《足印》-從幼稚園開始，對你的心意原來一直是愛情-: 10
「哈哈，辛苦你喇柔柔~」老媽站了起來，「我去沖涼先喇，柔柔你哋傾住先啊~」
「係嘅！」「好~」
待老媽關上浴室門後，阿柔便躺了在我的大腿上。
「呵呵，阿媽唔去沖涼你就唔攤上嚟？」我微笑一下、打趣的問道。
「緊係啦~我係個lady~」阿柔捏住我的一邊臉頰，「淑女啊淑女！」
「係係係~咁你哋啱啱仲講咗啲咩啊？」我沒理會阿柔的攻擊，反正她也沒有用力，只是輕輕的捏著。
「喔~盧姨姨叫我今晚喺度瞓囉，」阿柔把另一隻手都舉起並捏住我另一邊臉頰，「方便叫醒天仔你個懶鬼~」
「吓…咁我咪要瞓梳化囉…」睡眠質素會大跌呢。
「哎呀呀，天仔你好似細細個咁舖張床褥落你房地下咪得囉~最多我同你傾住計咁一齊瞓，等你好瞓啲喇~~」…就這樣吧。
「阿柔你仲記唔記得細細個嘅時候，我哋間中都會寄宿喺大家屋企住一陣？」我微笑的問。
「緊係記得，係好開心嘅童年回憶嚟~」阿柔聽到後也甜笑起來，「我仲記得無論係邊個做寄宿嗰一個，都總係我瞓床，天仔瞓地下~~」
「咁你都記得，」我苦笑一聲，一邊輕撫著阿柔的秀髮、一邊開玩笑的說：「俾你蝦足咁多年~」
「呢啲唔係蝦你，」阿柔鬆開一直捏住我臉頰的雙手，伸著懶腰的說：「係訓練天仔你嘅男子氣慨~自細培養！」
「冇你咁好氣~」我拿著手機，查看著明天的目的地—藍地水塘的一些網上圖片，「係喎，咁我哋聽日要幾點起身？」
「七點半~食完早餐之後就出發~」阿柔應該從下方瞧到我手機的畫面，便坐起來一起看，「天仔你覺得呢個彩虹欄杆靚唔靚啊？」
「OK啦~不過好似有啲亂嚟喎，啲顏色好似都冇乜規率咁嘅？」我如實說。
「哈哈，我第一次同詩詩彤彤去行呢度都係咁諗，」阿柔輕碰我的鼻尖，「不過親眼見到之後就會覺得幾令人心曠神怡架~」
「嘩，係真唔係啊…」這麼神奇？
「真~~天仔你聽日就知我冇呃你架喇！」阿柔舉起大拇指的說。
「睇下點~」
老媽洗過澡出來之後，我便陪同阿柔一起走到她家中，讓她放下今天穿過的骯髒衣物之餘，同時拿著新一套的衣物回去，準備明天的行山活動。如上次一樣，阿柔又在說笑的嫌著我煩，不過我當然沒作理會。
「哎呀呀，明明咁近，咪話咗我自己一個都得囉，」阿柔雙手叉著腰、嘟起嘴唇的說：「又當人哋係細路女！」
「好煩好煩~」我一手拿著阿柔的衣物、一手輕力彈一彈她的額頭，「返去喇。」
「天仔你先煩！」阿柔說著便裝作對我起飛踢。
一來一回，也不過是十五分鐘內的事情。
「咔嚓」老媽把大門打開，「柔柔~返嚟喇？」
「係啊盧姨姨！」阿柔一彈一跳的走入家中，「哎呀呀，天仔佢好煩囉~係都要跟埋去~」
「仲講。」我輕輕以手刀劈了一下阿柔的頭頂。
「哈哈柔柔啊，個衰仔都係關心你啫，唔好勞氣啦~」老媽苦笑的說。
我知道老媽心中清楚知道我和阿柔不是真的在吵架，不過自小到大她都會假裝配合，調停我們之間的「紛爭」。
「好啦，既然盧姨姨都咁講！」阿柔笑著的對老媽說，然後又對我做了一個鬼臉，「我見姨姨咁講咋！哼！」
哈哈，傻妹。
阿柔跟我說，我之前查看到的行山所需用具都沒有一個是錯誤列出的，不過那是為有意挑戰高難度行山路線的高手而設，因此我們不必準備那麼多的用具。我亦聽阿柔所說，只把足夠的乾糧和水、雨傘、防水風衣、簡單的急救包都放進背包中。
「帶齊呢啲嘢就得架喇？」我一邊拉好背包的拉鍊、一邊向阿柔問道。
「嗯嗯~放鬆啲啦天仔~」阿柔拍拍我的肩膀，「有我陪你行實冇事嘅！」
「好，信晒你架喇~」我舉起大拇指。
「Relax~」阿柔亦學我舉起大拇指的說。
到了差不多十一時的時候，阿柔便拉著我一起去睡覺，說甚麼明天要早起，早點睡的話人會更精神一點。起初我因為想再玩一會電話而拒絕，但在老媽和阿柔的聯合噪音攻擊下，加上我也不希望明早賴床，我也聽阿柔所說的去睡覺。…不過是睡在地上。
待阿柔也躺上了床上後，她真的如剛才所說的一樣，一邊跟我聊天一邊睡覺。不過啊傻妹…聊著天又如何睡得著呢？
「都有一牌冇瞓過你張床咯~天仔你記唔記得上次我哋寄宿係幾耐之前啊？」
「呃…上年暑假？」我隱約記得。
「哈哈，我都記得係八月，天仔都話暑假咁就應該冇記錯喇~」
「嗰時阿媽好似返咗大陸探阿爸。」
「咁啱我媽咪爹地又返咗香港~」
「所以阿媽就問林姨姨林叔叔佢哋，問我可唔可以嚟瞓兩、三晚。」
「正確~」
「嗰陣時真係一段好美好嘅回憶呢~」
「童年時代呀嘛，咩都唔使諗、咩都唔使煩~」
「而家阿柔好多嘢諗好多嘢煩咩？」
「多啊~又要諗自己嘅成績，仲要煩天仔嘅數學~~」
「呵呵，辛苦你喎保姆~」
「使乜講，而家先知我辛苦~」我眼角瞧見睡在床上的阿柔轉過身來，看著睡在地上的我。
「阿柔？瞓得唔舒服？」我在地上都還未抱怨呢。
「唔係啊，只係而家望住天仔，感覺…」阿柔甜笑了一聲，「你好似有啲唔同呢~」
「哈哈，咩意思。」…？是我變醜陋了嗎。
「講晒你知就唔好玩啦~~」阿柔說罷便躺回原來的姿勢。
有點不同？阿柔指的是甚麼？應該不會真的是在說我的樣貌吧…那麼，是指我這幾天慢慢的轉變嗎？
…猜不透。
「阿柔…」我正打算叫她名字的同時，阿柔微微的呼吸聲又再傳入我耳中。
「呼…呼…」呵呵，剛剛我還在做英文作業的時候，阿柔也是不消一會兒就可以入睡，看來她今天真的很累了。
我也睡覺好了。
臨近閉上眼睛時，我稍為看了一看窗外的皎潔明月。明天的夕陽，有點期待呢。