韓劇《德魯納酒店》劇評

Hotel Del Luna 德魯納酒店🌙

 好大感觸既一套劇，好多人都會往往搵到d共鳴既劇，題材攝獵好多，大抵都係環繞珍惜，錯過，同放下。從審美標準出發，呢套劇既鏡頭，燈光，場景，調色，人物服裝都好高水準。佢既畫面絕對高國產好幾班，搭配奢華背景，亦可完勝大量美劇。

美學--
 contrast夠深，增加神秘同虛幻感，明亮既大堂同煙霧瀰漫幻燈偏紫既月靈樹每個景都好美好不真實亦好貼合呢間(不存在)既酒店。最中意係鏡頭同分鏡，大量insert同cu放大微動作微表情同重要物件，慢鏡顯得整體更唯美浪漫，男女主老d都會被challenge既近鏡突顯內心戲，有哭有冷有笑通通被導演捕捉到。一場戲同一方向起碼3個角度3個距離，2個方向加wide係10令個畫面來回切換再加insert導致分鏡豐富，有時略嫌花左d多餘左d但好配服導演既精細。個人最喜愛係佢既斜角風格令感情戲大大加分，對角線打破固有運鏡模式，鏡頭延伸腦後而且眼前，wide鏡通常係物件後再隱約射向重點，似偷望同令畫面更豐富神秘。


 因為IU先睇，可以睇到佢明顯進步既演技，將刁蠻愛鬧既一邊演得入型入格，當有內心戲時既眼淚亦有戲，可惜係前面故事交代略鬆散觀眾無法當下感受佢既痛。劇可分單元睇，除左尾段大量主線，前半段由不同鬼故事組成，包含不同主題，當然副線無時間描述太仔細，有d特別深刻亦有d馬虎略過—






 [比起捉著不放，放手需要更大的勇氣—]
第一個感動位係鬼新娘故事，而道理亦貫穿整劇。故事中流連人間既鬼全部都對人世有牽掛或怨念而不得離開，整整幾百年而變成執念，對人殘忍，對自己更殘忍。放手好難，但其實放過人更重要既目的係放過自己。客房主管放過仇家孩子，變相放過自己同認為生來不公既女兒。前台射下照顧妹妹既子彈，令仇人以他之名懷著自責活70多年，其實內心早因對方盡力守諾言而原諒對方。張滿月最後認清真相，放下怨恨，亦放下自責，捉著不放既同樣有高清明，守著保護既承諾陪伴iu互相折磨1300年，當別人已經轉世雙方仍然捉著唔肯釋懷。 故事亦有缺點，男主母親略略帶過，毫無作用。變成愛情既點有d莫名其妙，1300年前既愛情線更加強更加虐心，不止以背叛者名義支撐佢活下去既仇人，仲有死都顧著佢既延宇。男主既愛顯得較弱而理性，有情係順理成章，因為只有佢有夢中窺探內心既能力。仲有加插佢地1300年前相遇過lol呢單做多左，過去故事夠完整不需再硬塞男女主既緣份。


 保護—
支撐兩段愛情線既主題，高清明保護張滿月1300年，即使自身變得微小可悲亦要默默守護。現代男女主角色掉轉，男主一直強調無論何事女主都會保護佢，證明比起保護，女主更需要人救佢被執念吞蝕同受情傷既心，男主打破表面冷漠但內心重情既女主的心，第二集人類總管走時隱含的淚，到最後陪伴多年既職員走既嚎啕大哭。三位男人都用各自不同的方法守護張滿月，不管你覺得那位最打動人心，都不可否認這三位對滿月的愛係毫無保留，括出一切。1300年前的兩位守護既係滿月既生命，1300後既滿月係得到永生之際，需要守護的反而是她的靈魂。


 最最中意係結局，無轟烈既結束，只有順理成章既別離。唔係想像既HE，加大真實感同放大遺憾。男主放棄女主留下既機會，因為留下既代價係女主往後千年既孤寂，了無遺憾既不是人生，能做既只有盡量將遺憾減少。人去樓空既酒店，每次離別都好催淚，但亦係注定。






  最後約定既來生，同一句走好，係千萬思緒織成既寥寥數字，他們夠幸運，能說再見，現實又有幾多人可以同對方珍重說聲再見？最後開放性結局，是未來是夢亦不再重要，因為有緣自會再見。金書生能抬頭挺胸做人，客管視小狗如親小孩，前台做回學生，結局很完滿。


 題外話，IU好靚，次次出場行show咁好配合佢人設，角色好似為佢而設咁。金秀賢都好靚仔。。酒店主人專揀靚人？