我在補習社遇到一個令我難以忘懷的女生。: 三十、忽冷忽熱

之後嗰啲星期五，大部分學生都考晒試，補習社終於冇咁忙。咁腦細都話嗰個星期唔洗學生做咁多份練習。
 
嗰個星期真係好鬼正，要對嘅功課同練習又少咗，學生小息次數又多咗，基本上都係冇咩野做。但唔知點解明明hea咗咁多，Ellie都好似成日刻意避開我，咁我都明白嘅，每兩個星期先見一次，關係正常都會疏遠咗。
 
有時我由classroom B行出去搵練習答案影印野果陣，只要我出去，Ellie都會即刻讓個位比我然後自己行返行班房先。
 
好難捉摸呀！我都唔知自己做錯咩就好似比人判咗死刑咁。
 
有一次我影印緊野果陣，Ellie喺廁所啱啱行出嚟，佢一打開門見到我好似見到仇人，即刻頭耷耷急急腳走。
 


影印完野我就返去問最醒目同最識做人嘅Mary。
 
但如果一個男tutor關心女tutor比小學生知道一定會引起軒然大波。
 
「哦……你鍾意Miss Ellie! 」
 
「你哋係咪拍緊拖啊? 」
 
「Miss Ellie有人鍾意你呀。」
 


諗到都覺得恐怖，仲要唔知會唔會影響份工。
 
所以我決定用寫紙仔方法比Mary，因為當佢想屈我，我就可以即刻擦走紙上面嘅問題。
 
我坐喺Mary隔離寫咗張紙仔遞比佢:「Miss Ellie今日係咪唔舒服?」
 
Mary見到張紙仔:「……」
 
「我又不是她，為甚麼你想知道她發生甚麼事，卻又不問她呢?」Mary用鉛筆喺張紙上面寫。
 


我心諗:「好有道理，不過我咁怕羞都係用其他途徑睇吓佢咩事。」
 
聲音A:「你今日個鼻哥窿係咪有鼻屎未撩，定係你個加拿大又流晒汗？」
 
聲音B:「如果係嘅話其他學生都避開你喇。」
 
雖然聲音B講野好有道理，但我都去咗廁所檢查吓有冇以上情況。
 
我望住塊鏡同自己講野:「又冇喎。」
 
返入班房，因為真係太無聊，所以我就攞起部手機睇吓野。睇睇吓先醒起原來自己有加Ellie電話。我㩒入去佢WhatsApp睇，係三個着住校服嘅女仔坐喺班房嘅合照，冇咩特別。再碌落去，見到佢WhatsApp狀態:「壞習慣乞人憎x_x」(三天前)。
 
我心諗:「佢係咪有咩壞習慣好想改呢? 咁人人都有啲壞習慣自己唔鍾意嘅。」
 
淨係得哩啲資料好似唔係好夠咁，於是我就搵吓佢Facebook叫咩名，但我只知道佢英文名叫咩，所以真係大海撈針咁。　


 
我喺Facebook打Ellie，出咗成十幾萬個結果，見到之後我眼都突埋，唔諗住繼續搵。除咗Facebook同WhatsApp，其他social media我又唔用，姐係Instagram、snapchat、line之類。
 
今日六點半學生都差唔多走晒，臨走前我行入classroom A同Ellie講拜拜。
 
「今日辛苦喇，拜拜…呀！記住改吓自己啲壞習慣喇。」我伸一伸個頭入classroom A。
 
Ellie望住我好似有野想講又講唔出口:「不如你……唉…都係冇野喇…拜拜。」
 
睇到佢個樣之後我有啲不惑，但直覺話比我聽最好盡快離開現場。
 
行返去搭巴士果段路，不斷諗點解佢會無啦啦疏遠我，定係佢同我一樣，唔想同人咁快就咁熟。
 
唉都係唔理得咁多，愈諗個頭又愈痛，我諗我嘅壞習慣係一諗野就會好似無底深潭咁唔識停，除非有人無啦啦阻止我。
 


為咗唔好再諗落去，我就不停望吓周圍發生啲咩事分散下自己注意力。我望望下發現橋上面有個女人不斷喺橋上面徘徊，不過離太遠喇都睇唔清佢個樣。
 
過咗五分鐘我就上咗㗎480號，我上去上層揀咗個中間位置，坐喺右手邊挨住窗聽歌。
 
咁我就揀咗一個其他user 推薦嘅playlist嚟聽。
 
「想唔想隨時隨地唔受限制聽歌，只要申請做XXX會員，你就冇限制地聽你喜愛嘅歌……」廣告聲音喺耳機傳入耳仔。
 
「姐係你好鍾意做嘅話……咁咪去做囉。」把聲一聽就知係Eason。
 
茶和咖啡　同樣供給刺激
可惜世上　唯有煙　熱吻足我十年
因此你天天迫我　但我一直未停
我願長　情到底　明日不必戒煙
 


由於首歌個節奏好輕快，我聽聽吓身體都不自覺跟住郁。我諗依個人應該徘徊對煙仔斷捨離嘅階段。