由於阿柔伏在我的背上休息，我便更為小心的、一步一步的前進。雖然我的運動量很小，但有賴今早上山過程大約一小時的經驗，加上剛才有在若夢園稍作休息，半小時後我總算背著阿柔走到山下的景峰花園。
這樣背著阿柔走路是第一次嗎？當然不是了。我還記得小時候的一次，好像是準備升上小一的那一個暑假吧？由於林姨姨林叔叔都去了外國工作，阿柔也順理成章的寄宿在我家中。
那一天我帶了阿柔到樓下的遊樂場玩耍，玩得樂極忘形之際，阿柔不小心跌倒了在地上，擦傷了膝蓋，滲出點點鮮血。
還年少的我根本不懂得如何處理這個緊急情況，只管邊安慰阿柔邊背著她走回家。回到家中，我當然被老媽訓斥了一頓，說我沒有好好照看著阿柔。
不過年紀還小的阿柔卻沒有怪罪於我，反而幫我說話求情，說是因為自己不小心才會跌倒。最後老媽懲罰我一個星期不准到樓下玩耍，所以那個星期我和阿柔都呆在家中簡簡單單的渡過。
「阿柔，落到嚟喇~」伏在我背上的阿柔卻沒有回應我。「柔？」
「呼…呼…」呵呵，傻妹又睡著了。話說你這樣都能入睡嗎？
我一邊背著阿柔、一邊在手機上搜查景峰這裏有沒有跌打醫館，幸運的是顯示結果只離我們現在的位置二百多米。臨近醫館，我也準備把阿柔叫醒。
「阿柔…」我輕輕搖搖身體，「起身喇阿柔…睇跌打啊~」
「嗯…天仔…」阿柔揉揉眼睛、呆呆的說：「落完山喇…？」
「係啊，」我指著前方的跌打醫館，「而家揹緊你去睇跌打。」
「吓…！捽藥酒好痛架喎…不如返屋企啦…我估抖下就冇事掛…」阿柔邊搖著我身體邊說。
「唔得，聽日星期一仲要返學。你腳眼腫到咁點返。」我如實說。
「哎呀呀，都係返到星期三咋嘛…」我知道，阿柔指的是星期四的教師發展日以及星期五的翌日假期，把星期六、日都計算在內的話，就是一個四天的連假吧。
「唔得，返三日都係要返。」難道要你單腳彈跳回學校麼。
「喂吔天仔…」
「冇情講~」說罷，我已經背著阿柔走到醫館內。
可能因為這裏是中式醫館的關係，人流相對西式診所的較少；加上現在才早上十時左右，馬上就輪到阿柔應診了。
「嗯…好彩唔係撞到腳踭，如果唔係就可大可小。」醫師說著便拿出了一瓶跌打藥酒，「腳眼腫起嘅話，捽完呢個之後瞓一晚就冇事，可以唔使擔心。」
「啊…醫師，想問下係咪會好痛？」這句是我替阿柔問的。
「少少痛一定有，如果唔係藥效會滲透唔到。」醫師對我說完過後，雙眼便望向阿柔，「小姑娘，忍十幾秒。」
「嗯…！」阿柔點點頭的回應。
一旁見狀的我，不自覺的把手臂伸到阿柔面前，並向她微笑一下。馬上明白了我意思的阿柔先是呆了一呆，之後便甜笑著的雙手握緊我的手。
「捽好晒，兩位坐低等一陣先。」醫師一邊洗手、一邊跟我們說：「我而家準備幫呢位姑娘包紮埋繃帶。」
我們坐在一旁等候醫師取出繃帶，阿柔則在輕撫我的手臂。…因為稍為瘀傷了。
「哎呀呀…對唔住啊天仔…」阿柔有點不好意思的低著頭說：「我係咪捏得太大力啊…」
「傻妹，對比起你隻腳，我呢啲算得啲咩~」我戳戳阿柔的臉頰，「唔好再講對唔住喇。」
「天仔你唔介意都係啫…」說罷，醫師亦從房間走了出來。
「小姑娘，介唔介意抬一抬起隻腳？放心，今次只係包繃帶，唔會痛。」醫師一邊替阿柔包繃帶、一邊說：「包好之後，行路基本上都唔會太痛，不過少少痛楚就緊有嘅。忍一忍，返到屋企夜晚瞓一覺聽朝就唔會痛架喇。至於繃帶就最好包住兩日，聽晚瞓覺嘅時候拆咗佢就得。」
「唔該醫師。」「知道，唔該醫師~」我點頭回應，阿柔更是微微躬了躬身。