《當全世界都染上唔扑野就會死嘅怪病》: 14

「你咁樣好咩？其實你咁樣都係唔會搵到好女仔。」見到佢頭先咁嘅樣，我有啲驚⋯⋯
 
我同茂丙保持返一段距離。
 
「你覺得我依家仲會想搵咩好女仔咩？」茂丙自嘲著。
 
「唉，算鳩數，你都係唔撚明㗎啦，未經歷過最低層嘅生活，就成日一副高高在上嘅姿態。」
 
茂丙講「高高在上」嘅時候，斜斜地望住，佢意思再明顯不過。
 


「基本上勝利嘅人講乜Q都得，呢個世界本來就係勝者為王，敗者為寇，有啲人就係一出世就係贏家。」
 
不知不覺我哋已經行到大樓正門，然後再行一段路先出到學校正門。
 
「咁你理得人點講姐。」我係要同佢撐到行，我去到後面都有啲覺得自己好似為撐而撐，為駁而駁咁。
 
「你自己都已經係人生勝利組，你梗係可以理撚得人點講啦。」茂丙個眼神，係蔑視嘅眼神。
 
「咩啊？我係咩人生勝利組啊？」我皺曬眉頭，唔知佢講咩，我都係第一次俾人話自己係人生勝利組。
 


「你唔洗追就有人鍾意你啦，仲想點啊？」
 
「？」
 
「樂兒啊！」
 
「你唔好係度扮唔知啦好無？」茂丙講出嚟唔知點解有種酸味，配合埋佢嘅眼神，俾咗呢種感覺我。
 
「咩嘢啊？」我都係唔明。
 


「我以前好認真好認真咁鍾意樂兒，但佢請咗我食檸檬，話自己有鍾意嘅人，嗰個人係佢由細鍾意到大。」
 
「全級都知你同佢係青梅竹馬啦，唔係你仲有邊個啊？！」
 
我真係呆撚咗，真係呆咗。
 
乜嘢事啊？

「有咩可能啊？我都俾佢請食檸檬，如果係咁一早一齊咗啦。」
 
女人啲心計你邊夠佢哋玩啊，當初話要做SP嗰陣唔多唔少都睇透啲，而我好似俾佢玩弄喺鼓掌之中。
 
「但佢明明係咁講！」茂丙深信不疑。
 
「咁最後我有同佢表白，佢都係拒絕我啊嘛，如果佢真係鍾意我啊，一早一齊咗啦。」


 
唉，同佢講下講下好似變撚咗愛回家咁樣⋯⋯
 
「你唔會明佢打緊咩如意算盤，就算我同佢青梅竹馬咁耐，我都唔知佢諗緊乜！」我都好坦白。
 
相比起樂兒，Cherry純真好多，即使係呢個艱難嘅亂世入面，都可以維持住已經好難得。
 
「點會啊⋯⋯？」茂丙唔係好信，但實質開始動搖。
 
「有男狗公，有女母狗係咪都好正常啊？」
 
「狗公玩女，有八婆玩仔，咁八婆玩狗公轉頭，好出奇？只不過唔到最後都唔知邊個玩邊個姐。」
 
「雖然我都好同情你嘅遭遇⋯⋯」我講埋最後一句。
 


「但都唔好放棄搵到好嘅另一半嘅本心。」
 
「因為人哋hurt，然後又去hurt返其他人，咁樣無限loop好咩？我相信世界有一半壞人一半好人，你唔好當曬成個世界都係壞人，可能壞人好人比例唔一定係一半一半，但總之仲會有好人，只係你未搵到姐。」
 
「我哋都一樣俾樂兒傷害過，其實我都無贏過你啲咩，無啦啦咁樣鬥咩姐？」
 
「幸福一直都唔係比較出嚟。」講完，就係學校門口分道揚鑣。
 
我都唔知點解最後會講出咁嘅說話，好似一時之間領悟到啲咩咁，點醒埋自己。
 
其實幸福都係自己感受出嚟嘅嘢，咁自己只要有幸福就夠？
 
有個好模糊不清嘅想法入侵我個腦。
 
而我當下，我好想好想搵佢，見到佢。