一件令我更加勇敢嘅往事

         我一個人行喺條好静嘅道路上。路邊嘅路燈一閃一閃噉，就好似天上嘅星星，隨時會俾風吹熄一樣。不知不覺，我到咗我嘅目的地— 「明星電影院」。 呢間戲院早就喺十年前執咗笠了，留低嘅，都只係啲殘骸。
          十年前，我仲係個中學生。而我嘅媽媽就係喺呢間戲院打工搵食。而我老竇因為喺出邊有咗其他女人，就好狠心噉抌低我哋。媽媽辛辛苦苦賺返嚟嘅血汗錢淨係啱啱好夠我哋三餐溫飽，所以冇多余嘅錢俾買間屋。好彩，戲院嘅事頭婆肯俾我哋住喺儲藏室入邊，唔係嘅話，我哋就慘到要瞓喺街度。
          當時，我好憎媽媽。因為我覺得係因為佢嘅無能，我先會俾啲同學仔睇唔起。有時候，佢哋會笑我嘅衫穿晒窿；有時候，佢哋會笑我破碎嘅家庭； 有時候，佢哋會笑我孭緊媽媽幫我補過無數次嘅書包。而我媽媽淨係叫我當佢哋噏緊風，但係，我做唔到。
          不過，有位心地好善良嘅女同學，每次都喺佢哋笑我嗰陣幫我解圍，佢就叫做小雪。就噉，佢慢慢變成咗我形影不離嘅好朋友。
          之但係，有日上天好無情噉將我嘅所有嘢都攞走。 嗰日，小雪好似平時一樣陪我行路返屋企。 小雪邊行邊喺我耳仔邊咦咿哦哦：「新嚟過年喇，風好大，記住要著多件衫，唔好凍親呀！」
          突然之間，前面發出咗好大嘅聲音。我哋對望咗一下，然後一齊走去前面睇发生乜嘢事。走下，走下，我哋就到咗我所謂嘅屋企。 我哋睇到我媽媽好擒青噉走咗出來，佢一見到我哋就拉住我同小雪向反方向走。嗰陣時，我淨係聽到佢震震下嘅聲，嗌：「殺人喇！殺人喇！」
          好奇嘅我就回頭望下。唔係下話？唔望就還好， 一望就望到成條街都係屍體，仲有幾個人攞住槍喺戲院外出掃射緊。忽然間，媽媽嘅心口被前面嘅人用槍射中咗。跟住媽媽就倒咗落嚟。我即刻攬住佢，鮮血將我對手染紅咗。媽媽用力揸住我嘅手，講：「 仔啊！原諒媽媽冇用，媽媽對唔住你。記得要勇敢啲繼續生存落去。」
          講完呢句說話，佢就眯埋對眼，離開咗呢個世界。
          「媽媽，你唔死得住啊！」 我好無助嘅跪咗落嚟喊。嗰一瞬間，我先至知道我，原來我其實好愛我媽媽。
          「砰！」 呢次到小雪應聲倒地。我聽見佢微弱嘅聲：「你要勇敢生存落去呀！」 跟住，佢對眼都合埋咗。




          悲憤交加嘅我企咗起身，一仆一碌行過去開槍嘅嗰個人度。嗰個人慢慢將佢枝槍指向我。
          「砰！」 我眯梩對眼。冇痛楚，冇慘叫，空氣好似凝結咗。過咗一陣，我打開眼。我見到嘅係嗰個人已經瞓低咗係地下。之後，出現喺我眼前嘅係一名著住綠色軍服嘅軍人。佢見到我之後對住部對講機講：「呢度有個生還者！」後來，我眼前一黑，失去咗知覺。
          過後，我就喺醫院入面醒咗過嚟。醫生幫我檢查身體嗰陣同我講，我係嗰場恐怖襲擊裏邊嘅唯一一個生還者。
          我出咗院之後，決定為我媽媽同小雪放個靈位喺俾人遺棄咗嘅「明星電影院」。
          我入咗戲院，行過去擺喺角落嘅靈位，裝咗支香。
          「媽媽、小雪，我嚟睇你哋喇！我會記住你哋嘅話，勇敢生存落去。」 講完之後，我嘅眼角已經濕晒。